ដោយ៖ នៅ ស៊ីវុត្ថា
ភ្នំពេញ៖ សមាគមទុរេនកម្ពុជាបានអំពាវនាវឱ្យកសិករ ម្ចាស់ចម្ការ និងអ្នកនាំចេញទុរេនទាំងអស់ អនុវត្តឱ្យបានម៉ឺងម៉ាត់តាមលក្ខខណ្ឌភូតគាមអនាម័យ និងបទប្បញ្ញត្តិនានារបស់ប្រទេសចិន ដើម្បីរក្សាគុណភាពផលិតផល និងពង្រឹងទំនុកចិត្តរបស់ទីផ្សារនាំចូល ខណៈការនាំចេញទុរេនស្រស់របស់កម្ពុជាទៅកាន់ប្រទេសចិនកំពុងបន្តកើនឡើងយ៉ាងគំហុក។
គិតត្រឹមថ្ងៃទី២៤ ខែកក្កដា ឆ្នាំ២០២៦ កម្ពុជាបាននាំចេញទុរេនស្រស់ទៅកាន់ប្រទេសចិនសរុប៥ ៧៣៨តោន ដែលកើនឡើងជិត៤០ដង បើធៀបនឹងបរិមាណនាំចេញសរុបពេញមួយឆ្នាំ២០២៥។
លោក រឿន រតនា លេខាប្រតិបត្តិសមាគមទុរេនកម្ពុជា បានប្រាប់ទូរទស្សន៍អនឡាញ ARDB TV នៅថ្ងៃទី២៩ ខែកក្កដា ឆ្នាំ២០២៦ថា អគ្គរដ្ឋបាលគយចិនបានហាមឃាត់ការប្រើប្រាស់សារធាតុសម្លាប់សត្វល្អិតចំនួនប្រាំប្រភេទ លើទុរេននាំចូលទៅកាន់ប្រទេសចិន រួមមាន ហ្វីប្រូនីល (Fipronil) កាបូស៊ុលហ្វាន (Carbsulfan) កាបូហ្វូរ៉ាន (Carbofuran) អាសេហ្វាត (Acephate) និងឌីមេតូអេត (Dimetoate)។
យោងតាមទិន្នន័យ ដែលបានលើកឡើងដោយឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា បង្ហាញថា ការនាំចេញទុរេនស្រស់របស់កម្ពុជាទៅកាន់ប្រទេសចិន បានកើនឡើងយ៉ាងគំហុកក្នុងឆ្នាំ២០២៦។
ឯកឧត្តមបានបញ្ជាក់ថា កំណើននេះមួយផ្នែក គឺដោយសារការបើកដំណើរការច្រកដឹកជញ្ជូនផ្លូវគោកថ្មីឆ្លងកាត់ប្រទេសឡាវ ដែលបានកាត់បន្ថយរយៈពេលដឹកជញ្ជូនពីប្រមាណ១៥ –២០ថ្ងៃ មកនៅត្រឹមប្រមាណប្រាំថ្ងៃ។
ការកាត់បន្ថយរយៈពេលដឹកជញ្ជូននេះ មិនត្រឹមតែជួយរក្សាគុណភាព និងភាពស្រស់របស់ទុរេនប៉ុណ្ណោះទេ ប៉ុន្តែថែមទាំងកាត់បន្ថយថ្លៃដឹកជញ្ជូន បង្កើនប្រសិទ្ធភាពនៃខ្សែច្រវាក់ផ្គត់ផ្គង់ និងលើកកម្ពស់សមត្ថភាពប្រកួតប្រជែងរបស់ទុរេនកម្ពុជានៅលើទីផ្សារចិន។
សមិទ្ធផលនេះត្រូវបានប្រកាសក្នុងពិធីសម្ពោធការដឹកជញ្ជូនទុរេនស្រស់ជើងទី១ ចំនួនបីកុងតឺន័រ ឬប្រមាណជាង៥០តោន របស់ក្រុមហ៊ុនពេជ្រចិន្តា ហ្វ្រូត ប្រូដាក់សិន ភីអែហ្វភី (Pechenda Fruit Production PFP Co., Ltd.) ទៅកាន់ទីផ្សារចិន តាមច្រកផ្លូវគោកឆ្លងកាត់ប្រទេសឡាវ កាលពីថ្ងៃទី២៥ ខែកក្កដា ឆ្នាំ២០២៦ ក្រោមអធិបតីភាពរបស់ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។
ឯកឧត្តម ឃឹម ហ្វីណង់ បានមានប្រសាសន៍ថា ការបើកច្រកដឹកជញ្ជូនថ្មីនេះ គឺជាលទ្ធផលនៃកិច្ចខិតខំប្រឹងប្រែងរបស់ក្រសួងកសិកម្ម ក្នុងការពង្រីកទីផ្សារ និងធ្វើពិពិធកម្មមធ្យោបាយដឹកជញ្ជូន ដើម្បីធានាឱ្យកសិផលកម្ពុជាអាចទៅដល់ទីផ្សារចិនបានលឿនជាងមុន ដោយរក្សាបាននូវគុណភាព និងបង្កើនសមត្ថភាពប្រកួតប្រជែង។
បច្ចុប្បន្ន ច្រកដឹកជញ្ជូនផ្លូវគោកឆ្លងកាត់ប្រទេសឡាវ បានរួមចំណែកប្រមាណ១០ភាគរយនៃការនាំចេញទុរេនស្រស់របស់កម្ពុជាទៅកាន់ប្រទេសចិន។ ជាមួយគ្នានេះ ក្រុមហ៊ុននាំចូលមួយចំនួននៅប្រទេសចិន ដែលធ្លាប់នាំចូលទុរេនពីបណ្តាប្រទេសជិតខាង ក៏បានចាប់ផ្តើមងាកមកទិញទុរេនពីកម្ពុជាកាន់តែច្រើន ដោយសារគុណភាពផលិតផល ភាពប្រកួតប្រជែងផ្នែកតម្លៃ និងការដឹកជញ្ជូន ដែលកាន់តែមានប្រសិទ្ធភាព។
ការកើនឡើងនៃការនាំចេញទុរេនស្រស់ បានឆ្លុះបញ្ចាំងពីឱកាសថ្មីសម្រាប់វិស័យដំណាំហូបផ្លែកម្ពុជា បន្ទាប់ពីទុរេនស្រស់កម្ពុជាទទួលបានការអនុញ្ញាតឱ្យនាំចូលទៅកាន់ទីផ្សារចិនជាផ្លូវការ។ ទោះបីជាយ៉ាងណា អ្នកជំនាញលើកឡើងថា ការរក្សាគុណភាពផលិតផល ការគោរពស្តង់ដារភូតគាមអនាម័យ ការតាមដានប្រភពដើម និងការប្រើប្រាស់ធាតុចូលកសិកម្មឱ្យបានត្រឹមត្រូវ នឹងក្លាយជាកត្តាគន្លឹះក្នុងការធានានិរន្តរភាពនៃការនាំចេញ។
ទោះបីជាកម្ពុជាទើបតែចាប់ផ្តើមនាំចេញទុរេនស្រស់ទៅកាន់ទីផ្សារចិនជាផ្លូវការ ក្នុងឆ្នាំ២០២៦ក៏ដោយ កំណើននៃការនាំចេញក្នុងរយៈពេលជិតប្រាំពីរខែ បានបង្ហាញពីសក្តានុពលរបស់វិស័យនេះ។ ប្រសិនបើកម្ពុជាអាចបន្តរក្សាបាននូវគុណភាពផលិតផល និងអនុវត្តតាមតម្រូវការរបស់ទីផ្សារនាំចូលបានយ៉ាងតឹងរ៉ឹង ទុរេនកម្ពុជានឹងមានឱកាសពង្រីកចំណែកទីផ្សារនៅប្រទេសចិន បង្កើនប្រាក់ចំណូលជូនកសិករ អ្នកប្រមូលទិញ និងអ្នកនាំចេញ ព្រមទាំងរួមចំណែកជំរុញការអភិវឌ្ឍវិស័យកសិកម្មរបស់កម្ពុជាក្នុងរយៈពេលវែង៕
