តូក្យូ៖ ប្រភពមួយបានឱ្យដឹងថា ការប្រើប្រាស់អង្ករក្នុងស្រុករបស់ជប៉ុនក្នុងរយៈពេលមួយឆ្នាំ គិតចាប់ពីខែកក្កដា ឆ្នាំ២០២៥ ដល់ខែកក្កដា ឆ្នាំ២០២៦នេះ បានធ្លាក់ចុះដល់កម្រិតទាបបំផុត គឺក្នុងបរិមាន៦,៨៣លានតោន បើគិតជាអង្ករសំរូប។
សារព័ត៌មានជប៉ុន បានចេញផ្សាយនាថ្ងែទី២៩ ខែកក្កដា ឆ្នាំ២០២៦នេះថា មូលហេតុភាគច្រើនបណ្តាលមកការកើនឡើងនៃការនាំចូលអង្ករពីរទេស ក្រោយពីតម្លៃអង្ករផលិតក្នុងស្រុកបានហក់ឡើងដោយសារជួបបញ្ហាខ្វះអង្ករយ៉ាងច្រើនពេក នៅក្នុងរដូវក្តៅឆ្នាំ២០២៤។
ទិន្នន័យនេះត្រូវបានបង្ហាញនៅក្នុងកិច្ចប្រជុំក្រុមប្រឹក្សាស្បៀងអាហារ កសិកម្ម និងគោលនយោបាយសម្រាប់តំបន់ជនបទ ដើម្បីផ្តល់យោបល់ដល់រដ្ឋមន្ត្រីកសិកម្មជប៉ុន។
កាលពីខែកញ្ញា ឆ្នាំ២០២៥ ក្រសួងកសិកម្ម រក្ខាប្រម៉ាញ់ និងនេសាទរបស់ជប៉ុន បានប៉ាន់ប្រមាណថា តម្រូវការអង្ករក្នុងស្រុកក្នុងរយៈពេលមួយឆ្នាំ នឹងមានចន្លោះពី៦,៩៧លាន ទៅ៧,១១លានតោន។ ការព្យាករណ៍នេះ ត្រូវបានទម្លាក់មកនៅត្រឹម៦,៩១លាន ទៅ៧,០៤លានតោន ក្នុងខែមីនា ឆ្នាំ២០២៦នេះ ប៉ុន្តែការប្រើប្រាស់ជាក់ស្តែងនៅតែតិចជាងការព្យាករណ៍នេះ។
ភាពច្របូកច្របល់នៃទីផ្សារអង្ករជប៉ុន បានកើតឡើងចាប់តាំងពីរដូវក្តៅ ឆ្នាំ២០២៤ ដោយសារតែការព្យាករណ៍តម្រូវការអង្កររបស់រដ្ឋាភិបាល បានធ្លាក់ចុះទាបជាងការប្រើប្រាស់ជាក់ស្តែង។
ជាបន្តបន្ទាប់រដ្ឋាភិបាលជប៉ុន បានផ្លាស់ប្តូរវិធីសាស្ត្រព្យាករណ៍កាលពីខែកញ្ញា ឆ្នាំ២០២៥ ដោយបន្ថែមការប្រើប្រាស់អាចកើនឡើងដោយសារសង្ឃឹមនឹងមានភ្ញៀវទេចរបរទេសមកលេងប្រទេសជប៉ុនច្រើន។
ទន្ទឹមនឹងនេះដែរ ទិន្នផលស្រូវឆ្នាំ២០២៥ មានបរិមាណត្រឹមចំនួន៧,៤៧លានតោន។ ជាលទ្ធផល ស្តុកស្រូវក្នុងឃ្លាំងរបស់វិស័យឯកជនមានបរិមាណសរុបបានត្រឹមតែ២,៤៣លានតោន ដែលជាកំណត់ត្រាខ្ពស់បំផុត កាលពីចុងខែមិថុនា ឆ្នាំ២០២៦នេះ។
ចំណែកតម្លៃអង្ករជប៉ុនលក់រាយ ដែលបានស្ថិតក្នុងនិន្នាការធ្លាក់ចុះ ចាប់តាំងពីបានឡើងថ្លៃដល់កម្រិតខ្ពស់បំផុតកាលពីចុងឆ្នាំ២០២៥ ត្រូវបានគេរំពឹងថា នឹងធ្លាក់ចុះបន្ថែមទៀតនៅក្នុងឆ្នាំ២០២៦នេះ។
ក្រសួងកសិកម្ម រក្ខាប្រម៉ាញ់ និងនេសាទរបស់ជប៉ុន បានព្យាករណ៍ថា ការប្រមូលផលស្រូវនៅឆ្នាំ២០២៦ នឹងទទួលបានទិន្នផលចំនួន៧,៣២លានតោន ធៀបនឹង៦,៩៣លានតោន ទៅ៧,១១លានតោន នៃតម្រូវការអង្ករនៅក្នុងប្រទេស។ ចំណែកស្តុកទុកស្រូវរបស់វិស័យឯកជនត្រូវបានគេមើលឃើញថា នឹងកើនឡើងដល់២,៨១លានតោន នៅចុងខែមិថុនា ឆ្នាំ២០២៧។
ដោយសារអតិរេកអង្ករដ៏ច្រើនបែបនេះ កសិករ និងពាណិជ្ជករជប៉ុនកំពុងស្នើសុំរដ្ឋាភិបាលឱ្យមានការទិញអង្ករត្រឡប់មកវិញមុនកាលកំណត់ បន្ទាប់ពីស្តុកអង្កររបស់រដ្ឋត្រូវបានបញ្ចេញកាលពីឆ្នាំ២០២៥ ដើម្បីកាត់បន្ថយការខ្វះខាត និងទប់ស្កាត់ឡើងថ្លែអង្ករម្តងទៀត។
ក្រសួងគ្រោងនឹងកំណត់ពេលវេលា និងបរិមាណនៃការទិញអង្ករត្រឡប់មកចូលស្តុកវិញបែបនេះ បន្ទាប់ពីបានបញ្ជាក់ពីស្ថានភាពប្រមូលទិន្នផលសម្រាប់ដំណាំស្រូវឆ្នាំ២០២៦ ដែលការសម្រេចចិត្តនេះត្រូវបានគេរំពឹងថា នឹងធ្វើឡើងនៅមុន ឬក្រោយចុងខែសីហា ក្រោយពីដឹងច្បាស់អំពីស្ថានភាពប្រមូលផលស្រូវប្រចាំឆ្នាំ។
កាលពីចុងឆ្នាំ២០២៥ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទរបស់ជប៉ុន បានបង្ហាញពីចេតនារបស់ខ្លួនក្នុងការកែប្រែគោលនយោបាយផលិតកម្មស្រូវដោយផ្អែកលើតម្រូវការជាក់ស្តែងនៅលើទីផ្សារ។ ការប្រែប្រួលបែបនេះ គឺផ្ទុយពីការចង់បានរបស់កសិករជប៉ុន ដែលមានការព្រួយបារម្ភអំពីការធ្លាក់តម្លៃអង្ករ។ ប៉ុន្តែទោះបីជាយ៉ាងណាក៏ដោយ ប្រសិនបើតម្លៃស្រូវនៅតែខ្ពស់បែបនេះ វាក្លាយបន្ទុករបស់អ្នកបរិភោគវិញទេ។
តម្លៃស្រូវរបស់ជប៉ូនឡើងខ្ពស់ក៏បានរួមចំណែកជួយលើកទឹកចិត្តកសិករជប៉ុនឱ្យប្រឹងដាំស្រូវបន្ថែមទៀត ហើយស្រូវប្រហែល៧,៤៨លានតោន ចំណែកទិន្នផលស្រូវនៅឆ្នាំ២០២៦ ត្រូវបានគេព្យាករណ៍ថា នឹងធ្លាក់ចុះចំនួនប្រាំភាគរយពីមួយឆ្នាំទៅមួយឆ្នាំ មកត្រឹម៧,១១លានតោនប៉ុណ្ណោះ។
ក្រសួងក្រសួងកសិកម្ម រុក្ខាប្រមាញ់ និងនេសាទ បានព្យាករថា តម្រូវការអង្ករសម្រាប់ឆ្នាំ២០២៦ អាចមានបរិមាណចំនួនពី៦,៩៤លាន ទៅ៧,១១លានតោន។ ចំណែកតម្លៃអង្ករជប៉ុននាពេលនោះ ជាមធ្យមលក់នៅតាមផ្សារទំនើបទូទាំងប្រទេស បានធ្លាក់ចុះមកត្រឹមចន្លោះ៣ ៥០០ យ៉េន ឬស្មើនឹង២២,៦២ដុល្លារ ក្នុងអង្ករប្រាំគីឡូក្រាម បន្ទាប់ពីការបញ្ចេញស្តុកអង្ករជាទ្រង់ទ្រាយធំរបស់រដ្ឋាភិបាល។
ទោះបីជាយ៉ាងណាក៏ដោយ តម្លៃជាមធ្យមបានងើបឡើងវិញ នៅក្នុងចន្លោះ៤ ០០០យ៉េន ឬស្មើនឹង២៥,៨៥ដុល្លារ ក្នុងរយៈពេលប្រាំបួនសប្តាហ៍ជាប់ៗគ្នា ហើយបានឡើងថ្លៃខ្ពស់បំផុតនៅក្នុងវង្វង់ពាក់កណ្តាលខែឧសភា ឆ្នាំ២០២៦ គឺត្រឹម៤ ២៨៥យ៉េន ឬស្មើនឹង២៧,៦៩ដុល្លារ ក្នុងកញ្ចប់អង្ករប្រាំគីឡូក្រាម។
នៅពេលវិស័យឯកជននាំចូលអង្ករពីបរទេស ពេលនោះរដ្ឋាភិបាលជប៉ុនតម្រូវឱ្យពន្ធចំនួន២៤១យ៉េន ឬស្មើនឹង១,៥៦ដុល្លារ ក្នុងមួយគីឡូក្រាម។ ទោះបីជាយ៉ាងនេះក្តី ក្រុមហ៊ុនឯកជនរបស់ជប៉ុនបានបង្កើនការនាំចូលអង្ករពីបរទេស ពីព្រោះតម្លៃនៅតែទាបជាងអង្ករក្នុងស្រុក ទោះបីជាបង់ព័ន្ធរួចហើយក៏ដោយ៕ (ផាន់ អាណា)
