ដោយ នៅ ស៊ីវុត្ថា
ភ្នំពេញ៖ ក្រុមការងារជំរុញការវិនិយោគក្នុងភូមិភាគឦសាន បានអនុម័តគម្រោងវិនិយោគថ្មីចំនួន ៣ ក្នុងវិស័យកសិកម្ម ដែលមានទុនវិនិយោគសរុបប្រមាណ ១០៨ លានដុល្លារអាមេរិក និងរំពឹងថានឹងបង្កើតការងារប្រមាណ ៧០០ កន្លែង សម្រាប់ប្រជាពលរដ្ឋនៅក្នុងខេត្តភូមិភាគឦសាន។
ការអនុម័តនេះ ធ្វើឡើងក្នុងកិច្ចប្រជុំលើកទី៦ របស់ក្រុមការងារជំរុញការវិនិយោគក្នុងភូមិភាគឦសាន ដែលដឹកនាំដោយ ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាផ្ទាល់សម្តេចមហាបវរធិបតីនាយករដ្ឋមន្ត្រី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារ កាលពីព្រឹកថ្ងៃទី២៨ ខែកក្កដា ឆ្នាំ២០២៦។
គម្រោងវិនិយោគទាំងបីរួមមាន ការដាំដុះដើមកាហ្វេ និងកាកាវ ការចិញ្ចឹមសត្វចម្រុះ និងសត្តឃាតដ្ឋាន ព្រមទាំងការបង្កើតរោងចក្រកែច្នៃផលិតផលកសិកម្ម។ គម្រោងទាំងនេះត្រូវបានរំពឹងថានឹងជួយពង្រឹងខ្សែច្រវាក់តម្លៃវិស័យកសិកម្ម បង្កើនការកែច្នៃក្នុងស្រុក និងជំរុញការអភិវឌ្ឍសេដ្ឋកិច្ចនៅភូមិភាគឦសាន។
ថ្លែងក្នុងកិច្ចប្រជុំ ឯកឧត្តមបណ្ឌិតសភាចារ្យ ហ៊ាន សាហ៊ីប បានលើកឡើងថា ទោះបីស្ថានភាពសេដ្ឋកិច្ចពិភពលោកនៅតែប្រឈមនឹងបញ្ហាប្រឈមជាច្រើនក៏ដោយ កម្ពុជានៅតែរក្សាបាននូវភាពទាក់ទាញសម្រាប់វិនិយោគិនជាតិ និងអន្តរជាតិ ដោយសារស្ថិរភាពនយោបាយ បរិយាកាសវិនិយោគល្អ និងការយកចិត្តទុកដាក់របស់រាជរដ្ឋាភិបាលក្នុងការគាំទ្រវិស័យឯកជន។
ឯកឧត្តមបានបញ្ជាក់ថា ក្នុងអំឡុងដំណើរទស្សនកិច្ចរបស់សម្តេចមហាបវរធិបតីនាយករដ្ឋមន្ត្រី ទៅកាន់ប្រទេសចិន ដើម្បីចូលរួមសន្និសីទពិភពលោកស្តីពីបញ្ញាសិប្បនិម្មិត (AI) កាលពីថ្ងៃទី១៥-១៧ ខែកក្កដា ឆ្នាំ២០២៦ ក្រុមហ៊ុនចិនធំៗជាច្រើនបានបង្ហាញចំណាប់អារម្មណ៍ និងបំណងពង្រីកការវិនិយោគបន្ថែមនៅកម្ពុជា ដែលឆ្លុះបញ្ចាំងពីទំនុកចិត្តរបស់វិនិយោគិនចំពោះសក្តានុពលសេដ្ឋកិច្ចកម្ពុជា។
ឯកឧត្តមបានអំពាវនាវឱ្យសមាជិកក្រុមការងារ និងស្ថាប័នពាក់ព័ន្ធ បន្តសម្របសម្រួលនីតិវិធីជូនវិនិយោគិនដោយបុរេសកម្ម និងមានប្រសិទ្ធភាព តាមរយៈការផ្តល់ការលើកទឹកចិត្ត និងការដោះស្រាយបញ្ហាជាកញ្ចប់ ស្របតាមអភិក្រម «ប្រព័ន្ធតួអង្គតែមួយ» ដើម្បីបង្កើនភាពងាយស្រួលក្នុងការធ្វើធុរកិច្ច និងពង្រឹងការប្រកួតប្រជែងរបស់កម្ពុជា។
ជាមួយគ្នានេះ ឯកឧត្តមក៏បានជំរុញឱ្យវិនិយោគិនអនុវត្តគម្រោងឱ្យបានត្រឹមត្រូវតាមផែនការដែលបានស្នើ ដោយផ្តោតលើការបង្កើតការងារ ការបណ្តុះបណ្តាល និងការផ្ទេរជំនាញដល់កម្មករក្នុងស្រុក ការប្រើប្រាស់បច្ចេកវិទ្យាទំនើប និងការកែច្នៃផលិតផលដែលមានតម្លៃបន្ថែមខ្ពស់ ដើម្បីរួមចំណែកជំរុញកំណើនសេដ្ឋកិច្ច និងការអភិវឌ្ឍប្រកបដោយចីរភាព។
កិច្ចប្រជុំក៏បានពិភាក្សាអំពីបញ្ហាប្រឈមមួយចំនួនពាក់ព័ន្ធនឹងការអនុវត្តគម្រោងវិនិយោគ និងវិធានការដោះស្រាយ ដោយតំណាងក្រសួង ស្ថាប័នពាក់ព័ន្ធ និងរដ្ឋបាលខេត្តទាំង៤ បានប្តេជ្ញាបន្តផ្តល់ការសម្របសម្រួលយ៉ាងរហ័ស មានតម្លាភាព និងប្រសិទ្ធភាព ដើម្បីទាក់ទាញការវិនិយោគកាន់តែច្រើនចូលទៅក្នុងភូមិភាគឦសាន។
គួរបញ្ជាក់ថា កម្មវិធីជំរុញការវិនិយោគក្នុងភូមិភាគឦសាន គឺជាគោលនយោបាយអាទិភាពមួយរបស់រាជរដ្ឋាភិបាល ក្នុងគោលបំណងទាក់ទាញវិនិយោគទៅកាន់ខេត្តភូមិភាគឦសានទាំង៤ តាមរយៈការផ្តល់ការលើកទឹកចិត្ត និងការសម្រួលនីតិវិធីវិនិយោគ ដើម្បីជំរុញការអភិវឌ្ឍសេដ្ឋកិច្ច បង្កើតការងារ និងលើកកម្ពស់ជីវភាពប្រជាពលរដ្ឋនៅក្នុងតំបន់៕
