ដោយ នៅ ស៊ីវុត្ថា
ភ្នំពេញ៖ កម្ពុជាបានចាប់ផ្តើមនាំចេញផលិតផលគ្រាប់ស្វាយចន្ទីទៅកាន់ទីផ្សារចក្រភពអង់គ្លេសជាលើកដំបូង តាមរយៈសហគ្រាសក្នុងស្រុកឈ្មោះ ហ៊ែនក្រាហ្វធីត ឃែស៊ូ ណាត់ ស្ទឹងត្រែង (Handcrafted Cashew Nuts Stung Treng) ដោយមានការគាំទ្រពីទីភ្នាក់ងារឥណទាននាំចេញរបស់រដ្ឋាភិបាលចក្រភពអង់គ្លេស (United Kingdom’s Export Finance) ដែលជាស្ថាប័នផ្តល់ការគាំទ្រផ្នែកហិរញ្ញវត្ថុ និងការធានាពាណិជ្ជកម្ម ដើម្បីជំរុញការនាំចេញ និងការវិនិយោគអន្តរជាតិ។
យោងតាមស្ថានទូតចក្រភពអង់គ្លេសប្រចាំកម្ពុជា នៅថ្ងៃទី២៨ ខែកក្កដា ឆ្នាំ២០២៦ បានឱ្យដឹងថា ការនាំចេញលើកដំបូងនេះ គឺជាសមិទ្ធផលដ៏គួរឱ្យមោទនភាពមួយនៃកិច្ចសហប្រតិបត្តិការពាណិជ្ជកម្មរវាងកម្ពុជា និងចក្រភពអង់គ្លេស។
ស្ថានទូតបានបញ្ជាក់ថា ការដឹកជញ្ជូនផលិតផលគ្រាប់ស្វាយចន្ទីរបស់សហគ្រាសក្នុងស្រុកឈ្មោះ ហ៊ែនក្រាហ្វធីត ឃែស៊ូ ណាត់ ស្ទឹងត្រែង ទៅកាន់ចក្រភពអង់គ្លេសសម្រាប់ឆ្នាំ២០២៦ បានចាប់ផ្តើមជាផ្លូវការហើយ។ ក្រោមការគាំទ្ររបស់ ទីភ្នាក់ងារឥណទាននាំចេញរបស់រដ្ឋាភិបាលចក្រភពអង់គ្លេស ដូច្នេះសហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង អាចពង្រីកការចូលទៅកាន់ទីផ្សារចក្រភពអង់គ្លេសដោយជោគជ័យ ដែលឆ្លុះបញ្ចាំងពីគុណភាព ស្តង់ដារ និងសក្ដានុពលនៃវិស័យកែច្នៃកសិផលរបស់កម្ពុជា។
ស្ថានទូតចក្រភពអង់គ្លេសក៏បានអបអរសាទរដល់ក្រុមការងាររបស់សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង និងបានបង្ហាញក្តីរំពឹងថា នឹងមានផលិតផលកម្ពុជាកាន់តែច្រើនបង្ហាញវត្តមាននៅលើធ្នើលក់ក្នុងហាងនានាទូទាំងចក្រភពអង់គ្លេសនាពេលខាងមុខ។
ជាមួយគ្នានេះ សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែងបានឱ្យដឹងថា ការដឹកជញ្ជូនផលិតផលលើកដំបូងទៅកាន់ចក្រភពអង់គ្លេសក្នុងឆ្នាំ២០២៦ ត្រូវបានផ្ទុកឡើងកុងតឺន័រដោយជោគជ័យ និងកំពុងធ្វើដំណើរឆ្ពោះទៅកាន់គោលដៅ។
ក្រុមហ៊ុនបានបញ្ជាក់ថា សមិទ្ធផលនេះ មិនមែនគ្រាន់តែជាការនាំចេញទំនិញមួយលើកប៉ុណ្ណោះទេ ប៉ុន្តែជាលទ្ធផលនៃការខិតខំប្រឹងប្រែង ការសហការជាក្រុម និងការប្តេជ្ញាចិត្តយ៉ាងមុតមាំក្នុងការរក្សាគុណភាពផលិតផល។ ក្រុមហ៊ុនក៏បានថ្លែងអំណរគុណដល់បុគ្គលិកទាំងអស់ ដែលបានរួមចំណែកធ្វើឱ្យសមិទ្ធផលនេះក្លាយជាការពិត។
សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង បានសង្កត់ធ្ងន់ថា ការនាំចេញលើកនេះ មិនត្រឹមតែនាំយកផលិតផលគ្រាប់ស្វាយចន្ទីកម្ពុជាដែលមានគុណភាពខ្ពស់ទៅកាន់ទីផ្សារអន្តរជាតិប៉ុណ្ណោះទេ ប៉ុន្តែថែមទាំងផ្សព្វផ្សាយពីស្នាដៃ មោទនភាព និងសក្ដានុពលរបស់កម្ពុជាទៅកាន់ពិភពលោកផងដែរ។ ក្រុមហ៊ុនបានអះអាងថា នេះគ្រាន់តែជាការចាប់ផ្តើម ហើយនឹងបន្តពង្រីកទីផ្សារ និងលើកកម្ពស់តម្លៃបន្ថែមសម្រាប់ផលិតផលស្វាយចន្ទីកម្ពុជា។
ទោះជាជាយ៉ាងណា ក្រុមហ៊ុនមិនទាន់បញ្ជាក់ពីចំនួន ប៉ុន្មានក្នុងការនាំចេញនៅពេលនេះ នៅឡើយទេ ។
ជុំវិញការនាំចេញនេះ លោក អួន ស៊ីឡុត ប្រធានសមាគមស្វាយចន្ទីកម្ពុជា បានស្វាគមន៍ចំពោះការដឹកជញ្ជូនផលិតផលស្វាយចន្ទីរបស់សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង ទៅកាន់ទីផ្សារចក្រភពអង់គ្លេស ដោយចាត់ទុកថា ជាដំណឹងដ៏ល្អ និងជាមោទនភាពសម្រាប់វិស័យស្វាយចន្ទីកម្ពុជា។
លោកបានបញ្ជាក់ថា ការនាំផលិតផលកែច្នៃរបស់កម្ពុជាចូលទៅកាន់ទីផ្សារអឺរ៉ុប មិនមែនជារឿងងាយស្រួលនោះទេ ដោយសារតម្រូវការស្តង់ដារគុណភាព និងសុវត្ថិភាពស្បៀងអាហារមានភាពតឹងរ៉ឹង។ ដូច្នេះ ការណ៍ដែលសហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង អាចនាំផលិតផលទៅដល់ទីផ្សារចក្រភពអង់គ្លេសបាន គឺជាជំហានដ៏សំខាន់មួយក្នុងការលើកកម្ពស់តម្លៃបន្ថែម និងកេរ្តិ៍ឈ្មោះផលិតផលស្វាយចន្ទីកម្ពុជានៅលើទីផ្សារអន្តរជាតិ។
ការនាំចេញលើកដំបូងនេះ កើតឡើងស្របពេលដែលវិស័យស្វាយចន្ទីកម្ពុជាកំពុងបន្តកំណើនទាំងផលិតកម្ម និងការនាំចេញ។ យោងតាមសមាគមស្វាយចន្ទីកម្ពុជា នៅថ្ងៃទី១៦ ខែកក្កដា ឆ្នាំ២០២៦ ចាប់ពីខែមករា ដល់ខែមិថុនា ឆ្នាំ២០២៦ កម្ពុជាបាននាំចេញគ្រាប់ស្វាយចន្ទីឆៅទៅកាន់ទីផ្សារអន្តរជាតិជាង ១,០៣០,០០០តោន ដែលមានតម្លៃប្រមាណ ១.៧៥១ពាន់លានដុល្លារ កើនឡើង ២៨.៩ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥។
ស្វាយចន្ទី គឺជាដំណាំអាទិភាពមួយដែលរាជរដ្ឋាភិបាលកម្ពុជាបានកំណត់ក្នុងគោលនយោបាយអភិវឌ្ឍវិស័យកសិកម្ម ដើម្បីជំរុញការធ្វើពិពិធកម្មសេដ្ឋកិច្ច បង្កើនតម្លៃបន្ថែមនៃផលិតផលកសិកម្ម និងពង្រឹងការនាំចេញ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។
យោងតាមឯកសារ «តំបន់ដាំដុះដំណាំស្វាយចន្ទីនៅកម្ពុជាឆ្នាំ២០២៤» កម្ពុជា មានផ្ទៃដីដាំដុះស្វាយចន្ទីសរុប ៥៨០,១១៧ហិកតា និងមានសក្ដានុពលផលិតកម្មប្រមាណ ៨១៦,៤៥៩តោន ក្នុងមួយឆ្នាំ ដែលធ្វើឱ្យកម្ពុជាស្ថិតក្នុងចំណោមប្រទេសផលិតគ្រាប់ស្វាយចន្ទីធំជាងគេទាំងបីរបស់ពិភពលោក។
សូមជម្រាបថា នៅឆ្នាំ២០២៥ កម្ពុជាបាននាំចេញគ្រាប់ស្វាយចន្ទីឆៅប្រមាណ ១លានតោន ទៅកាន់ទីផ្សារអន្តរជាតិ មានតម្លៃប្រមាណ ១.៥ពាន់លានដុល្លារ កើនឡើង ២៧ភាគរយ បើធៀបនឹងឆ្នាំ២០២៤។ ទិន្នន័យនេះបង្ហាញថា វិស័យស្វាយចន្ទីកម្ពុជាកំពុងរក្សាកំណើនជាបន្តបន្ទាប់ និងមានសក្ដានុពលកាន់តែខ្លាំងក្នុងការពង្រីកការនាំចេញផលិតផលកែច្នៃទៅកាន់ទីផ្សារដែលមានតម្លៃខ្ពស់ ដូចជាចក្រភពអង់គ្លេស និងបណ្តាប្រទេសនៅអឺរ៉ុប៕
