បង់ហ្កាលូរូ៖ ពីរឆ្នាំបន្ទាប់ពីផលិតផលមានគុណភាពសម្រាប់នាំចេញរបស់ឥណ្ឌាត្រូវបានបដិសេធ មិនឱ្យនាំចូលទីផ្សារតាមបណ្តាប្រទេសជាសហភាពអឺរ៉ុប ជុំវិញថ្នាំពុលសម្លាប់សត្វល្អិត និងមានលោហៈធ្ងន់ បណ្ដុំទិន្នន័យថ្មីមួយបានបង្ហាញថា អាជ្ញាធរឥណ្ឌាមិនបានចាត់វិធានការណាមួយ ដើម្បីទប់ស្កាត់ការប្រើប្រាស់ថ្នាំសម្លាប់សត្វល្អិតបង្កជំងឺមហារីកឡើយ។
សរុបទៅផលិតផលកសិកម្មនាំចូលពីប្រទេសឥណ្ឌាជិត៣៧០មុខ ត្រូវបានសមាជិកសហភាពអឺរ៉ុបទាំង២៧ប្រទេសរកឃើញថា មានផ្ទុកសារធាតុគីមីហាមឃាត់។
ការវិភាគទិន្នន័យពីអាជ្ញាធរសុវត្ថិភាពចំណីអាហារអឺរ៉ុប គណៈកម្មការសហភាពអឺរ៉ុប បានបង្ហាញថា ផលិតផលជាង៤៥០ត្រូវបានបដិសេធមិនឱ្យនាំចូល ឬដាក់តាំងលក់ នៅចន្លោះថ្ងៃទី១ ខែឧសភា ឆ្នាំ២០២៤ និងថ្ងៃទី៣០ ខែឧសភា ឆ្នាំ២០២៦។ ចំណែកផលិតផលចំនួន៣៦៥មុខ ត្រូវបានបដិសេធដោយសារមានសំណល់ថ្នាំសម្លាប់សត្វល្អិតលើសកម្រិត និងមានលោហធាតុធ្ងន់ ក្នុងនោះប្រហែល៥០មុខ ត្រូវបានបដិសេធដោយសារមានផ្ទុកសារធាតុគីមី អាចបង្កជំងឺមហារីក ដូចជាសារធាតុ សាល់ម៉ូណេឡា (Salmonella) អាហ្វ្លាតុក្ស៊ីន ប៊ី១ (Aflatoxin B1) និងអាក្រាតុក្ស៊ីន អេ (Ochratoxin A)។
រីឯផលិតផលជាច្រើនទៀត ត្រូវបានបដិសេធមិនឱ្យនាំចូល ពាក់ព័ន្ធនឹងការបំពុលបរិស្ថានតាមរយៈសារធាតុពុលនៅក្នុងប្រេងរ៉ែ។
ចំពោះជី និងគ្រឿងទេស ផ្លែឈើ និងបន្លែ គ្រាប់ធញ្ញជាតិ ផលិតផលធ្វើដំណាប់ និងគ្រាប់ធញ្ញជាតិ ផលិតផលនំប៉័ង និងអាហារបំប៉ន គឺផលិតផលភាគច្រើន ដែលត្រូវបានហាមឃាត់ផងដែរ។
សារធាតុគីមី គ្លរពីរីហ្វូស (Chlorpyrifos) គឺជាថ្នាំសម្លាប់សត្វល្អិត ដែលត្រូវបានហាមឃាត់ដោយ៤៤ប្រទេស ព្រោះតែវាជាប្រភេទសារធាតុ ហ្សេណូតុក្ស៊ិក (Genotoxic) កាសីណូតុក្ស៊ិក (Carcinogenic) និងសារធាតុ ណឺរ៉ូតុក្ស៊ិក (Neurotoxic) ដែលសារធាតុគីមីបំពុលហ្សែន ត្រូវបានរកឃើញនៅក្នុងផលិតផលប្រហែល១៣៥មុខ និងសារធាតុ អេទីឡែន អុក្ស៊ីដ (Ethylene Oxide) ត្រូវបានរកឃើញនៅក្នុងផលិតផលចំនួន៤០មុខ ទោះបីជាថ្នាំសម្លាប់សត្វល្អិតទាំងនេះមិនត្រូវបានចុះបញ្ជីនៅក្នុងប្រទេសឥណ្ឌាក៏ដោយ។ សារធាតុគីមីខាងលើងនេះនឹងបង្កឱ្យជំងឺមហារីកឈាម និងសុដន់ បញ្ហាសរសៃប្រសាទ និងគ្រោះថ្នាក់សុខភាពផ្សេងទៀត។ ចំណែកសារធាតុគីមីឈ្មោះ កាត់មីញ៉ូម (Cadmium) ក៏ត្រូវបានរកឃើញនៅក្នុងផលិតផលមួយចំនួនផងដែរ។
សំណល់ថ្នាំសម្លាប់សត្វល្អិត និងសារធាតុគីមីផ្សេងទៀត ដែលរកឃើញនៅក្នុងវត្ថុធាតុផ្សេងៗ។ ឧទាហរណ៍ ការធ្វើតេស្តលើ ឫសអាសវគន្ធា (Organic Ashwagandha Root) ត្រូវបានអាជ្ញាធរអេស្ប៉ាញរកឃើញថា មានសំណល់ថ្នាំសម្លាប់សត្វល្អិត ស៊ីពើមេទ្រីន (Cypermethrin) ដែលត្រូវបានដាក់ឱ្យដំណើរការឡើងវិញ មានកម្រិតនៅក្នុងសហភាពអឺរ៉ុប បានក្លាយជាភាពចម្រូងចម្រាស រួមជាមួយនឹងសារធាតុក្លរពីរីហ្វូស ថែមទៀត។
រដ្ឋាភិបាលឥណ្ឌា បានរឹតបន្តឹងការប្រើប្រាស់ថ្នាំទ្រីស៊ីក្លាហ្សូល (Tricyclazole) ដែលត្រូវបានហាមឃាត់នៅក្នុងសហភាពអឺរ៉ុប ដោយសារវាបង្កប៉ះពាល់រយៈពេលវែង ក៏ត្រូវបានរកឃើញនៅក្នុងផលិតផលចំនួន៥៣មុខ ភាគច្រើនរកឃើញនៅក្នុងអង្កររបស់ឥណ្ឌា។
អ្នកជំនាញគោលនយោបាយសាធារណៈរបស់ឥណ្ឌា បាននិយាយថា ការបដិសេធនេះបង្ហាញពីកង្វះគណនេយ្យភាព។ រដ្ឋាភិបាលឥណ្ឌាមិនស៊ើបអង្កេតកន្លែងសង្ស័យមានការបំពុលនោះទេ។ រាល់ពេលមានបញ្ហាកើតឡើង គេចាប់ផ្តើមបន្ទោសគ្នាទៅវិញទៅមក ដែលទីបំផុតគេស្តីបន្ទោសលើកសិករ។ ទោះជាយ៉ាងណាក៏ដោយ កសិករមិនប្រើថ្នាំសម្លាប់សត្វល្អិតដូចជាប្រភេទអេទីឡែនអុកស៊ីតទេ។ ឥណ្ឌាមិនមានប្រព័ន្ធ ដែលផលិតផលត្រូវបានត្រួតពិនិត្យនៅគ្រប់ដំណាក់កាលនោះទេ។
អ្នកជំនាញនៃបណ្តាញសកម្មភាពថ្នាំសម្លាប់សត្វល្អិតឥណ្ឌា បានកត់សម្គាល់ថា ប្រទេសឥណ្ឌាស្ថិតក្នុងចំណោមប្រទេសមួយចំនួនតូច ដែលប្រឆាំងនឹងបម្រាមហាមឃាត់សារធាតុគ្លរពីរីហ្វុស ដែលស្នើឡើងដោយអនុសញ្ញា ស្តីពីសារធាតុពុលសរីរាង្គមិនទៀងទាត់។
នៅឆ្នាំ២០២០ រដ្ឋាភិបាលបានចេញសេចក្តីជូនដំណឹងព្រាងមួយដែលស្នើឱ្យហាមឃាត់ថ្នាំសម្លាប់សត្វល្អិតពុលចំនួន២៧ប្រភេទ រួមទាំងគ្លរពីរីហ្វូស ផងដែរ។ ប៉ុន្តែមិនយូរប៉ុន្មាន វាបានធ្វើឱ្យមានការថយចុះជាច្រើន។ ឥឡូវនេះ ថ្នាំសម្លាប់សត្វល្អិតដែលទទួលបានការលើកលែង កំពុងធ្វើឱ្យកសិករឥណ្ឌាខាតបង់។
គួររំលឹកថា កាលពីថ្ងៃទី២៤ ខែមេសា ឆ្នាំ២០២៤ សហភាពអឺរ៉ុបបានបដិសេធ ឬដកចេញពីទីផ្សារនូវផលិតផលឥណ្ឌាចំនួន៥២៧មុខ ដោយសារមានផ្ទុកអេទីឡែនអុកស៊ីត និងសារធាតុពុលផ្សេងទៀត។ នៅពេលនោះ មជ្ឈមណ្ឌលបានសន្យាថា នឹងចាត់វិធានការត្រួតពិនិត្យគុណភាពឱ្យបានច្បាស់លាស់៕ (ផាន់ អាណា)
