ដោយ អៀវ ឈៀងនី
ត្បូងឃ្មុំ៖ អាជីវករលក់ខ្ទឹមនៅផ្សារសួង ខេត្តត្បូងឃ្មុំ បានអះអាងប្រាប់ទូរទស្សន៍ ARDB ថា តម្លៃខ្ទឹមស្លឹក មានការប្រែប្រួលឡើងចុះទៅតាមរដូវកាល និងតម្រូវការទីផ្សារ ហើយមានតម្លៃខ្ពស់នៅក្នុងរដូវវស្សា ព្រោះពិបាកដាំដុះ។
អ្នកស្រី អ៊ុន លឿន គឺជាអាជីវករ ដែលទិញខ្ទឹមស្លឹកពីកសិករ ដើម្បីយកទៅលក់បន្តនៅផ្សារសួង នៃខេត្តត្បូងឃ្មុំ បានរៀបរាប់ថា កាលពីចាប់ផ្តើមដំបូង អ្នកស្រីបានជិះម៉ូតូដើរស្វែងរកម៉ូយដោយផ្ទាល់ ដោយសារឃើញអ្នកភូមិដាំខ្ទឹមច្រើន ហើយមានគេមកទិញស្រាប់ អ្នកស្រីក៏សម្រេចចិត្តដើររកម៉ូយទិញបន្ត។
សព្វថ្ងៃនេះ អ្នកស្រីរស់នៅភូមិគោកស្រុក ឃុំគោកស្រុក ស្រុកដំបែ ខេត្តត្បូងឃ្មុំ បានប្រាប់ពីស្ថានភាពតម្លៃ និងរដូវកាលប្រមូលផលដំណាំ ក៏ដូចជាការប្រើដើមទុន និងប្រាក់ចំណេញបច្ចុប្បន្នថា អ្នកស្រីអាចរកចំណូលបាន ក្នុងរង្វង់ពីរសែនរៀល ក្នុងមួយថ្ងៃ ពីការលក់ស្លឹកខ្ទឹម។ រដូវកាលដែលសំបូរខ្ទឹមស្លឹក គឺនៅចំខែត្រជាក់ ឬខែធ្លាក់ខ្យល់ និងខែប្រាំង រវាងខែមិនា និងខែមេសា។ ហើយនៅរដូវកាលខ្សត់ខ្ទឹមវិញ គឺនៅរដូវវស្សា ដែលមានភ្លៀងធ្លាក់ច្រើន ទឹកភ្លៀងធ្វើឱ្យខ្ទឹមរលួយខូច និងជ្រុះស្លឹកច្រើន ជាហេតុនាំឱ្យខ្ទឹមខ្សត់ និងមានតម្លៃថ្លៃ។
អ្នកស្រី អ៊ុន លឿន បានមានប្រសាសន៍ថា ស្ថានភាពតម្លៃខ្ទឹមស្លឹកមានការប្រែប្រួលឡើងចុះទៅតាមរដូវកាល និងតម្រូវការទីផ្សារ ដោយតម្លៃបច្ចុប្បន្ន ក្នុងខែកក្កដា ឆ្នាំ២០២៦នេះ ថ្លៃខ្ទឹមស្លឹកមានការកើនឡើងចន្លោះពី៣ ៨០០រៀល ទៅ៤ ០០០រៀល ក្នុងមួយគីឡូក្រាម ដោយទិញពីកសិករ ហើយលក់ចេញវិញ ក្នុងតម្លៃ៤ ២០០ ទៅ ៤ ៣០០រៀល។ អ្នកស្រីយល់ថា តម្លៃចន្លោះពី៣ ០០០រៀល ទៅ៤ ០០០រៀល ក្នុងមួយគីឡូក្រាម គឺជាតម្លៃសមរម្យមួយ ដែលអាចឱ្យកសិករទប់ទល់នឹងថ្លៃជី ថ្នាំ និងកម្លាំងពលកម្ម ហើយទទួលបានប្រាក់ចំណេញគួរសម។
បើតាមការលើកឡើងរបស់អ្នកស្រី បរិមាណខ្លឹមសឹ្លក ដែលអ្នកស្រីលក់ដំបូងមានប្រមាណ៩០គីឡូក្រាមក្នុងមួយថ្ងៃ។ ហើយបច្ចុប្បន្ន សម្រាប់ការប្រមូលទិញខ្ទឹមបានប្រមាណមួយតោន អ្នកស្រីត្រូវចំណាយដើមទុនជាងបួនលានរៀល ដោយទទួលបានប្រាក់ចំណេញសុទ្ធប្រហែលពីរសែនរៀល ក្នុងមួយថ្ងៃ បន្ទាប់ពីដកការចំណាយផ្សេងៗ។ ចំពោះការប្រៀបធៀបឆ្នាំមុន និងឆ្នាំនេះ អ្នកស្រីបានឱ្យដឹងថា តម្លៃខ្ទឹមមានកម្រិតប្រហាក់ប្រហែលគ្នា ប៉ុន្តែឆ្នាំមុនធ្លាប់ឡើងថ្លៃខ្លាំងរហូតដល់៦ ០០០ រៀលក្នុងមួយគីឡូក្រាម។
គួរបញ្ជាក់ថា បើតាមលោក ទេន ទុំ ប្រធានសហគមន៍កសិកម្មបៃតងគោកស្រុកនៃខេត្តត្បូងឃ្មុំ បានឱ្យដឹងថា ក្នុងសហគមន៍របស់លោកមានផ្ទៃដីដាំខ្ទឹមសរុបចំនួន៦៤ហិកតា ជាមួយសមាជិកចំនួន៧០គ្រួសារ អាចប្រមូលផល បានចន្លោះពីប្រាំតោន ទៅ១០តោន។ លោកថា បច្ចុប្បន្ននេះ សហគមន៍របស់លោកបានជួយប្រជាកសិករដោយផ្តោតទៅលើវគ្គបណ្តុះបណ្តាលបច្ចេកទេសជាច្រើនអំពីដំណាំខ្ទឹម ដូចជារបៀបតាមដានមើលសត្វល្អិត និងជំងឺ ព្រមទាំងកម្ចាត់សត្វល្អិតជាដើម៕
