ដោយ អៀវ ឈៀងនី
ភ្នំពេញ៖ នៅឆ្នាំ២០២៦នេះ គ្រោះរំាងស្ងួត បានបង្កផលប៉ះពាល់ដល់ខេត្តចំនួនបួន នៅប្រទេសកម្ពុជា គឺខេត្តកំពង់ធំ បន្ទាយមានជ័យ សៀមរាប និងខេត្តបាត់ដំបង ធ្វើឱ្យខ្វះទឹកស្រោចស្រពដំណាំ សម្រាប់មនុស្ស និងសត្វប្រើប្រាស់់ ព្រោះពុំមានភ្លៀងធ្លាក់គ្រប់គ្រាន់។
ការប្រែប្រួលអាកាសធាតុនេះ ធ្វើឱ្យស៊ីតុណ្ហភាពក្តៅ ភ្លៀងតិច និងខ្យល់ ហើយក៏បានបង្កផលប៉ះពាល់ដល់ការដាំដុះបន្លែក្នុងផ្ទះសំណាញ់ផងដែរ ជាពិសេសនៅក្នុងសហគមកសិកម្មតាសីសាមគ្គីនៃស្រុកថ្មគោលខេត្តបាត់ដំបង។
ទោះជាយ៉ាងណា អនុប្រធានសហគមន៍កសិកម្មតាសីសាមគ្គី លោក សោម ចន្ថា បានអះអាងប្រាប់ទូរទស្សន៍អនឡាញ ARDB ថា ការដាំដុះនៅតែដំណើរការជាធម្មតា ដោយលោកបានប្រើបច្ចេកទេសទប់ទលនិងកម្តៅ ប៉ុន្តែតម្លៃបន្លែនៅឆ្នាំនេះ ហាក់បីដូចជាធ្លាក់ថ្លៃជាងរាល់ឆ្នាំ គឺស្ថិតនៅចន្លោះពី១ ០០០ ទៅ១ ២០០ រៀលប៉ុណ្ណោះ មិនបាន២ ០០០ ទៅ៣ ០០០ រៀលដូចមុននោះទេ។
លោក សោម ចន្លា បានប្រាប់បន្តថា ដើម្បីទប់ទល់នឹងកម្តៅ លោកបានប្រើប្រាស់ស្បៃខ្មៅមកបាំងការពារ ដោយកន្លែងខ្លះបាំងមួយជាន់ និងកន្លែងខ្លះទៀតបាំងរហូតដល់ពីរជាន់។ តែទោះជាយ៉ាងណា ដោយសារអាកាសធាតុក្តៅខ្លាំងពេក ផលដំណាំបន្លែនាពេលបច្ចុប្បន្នហាក់មិនសូវល្អដូចកាលពីមុនឡើយ។ បច្ចុប្បន្នផ្ទះសំណាញ់ ឬរោងដាំដុះ មានចំនួនសរុប១៥ខ្នង ដែលមានទំហំខុសៗគ្នា រួមមាន រោងទទទឹង១០ម៉ែត្រ បណ្តោយ៥០ម៉ែត្រ ចំនួនពិរខ្នង, រោងទំហំទទឹង១០ បណ្តោយ៤៥ម៉ែត្រ ចំនួនពីរខ្នង, រោងទំហំទទឹង១០ ម៉ែត្រ បណ្ដោយ៣៧ម៉ែត្រ ចំនួនបីខ្នង និងរោងទំហំទទឹង១០ បណ្ដោយ២៥ម៉ែត្រ ចំនួនប្រាំបីខ្នង។
លោកបានមានប្រសាសន៍ថា “មកទល់បច្ចុប្បន្ន ផ្ទះសំណាញ់របស់ខ្ញុំមានចំនួន១៥ខ្នង។ ដូច្នេះ ផលប៉ះពាល់មានដែរ តែមានតិចតួច ដោយសារអាកាសធាតុក្តៅ ភ្លៀងតិច មានខ្យល់។ ផលប៉ះពាល់តិចតួចដែរ មិនប៉ះពាល់ខ្លាំងទេ ការប្រែប្រួលអាកាសធាតុហ្នឹងណា។ ដោយសារយើងមានវិធានការការពារ ដូចជាក្តៅ យើងបាំងស្បៃខ្មៅ ហើយមានកន្លែងខ្លះយើងបាំងពីរជាន់ មានកន្លែងខ្លះបាំងមួយជាន់។ ហើយយើងដាំបន្លែ ពីមុនមកវាល្អ ដល់ពេលឥឡូវវាអត់សូវល្អ ដោយសារវាក្តៅពេក”។
លោក សោម ចន្ថា បានបន្តថា ផលិតផលបន្លែទាំងអស់របស់សហគមន៍កសិកម្មតាសីសាមគ្គី ត្រូវបាននាំយកទៅលក់ និងចែកចាយនៅលើទីផ្សារចំនួនពីរ គឺផ្សារភូពុយ នៅខេត្តបាត់ដំបង និងផ្សារបន្ទាយមានជ័យ។ ចំពោះការចែកចាយទៅកាន់តំបន់ប៉ោយប៉ែត គឺត្រូវបានអាក់ខាន ឬមិនទាន់បានចេញទៅទៀតនោះទេ ដោយសារតែស្ថានភាពនៅទីនោះមិនទាន់មានស្ថេរភាព។
គួរបញ្ជាក់ថា ការប្រែប្រួលអាកាសធាតុ និងបាតុភូតអែលនីញ៉ូ មិនមែនជាបញ្ហាបរិស្ថានដាច់ដោយឡែកនោះទេ ប៉ុន្តែវាជាវិបត្តិដ៏ស៊ីជម្រៅ។ ភាពរាំងស្ងួតក្តៅហែងផង និងទឹកជំនន់ជន់លិចផង ដែលកើតឡើងក្នុងពេលដំណាលគ្នានៅតាមតំបន់ផ្សេងៗគ្នា គឺជាសញ្ញាមួយបង្ហាញថា វិស័យកសិកម្មកម្ពុជា ត្រូវការជាចាំបាច់នូវប្រព័ន្ធធារាសាស្ត្រវៃឆ្លាត យន្តការធានាតម្លៃកសិផលលើទីផ្សារ និងការជួយជ្រោមជ្រែងបច្ចេកទេស ដើម្បីជួយឱ្យកសិករ អាចរស់រានមានជីវិតប្រកបដោយចិរភាពក្នុងយុគសម័យនៃការប្រែប្រួលអាកាសធាតុនេះ៕
