ហាណូយ៖ ក្រុមអ្នកឧតុនិយមវៀតណាម បានព្រមានថា ព្រឹត្តិការណ៍ បាតុភូតអែលនីញ៉ូដ៏កំណាច អាចបង្កឱ្យសីតុណ្ហភាពក្តៅខ្លាំង កាត់បន្ថយភ្លៀងធ្លាក់ និងធ្វើឱ្យអាកាសធាតុឡើងកម្តៅខ្ពស់នៅតាមតំបន់ជាច្រើនក្នុងប្រទេសវៀតណាម។
បាតុភូតអែលនីញ៉ូ បានកើតឡើងយ៉ាងពិតប្រាកដ ហើយត្រូវបានគេព្យាករណ៍ថា នឹងបង្កើនឥទ្ធពលបន្ថែមទៀត នៅក្នុងរយៈប៉ុន្មានខែខាងមុខនេះ។ ស្ថានភាពបែបនេះ ធ្វើឱ្យប្រទេសវៀតណាមប្រឈមមុខនឹងការថយចុះនៃកម្រិតរបបភ្លៀងធ្លាក់ ជួបគ្រោះរាំងស្ងួតធ្ងន់ធ្ងរ និងការជ្រៀតចូលទឹកប្រៃមកក្នុងតំបន់ទឹកសាបកាន់តែច្រើន ហើយក៏បង្កឱ្យមានព្យុះសង្ឃរា ភ្លៀងធ្លាក់ខ្លាំង និងបង្កគ្រោះទឹកជំនន់យ៉ាងគំហុកតែម្តង។
លោក ដាង ថាញ់ម៉ៃ (Dang Thanh Mai) អគ្គនាយករងនៃនាយកដ្ឋានឧតុនិយម និងជលសាស្ត្រ វៀតណាម បាននិយាយកាលពីពេលថ្មីនេះថា ទាំងគំរូព្យាករណ៍ក្នុងស្រុក និងគំរូព្យាករណ៍អន្តរជាតិ ពិតជាបង្ហាញថា បាតុភូតអែលនីញ៉ូ កំពុងបន្កើនឥទ្ធិចាប់ពីខែមិថុនា ឆ្នាំ២០២៦ និងកាន់តែខ្លាំងឡើងៗ ក្នុងអំឡុងឆមាសទី២ ហើយអាចបន្តអូសបន្លាយរហូតដល់ដើមឆ្នាំ២០២៧។
ជាការកត់សម្គាល់ លទ្ធភាពនៃការកើតមានបាតុភូតអែលនីញ៉ូ គឺកាន់ច្បាស់ឡើងៗ ដោយបច្ចុប្បន្នត្រូវបានប៉ាន់ប្រមាណថា អាចកើតមានពី៦០ ទៅ៦៥ភាគរយ បើប្រៀបធៀបទៅនឹងបាតុភូតអែលនីញ៉ូ ក្នុងឆ្នាំ២០១៥-២០១៦ និងអាចជាប់ចំណាត់ថ្នាក់ក្នុងចំណោមព្រឹត្តិការណ៍បាតុភូតអែលនីញ៉ូដ៏ខ្លាំងបំផុត ក្នុងកំណត់ត្រាប្រវត្តិសាស្ត្រពិភពលោក ចាប់តាំងពីឆ្នាំ១៩៥០។
យោងតាមលោក ដាង ថាញ់ម៉ៃ បានឱ្យដឹងទៀតថា ប្រសិនបើសេណារីយ៉ូនេះលេចចេញជារូបរាងពិតប្រាកដ សីតុណ្ហភាពជាមធ្យមនៅទូទាំងប្រទេសវៀតណាម អាចកើនឡើងពី០.៥ ទៅ១,៥អង្សាសេ លើសពីមធ្យមភាគរយៈពេលវែង ព្រមទាំងអាចកើនឡើងពីមួយ ទៅពីរអង្សាសេ នៅចុងឆ្នាំ២០២៦នេះ។ ចំណែកកម្រិតរបបទឹកភ្លៀងវិញ អាចថយចុះពី២៥ ដល់៥០ភាគរយ ជាពិសេសនៅទូទាំងប្រទេសវៀតណាមភាគកណ្តាល តំបន់ខ្ពង់រាបភាគកណ្តាល និងនៅភាគខាងត្បូង។
លោកបានបញ្ជាក់បន្ថែមថា “ជាលទ្ធផល ហានិភ័យនៃគ្រោះរាំងស្ងួត កង្វះទឹក និងការជ្រៀតចូលទឹកប្រៃនឹងកើនឡើងនៅក្នុងតំបន់ជាច្រើន។”
ចំណែកលោក ម៉ៃ វ៉ាន់ឃៀម (Mai Van Khiem) ប្រធានមជ្ឈមណ្ឌលជាតិសម្រាប់ការព្យាករណ៍ឧតុនិយម បានបន្ថែមថា ភ្នាក់ងារឧតុនិយមធំៗភាគច្រើននៅទូទាំងពិភពលោក ឥឡូវនេះបានបញ្ជាក់យ៉ាងច្បាស់អំពីការលេចឡើងនូវបាតុភូតអែលនីញ៉ូ។ នៅប្រទេសវៀតណាម ព្រឹត្តិបត្រអាកាសធាតុតាមរដូវ ដែលបានចេញផ្សាយ នៅថ្ងៃទី១៥ ខែមិថុនា ឆ្នាំ២០២៦ ក៏បានទទួលស្គាល់ជាផ្លូវការនូវបាតុភូតនេះផងដែរ។
យោងតាមអ្នកឧតុនិយមរូបនេះ លទ្ធភាពនៃបាតុភូតអែលនីញ៉ូ ដ៏ខ្លាំងបាននិងកំពុងកើនឥទ្ធពលយ៉ាងឆាប់រហ័ស ស្របពេលការព្យាករណ៍ក្នុងខែមេសា បានបញ្ជាក់ពីលទ្ធភាពកើតមានបាតុភូតនេះ ប្រហែល២០ភាគរយប៉ុណ្ណោះ ប៉ុន្តែបានកើនឡើងរហូតដល់៥៧ភាគរយ ក្នុងខែឧសភា និងឈានដល់ពី៦៥ ទៅ៦៦ភាគរយ ក្នុងការធ្វើបច្ចុប្បន្នភាព ក្នុងខែមិថុនា ឆ្នាំ២០២៦នេះ។
លោក ម៉ៃ វ៉ាន់ឃៀម បានមានប្រសាសន៍ថា “និន្នាការបច្ចុប្បន្នបង្ហាញពីលទ្ធភាពខ្ពស់ ដែលបាតុភូតអែលនីញ៉ូនឹងឈានដល់កម្រិតស្រដៀងគ្នានឹងព្រឹត្តិការណ៍ ឆ្នាំ២០១៥-២០១៦ ហើយលទ្ធភាពកើតបាតុភូតនេះ គឺកាន់តែច្បាស់ឡើង មិនអាចបដិសេធបានឡើយ។”
សូមរំឭកថា កាលពីឆ្នាំ២០១៥-២០១៦ បាតុភូតអែលនីញ៉ូ បានធ្វើឱ្យមានរលកកម្តៅរយៈពេលវែង បង្កជាគ្រោះរាំងស្ងួតធ្ងន់ធ្ងរ និងនាំឱ្យទឹកប្រៃជ្រៀតចូលក្នុងតំបន់ងអាងទឹកសាបជាច្រើនរបស់វៀតណាម ជាពិសេសនៅឆ្នេរសមុទ្រភាគខាងត្បូង តំបន់ខ្ពង់រាបកណ្តាល និងតំបន់ដីសណ្តទន្លេមេគង្គ។
យោងតាមការព្យាករណ៍ បានបង្ហាញថា ភ្លៀងធ្លាក់ក្នុងរដូវវស្សាឆ្នាំ២០២៦នេះ នៅតាមតំបន់ឆ្នេរភាគខាងជើង និងតំបន់ឆ្នេរកណ្តាលរបស់ប្រទេសវៀតណាម នឹងនៅតែទាបជាងមធ្យមភាគប្រចាំឆ្នាំ និងបង្កកង្វះខាតទឹកសម្រាប់ផលិតកម្មកសិកម្ម។
ទន្ទឹមនឹងនេះដែរ នៅតំបន់ខ្ពង់រាបកណ្តាល និងតំបន់ដីសណ្តទន្លេមេគង្គ ត្រូវគេរំពឹងថា នឹងស្ថិតក្នុងចំណោមតំបន់អាចត្រូវរងផលប៉ះពាល់ខ្លាំងបំផុតពីបាតុភូតអែលនីញ៉ូ ដោយប្រឈមខ្លាំងនឹងគ្រោះរាំងស្ងួត និងការជ្រៀតចូលនៃទឹកប្រៃពីសមុទ្រ។
ចំណែកលោក ម៉ៃ វ៉ាន់ឃៀម ប្រធានមជ្ឈមណ្ឌលជាតិសម្រាប់ការព្យាករណ៍ឧតុនិយម បានសម្គាល់ថា មេរៀនពី បាតុភូតអែលនីញ៉ូ ឆ្នាំ២០១៩-២០២០ បានបង្ហាញពីរបៀបនៃការព្រមាន និងការកែសម្រួលផែនការកសិកម្ម ដើម្បីជួយកាត់បន្ថយផលខូចខាតធ្ងន់ធ្ងរពេក។ ផ្លាស់ប្តូរកាលវិភាគដាំដុះ និងវដ្តដំណាំ អាចចៀសវាងបាននូវគ្រោះរាំងស្ងួតធ្ងន់ធ្ងរ និងមានរយៈពេលវែង។
នៅតំបន់ខ្ពង់រាបកណ្តាល រដូវប្រាំងឆ្នាំ២០២៦-២០២៧ ត្រូវបានគេរំពឹងថា នឹងស្ងួតហួតហែងខុសពីធម្មតា ដោយមានភ្លៀងធ្លាក់តិចតួច និងចុងរដូវវស្សា។ អាកាសធាតុបែបនេះអាចប៉ះពាល់ដោយផ្ទាល់ដល់ដំណាំសំខាន់ៗដូចជាកាហ្វេ និងម្រេច។ ដូច្នេះ អាជ្ញាធរវៀតណាមត្រូវបានជំរុញឱ្យបង្កើតផែនការរក្សាស្តុកទឹកឱ្យបានឆាប់ ដើម្បីធានាបាននូវការផ្គត់ផ្គង់ឱ្យបានគ្រប់គ្រាន់សម្រាប់ទាំងផលិតកម្ម និងការប្រើប្រាស់ប្រចាំថ្ងៃ។
ចំណុចសំខាន់មួយទៀត អ្នកជំនាញបាននិយាយថា បាតុភូតអែលនីញ៉ូ ជាធម្មតាកាត់បន្ថយចំនួនព្យុះ និងវិសម្ពាធត្រូពិច ដែលបង្កើតនៅសមុទ្រចិនខាងត្បូង បើធៀបនឹងមធ្យមភាគរយៈពេលវែង។ ទោះបីជាយ៉ាងណាក៏ដោយ នេះមិនមានន័យថាហានិភ័យគ្រោះមហន្តរាយនឹងថយចុះនោះទេ។
ចំណែកព្យុះសង្ឃរាដ៏កាចសាហាវ ដែលអាចបង្កការខូចខាតធ្ងន់ធ្ងរនៅ ក្នុងអំឡុងពេលមានបាតុភូតអែលនីញ៉ូ។ ព្រឹត្តិការណ៍អាកាសធាតុខ្លាំង ដូចជាមានភ្លៀងធ្លាក់ខ្លាំងតាមតំបន់មួយចំនួន បង្កជាទឹកជំនន់ភ្លាមៗ និងការរអិលបាក់ដីថែមទៀតផង៕
