ខេត្តកណ្តាល៖ ឯកឧត្តម ប៉ិច សានី អនុប្រធានក្រុមការងារចលនាយុវជនរបស់ក្រុមការងារគណបក្សចុះមូលដ្ឋានស្រុកខ្សាច់កណ្តាល និងជាតំណាងដ៏ខ្ពង់ខ្ពស់របស់ឯកឧត្តមបណ្ឌិត កៅ ថាច ប្រធានក្រុមការងារចលនាយុវជនគណបក្សប្រជាជនកម្ពុជា ស្រុកខ្សាច់កណ្តាល ខេត្តកណ្តាល បានជំរុញយុវជនឃុំពុកឫស្សីឱ្យប្រកាន់ខ្ជាប់នូវគោលការណ៍របស់គណបក្ស ពង្រឹងសាមគ្គីភាព និងឯកភាពផ្ទៃក្នុង ដើម្បីរួមចំណែកលើកកម្ពស់ប្រសិទ្ធភាពការងារនៅមូលដ្ឋាន និងបន្តថែរក្សាសមិទ្ធផលរបស់គណបក្ស និងរាជរដ្ឋាភិបាល។
ការជំរុញទឹកចិត្តរបស់ឯកឧត្តមត្រូវបានធ្វើឡើងក្នុងពេលបន្តអញ្ជេីញជាអធិបតីក្នុងពិធីបោះឆ្នោតជ្រើសរើសរចនាសម្ព័ន្ធថ្នាក់ដឹកនាំយុវជនគណបក្សប្រជាជនកម្ពុជា ឃុំពុកឫស្សី ស្រុកខ្សាច់កណ្តាល ខេត្តកណ្តាល នារសៀលថ្ងៃទី២១ ខែមិថុនា ឆ្នាំ២០២៦។
នៅក្នុងពិធីនេះ មានការអញ្ជេីញចូលរួមផ្តល់ចំណាប់អារម្មណ៍ពីឯកឧត្តម ឱម ម៉ាក់ធារិទ្ធ អនុប្រធានក្រុមការងារគណបក្សចុះមូលដ្ឋានឃុំពុកឫស្សី និងជាប្រធានក្រុមការងារចលនាយុវជនគណបក្សប្រជាជនកម្ពុជា ឃុំពុកឫស្សី ព្រមទាំងមានប្រសាសន៍សំណេះសំណាលបើក និងបិទកម្មវិធី ដោយឯកឧត្តម មាស សុខសេនសាន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានក្រុមការងារគណបក្សចុះមូលដ្ឋានស្រុកខ្សាច់កណ្តាល ទទួលបន្ទុកការងារគណបក្សចុះមូលដ្ឋានឃុំពុកឫស្សី។
ក្រុមការងារយុវជនគណបក្សស្រុក និងឃុំ គណៈអចិន្ត្រៃយ៍គណៈកម្មាធិការគណបក្សស្រុក គណៈកម្មាធិការគណបក្សឃុំ ប្រធានសាខាគណបក្សភូមិ និងសមាជិកយុវជនគណបក្ស សរុបជាង៣២០នាក់ គឺជាអង្គបោះឆ្នោត។
ឯកឧត្តម ប៉ិច សានី បានសម្តែងនូវសេចក្តីរីករាយ ដែលបានចូលរួមជាអធិបតីក្នុងពិធីបោះឆ្នោតជ្រើសរើសថ្នាក់ដឹកនាំយុវជនគណបក្សប្រជាជនកម្ពុជា ឃុំពុកឫស្សី។ ក្នុងនាមតំណាងដ៏ខ្ពង់ខ្ពស់របស់ឯកឧត្តមបណ្ឌិត កៅ ថាច បានវាយតម្លៃខ្ពស់ចំពោះគណៈកម្មការរៀបចំការបោះឆ្នោត និងថ្នាក់ដឹកនាំគ្រប់លំដាប់ថ្នាក់ ដែលបានខិតខំរៀបចំកម្មវិធីនេះប្រកបដោយស្មារតីទទួលខុសត្រូវខ្ពស់ និងទទួលបានជោគជ័យ។
ឯកឧត្តមបានគូសបញ្ជាក់ថា ការបោះឆ្នោតនាពេលនេះបានឆ្លុះបញ្ចាំងយ៉ាងច្បាស់ពីការអនុវត្តគោលការណ៍ប្រជាធិបតេយ្យផ្ទៃក្នុងរបស់គណបក្សប្រជាជនកម្ពុជា។ លទ្ធិប្រជាធិបតេយ្យរបស់គណបក្ស មិនមែនគ្រាន់តែជាការលើកឡើងក្នុងពេលឃោសនាបោះឆ្នោតនោះទេ ប៉ុន្តែជាការអនុវត្តជាក់ស្តែង ដែលផ្តល់ឱកាសឱ្យសមាជិកគណបក្សមានសិទ្ធិជ្រើសរើសថ្នាក់ដឹកនាំដែលមានសមត្ថភាព គុណភាព និងឆន្ទៈពិតប្រាកដ ក្នុងការបម្រើគណបក្ស និងប្រជាពលរដ្ឋ។
ឯកឧត្តមបានផ្តាំផ្ញើដល់យុវជន ដែលត្រូវបានជ្រើសរើសជាថ្នាក់ដឹកនាំថា ត្រូវប្រកាន់ខ្ជាប់នូវគោលការណ៍របស់គណបក្ស គោរពស្មារតីសមូហភាពដឹកនាំ បុគ្គលទទួលខុសត្រូវរាល់ការសម្រេចចិត្តត្រូវផ្អែកលើមតិភាគច្រើន និងការពិភាក្សារួម ហើយសមាជិកម្នាក់ៗត្រូវទទួលខុសត្រូវចំពោះភារកិច្ច ដែលគណបក្សប្រគល់ជូន។
ជាមួយគ្នានេះ ឯកឧត្តម ឱម ម៉ាក់ធារិទ្ធ បានថ្លែងអំណរគុណចំពោះការចូលរួមយ៉ាងសកម្មរបស់យុវជនក្នុងដំណើរការបោះឆ្នោត ដោយចាត់ទុកថា នេះជាសញ្ញាបង្ហាញពីការយកចិត្តទុកដាក់ និងការត្រៀមខ្លួនរបស់យុវជនក្នុងការទទួលខុសត្រូវលើការងារគណបក្សនាពេលអនាគត។
ឯកឧត្តមបានបញ្ជាក់ថា គណបក្សប្រជាជនកម្ពុជាតែងតែយកចិត្តទុកដាក់ក្នុងការរៀបចំ និងបណ្តុះបណ្តាលអ្នកបន្តវេនពីមួយជំនាន់ទៅមួយជំនាន់ ដើម្បីធានាបាននូវនិរន្តរភាព និងភាពរឹងមាំរបស់គណបក្ស ស្របតាមគោលការណ៍ប្រជាធិបតេយ្យផ្ទៃក្នុង ដែលបានកំណត់។
ក្នុងមតិសំណេះសំណាល ឯកឧត្តម មាស សុខសេនសាន បានក្រើនរំលឹកដល់យុវជនទាំងអស់ឱ្យបន្តរក្សាសាមគ្គីភាព ចេះជួយគ្នាទៅវិញទៅមក និងរួមគ្នាដោះស្រាយបញ្ហាប្រឈមនានានៅក្នុងមូលដ្ឋាន ដើម្បីធ្វើឱ្យសហគមន៍កាន់តែមានសុវត្ថិភាព សុខដុមរមនា និងការអភិវឌ្ឍប្រកបដោយចីរភាព។
សូមបញ្ជាក់ថា ការបោះឆ្នោតជ្រើសរើសថ្នាក់ដឹកនាំយុវជនគណបក្សប្រជាជនកម្ពុជា ឃុំពុកឫស្សី ស្រុកខ្សាច់កណ្តាល ខេត្តកណ្តាល នាពេលនេះ មានបេក្ខជនឈរឈ្មោះចំនួន ១១រូប ប៉ុន្តែអង្គបោះឆ្នោតបានជ្រើសរើសបេក្ខជនចំនួន៥រូប ដើម្បីបំពេញតួនាទីជាថ្នាក់ដឹកនាំយុវជនគណបក្សប្រជាជនកម្ពុជា ប្រចាំឃុំពុកឫស្សី៕
