ហ្សាការតា៖ មន្ត្រីជាន់ខ្ពស់នៃក្រសួងកសិកម្ម ឥណ្ឌូណេស៊ី មានប្រសាសន៍ថា ខ្លួនកំពុងពង្រឹងវិធានការដើម្បីរក្សាស្ថិរភាពតម្លៃមាន់រស់នៅតាមកសិដ្ឋាន បន្ទាប់ពីមានសេចក្តីរាយការណ៍ថា តម្លៃលក់នៅក្នុងតំបន់មួយចំនួន គឺពិតជាទាបជាងតម្លៃគោលរបស់រដ្ឋាភិបាល។
ប្រធានការិយាល័យសុខភាពសាធារណៈបសុព្យាបាល បានលើកឡើងនៅក្នុងសេចក្តីថ្លែងការណ៍ថា ក្រសួងកំពុងតែខិតខំប្រឹងប្រែង ដើម្បីការពារនិរន្តរភាពនៃអាជីវកម្មរបស់កសិករខ្នាតតូច ព្រមទាំងរក្សាតុល្យភាពនៃឧស្សាហកម្មបសុបក្សីរបស់ជាតិ។
ក្រសួងកសិកម្មឥណ្ឌូណេស៊ីបានបើកកិច្ចប្រជុំសម្របសម្រួលជាមួយសមាគមសត្តឃាតបសុបក្សីឥណ្ឌូនេស៊ី និងប្រតិបត្តិករសត្តឃាតបសុបក្សី ដើម្បីពង្រឹងការប្តេជ្ញាចិត្តនៃខ្សែសង្វាក់អាជីវកម្មបសុបក្សីទាំងមូល ក្នុងការរក្សាស្ថិរភាពតម្លៃនៅតាមកសិដ្ឋាន។
លោកបានកត់សម្គាល់ថា លោកបានទទួលសេចក្តីថា តម្លៃមាន់រស់នៅក្នុងតំបន់មួយចំនួននៅតែទាបជាងតម្លៃ គោលរបស់រដ្ឋាភិបាល គឺស្មើនឹងជាង១,០៩ដុល្លារ ក្នុងមួយគីឡូក្រាម។
លោកបានប្រសាសន៍ទៀតថា តាមព័ត៌មាន ដែលទទួលបាន ជាពិសេសនៅខេត្តជ្វាកណ្តាល បង្ហាញឱ្យឃើញថា មានគេលក់មាន់រស់ក្នុងតម្លៃ១៥ ០០០រូពី ឬស្មើនឹង១,០៩ដុល្លារ ក្នុងមួយគីឡូក្រាម។ តម្លៃទាបបែបនេះ គឺលំបាកខ្លាំងណាស់សម្រាប់កសិករឯករាជ្យ ឬកសិករខ្នាតតូច។
ស្ថានភាពបែបនេះទាមទារឱ្យមានការយកចិត្តទុកដាក់រួមគ្នា ព្រោះកសិករខ្នាតតូចរងផលប៉ះពាល់ខ្លាំងបំផុតនៅពេលដែលតម្លៃធ្លាក់ចុះក្រោមថ្លៃដើមផលិតកម្ម។
លោកបានមានប្រសាសន៍ថា “ចំពោះកសិករខ្នាតធំប្រហែលជាអាចនៅរស់បាន ព្រោះពួកគេមានដើមទុនច្រើន។ ប៉ុន្តែសម្រាប់កសិករខ្នាតតូច ស្ថានភាពបែននេះ អាចធ្វើឱ្យពួកគាត់ក្ស័យធនយ៉ាងងាយ។”
រដ្ឋាភិបាលឥណ្ឌូណេស៊ីកំពុងជំរុញឱ្យតួអង្គក្នុងឧស្សាហកម្មទាំងអស់ ត្រូវពង្រឹងកិច្ចសហការដើម្បីរក្សាតុល្យភាពទីផ្សារ ដែលមិនធ្វើឱ្យសម្ពាធតម្លៃកាន់តែធ្ងន់ធ្ងរនៅតាមកសិដ្ឋាន។
លោកបានមានប្រសាសន៍ថា “យើងជំរុញ និងរំពឹងថា នឹងមានការប្តេជ្ញាចិត្តរួមគ្នាពីម្ចាស់សត្តឃាតមាន់ ដោយមិនត្រូវទិញមាន់ក្រោមតម្លៃគោលរបស់រដ្ឋ ដែលបានឯកភាពកន្លងមកនោះទេ។”
លោកប្រធានការិយាល័យសុខភាពសាធារណៈបសុព្យាបាល បានសង្កត់ធ្ងន់ថា សត្តឃាតមាន់ដើរតួនាទីជាយុទ្ធសាស្ត្រក្នុងខ្សែសង្វាក់ផ្គត់ផ្គង់សាច់មាន់របស់ប្រទេសជាតិ ព្រោះវាជាឧបករណ៍ដ៏សំខាន់ក្នុងការស្រូបយកផលិតកម្មរបស់កសិករ និងគ្រប់គ្រងការផ្គត់ផ្គង់ទីផ្សារ។
ដើម្បីខិតខំប្រឹងប្រែងធ្វើឱ្យមានស្ថិរភាពតម្លៃ ក្រសួងកសិកម្មឥណ្ឌូណេស៊ី ក៏កំពុងអនុវត្តវិធានការត្រួតពិនិត្យ ដោយពន្យារពេលជាបណ្តោះអាសន្នសម្រាប់អាជីវកម្មមួយចំនួន នៅក្នុងវិស័យបសុបក្សី រហូតដល់តម្លៃត្រឡប់ទៅរកតម្លៃគោលរបស់រដ្ឋាភិបាលឡើងវិញ។
លោកបានបញ្ជាក់ថា “ដរាបណាតម្លៃមិនស្របតាមតម្លៃគោលរបស់រដ្ឋាភិបាលទេ រាល់អនុសាសន៍ទាំងអស់ ដែលទាក់ទងនឹងអាជីវកម្មបសុបក្សី ក្រសួងនឹងស្នើសុំឱ្យពន្យារពេលជាបណ្តោះអាសន្ន។”
ចំណែកនាយកផ្នែកបង្កាត់ពូជសត្វ និងផលិតកម្មសត្វ បានបន្ថែមថា ជំហាននេះបង្ហាញពីការប្តេជ្ញាចិត្តរបស់រដ្ឋាភិបាលឥណ្ឌូណេស៊ីក្នុងការរក្សាតម្លៃមាន់រស់ក្នុងកម្រិតមួយ ដែលផ្តល់អត្ថប្រយោជន៍ដល់កសិករ។
លោកបានមានប្រសាសន៍ដូច្នេះថា “យើងបានឯកភាពថា យើងនឹងពន្យារពេលជាបណ្តោះអាសន្នចំពោះរាល់អនុសាសន៍ទាំងអស់ ដែលទាក់ទងនឹងសាច់បក្សី រហូតដល់ទាល់តែមានការអនុវត្តតាមតម្លៃគោលរបស់រដ្ឋាភិបាល។ ខ្ញុំសូមស្នើសុំដោយស្មោះចំពោះការសហការរបស់អ្នកទាំងអស់គ្នា ហើយមិនត្រូវទម្លាក់តម្លៃឡើយ។”
ម្យ៉ាងវិញទៀត ភាគីពាក់ព័ន្ធក្នុងឧស្សាហកម្ម បាននិយាយថា ពួកគេក៏កំពុងប្រឈមមុខនឹងសម្ពាធទីផ្សារផងដែរ ដោយសារតែតម្រូវការធ្លាក់ចុះ ហើយការផ្គត់ផ្គង់មាន់រស់នៅតែច្រើនដដែល។
ក្រសួងកសិកម្មហ្វីលីពីន បានគូសបញ្ជាក់ថា ស្ថិរភាពតម្លៃមាន់រស់ គឺជាគន្លឹះក្នុងការរក្សានិរន្តរភាពអាជីវកម្មរបស់កសិករខ្នាតតូចរាប់លាននាក់ និងធានាឱ្យឧស្សាហកម្មបសុបក្សី មានការលូតលាស់ប្រកបដោយសុខភាព ការប្រកួតប្រជែង និងនិរន្តរភាព។
ដូច្នេះ ការរួមបញ្ចូលគ្នារវាងរដ្ឋាភិបាល កសិករ សត្តឃាតដ្ឋាន និងអ្នករកស៊ី គឺមានសារៈសំខាន់ណាស់ក្នុងការរក្សាតុល្យភាពទីផ្សារ និងសន្តិសុខស្បៀងរបស់ប្រទេសជាតិ។
រីឯប្រធានសមាគមសត្តឃាតសត្វបសុបក្សីឥណ្ឌូនេស៊ី បានឲ្យដឹងថា សត្តឃាតដ្ឋាននៅតែបន្តព្យាយាមស្រូបយកផលិតកម្មបសុសត្វ ដើម្បីជួយរក្សាតុល្យភាពទីផ្សារ។
លោកបាននិយាយថា៖ “ស្ថានភាព ដែលយើងកំពុងប្រឈម គឺពិបាកដូចគ្នា។ ដូច្នេះ វាមិនមែនជាបញ្ហា ដែលយើងគួរភ័យខ្លាច មិនត្រូវឆ្លៀតឱកាស ឬមិនត្រូវកេងប្រវ័ញ្ចឡើយ៕”
