បាត់ដំបង៖ នាថ្ងៃទី១០ ខែមិថុនា ឆ្នាំ២០២៦ ឯកឧត្តម ឡាយ ឈុនហាំង អនុប្រធានសមាគមបណ្តាញកសិករតេជោ ទទួលបន្ទុកការងារខេត្តបាត់ដំបង និងជាតំណាងដ៏ខ្ពង់ខ្ពស់របស់ឯកឧត្តមបណ្ឌិត កៅ ថាច ប្រធានសមាគមបណ្តាញកសិករតេជោ បានអញ្ជើញចុះសួរសុខទុក្ខបងប្អូនប្រជាកសិករ ក្នុងតំបន់ដាំដុះស្រូវ ស្ថិតក្នុងឃុំកន្ទឺ ស្រុកបាណន់ ខេត្តបាត់ដំបង ដើម្បីស្វែងយល់ពីស្ថានភាពជីវភាព ការបង្កបង្កើនផល និងបញ្ហាប្រឈមនានាក្នុងវិស័យកសិកម្ម។
ក្នុងឱកាសនេះ ឯកឧត្តម ឡាយ ឈុនហាំង ក៏បានចុះត្រួតពិនិត្យស្ថានភាពទឹក ប្រព័ន្ធធារាសាស្ត្រ និងតំបន់កសិកម្មដាំដុះស្រូវមួយចំនួន ដែលរៀបចំឡើងដោយឧកញ៉ា ហង់ សុគន្ធ ប្រធានសម្ព័ន្ធសហគមន៍កសិកម្មកម្ពុជា ដើម្បីវាយតម្លៃលើលទ្ធភាពផ្គត់ផ្គង់ទឹកសម្រាប់ការងារបង្កបង្កើនផល។
គោលបំណងនៃការចុះពិនិត្យ គឺដើម្បីតាមដានស្ថានភាពជាក់ស្តែង និងស្វែងរកដំណោះស្រាយសមស្រប ក្នុងការគ្រប់គ្រងធនធានទឹកប្រកបដោយប្រសិទ្ធភាព និងនិរន្តរភាពសម្រាប់វិស័យកសិកម្មក្នុងតំបន់។
ឯកឧត្តមអនុប្រធានបានពាំនាំនូវការផ្តាំផ្ញើសួរសុខទុក្ខ និងការយកចិត្តទុកដាក់យ៉ាងជ្រាលជ្រៅពីសំណាក់ ឯកឧត្តមបណ្ឌិត កៅ ថាច ជូនដល់បងប្អូនប្រជាកសិករផងដែរ។ ជាមួយគ្នានេះ ឯកឧត្តមបានលើកទឹកចិត្តឱ្យកសិករឱ្យបន្តខិតខំប្រឹងប្រែងបង្កបង្កើនផលបន្ថែមទៀត ដោយចេះអនុវត្តបច្ចេកទេសកសិកម្មទំនើប និងឆ្លាតវៃ ព្រមទាំងចេះជ្រើសរើសប្រើប្រាស់ពូជស្រូវ ដែលមានគុណភាព និងមានទីផ្សារ រួមទាំងប្រឹងពង្រឹងការគ្រប់គ្រង និងប្រើប្រាស់ទឹកឱ្យចំគោលដៅ ដើម្បីបង្កើនទិន្នផលមានគុណភាពល្អ និងលើកកម្ពស់ប្រាក់ចំណូលគ្រួសារ។
សមាគមបណ្តាញកសិករតេជោ បានបញ្ជាក់ពីគោលជំហរថា នឹងបន្តសហការយ៉ាងជិតស្និទ្ធជាមួយអាជ្ញាធរមូលដ្ឋាន សហគមន៍កសិកម្ម និងភាគីពាក់ព័ន្ធទាំងអស់ ដើម្បីគាំទ្រដល់ការអភិវឌ្ឍវិស័យកសិកម្ម។ នេះជាផ្នែកមួយក្នុងការចូលរួមចំណែកលើកកម្ពស់ជីវភាពរបស់ប្រជាកសិករ ក៏ដូចជាការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងការពង្រឹងសន្តិសុខស្បៀង និងការអភិវឌ្ឍជនបទប្រកបដោយចីរភាព៕
