កដ្ឋមណ្ឌូ៖ ប្រទេសនេប៉ាល់បានដាក់កម្រិតលើការនាំចូលផ្លែស្វាយ ពីប្រទេសឥណ្ឌា ដោយសារតែផ្លែស្វាយឥណ្ឌាជាប់សង្ស័យថា មានសំណល់ថ្នាំសម្លាប់សត្វល្អិតលើសកម្រិត ហើយប្រទេសនេប៉ាល់ខ្វះកន្លែងនៅតាមព្រំដែនសម្រាប់ដាក់ផ្លែស្វាយនាំចូលឱ្យនៅដាច់ពីគេ។
ជាលទ្ធផលនៃការហាមប្រាមនេះ នៅតាមបណ្តាទីផ្សារក្នុងប្រទេសនេប៉ាល់ ឥឡូវនេះពោរពេញទៅដោយផ្លែស្វាយដែលដាំដុះក្នុងស្រុក។ ផ្លែស្វាយមានតម្រូវការខ្ពស់ក្នុងរដូវក្តៅ។ មន្ត្រីរដ្ឋាភិបាលបាននិយាយថា នេប៉ាល់បានដាក់កម្រិតលើការនាំចូលផ្លែស្វាយ ដែលមានសំនល់ថ្នាំសម្លាប់សត្វល្អិតច្រើនពេក និងដោយសារតែកង្វះកន្លែងសម្រាប់ដាក់ផ្លែស្វាយឥណ្ឌាឱ្យនៅដាច់ពីគេ នៅតាមតំបន់ព្រំដែន ដែលភាគច្រើននៅក្នុងខេត្តមានព្រំប្រទល់ជាប់ប្រទេសឥណ្ឌា។
មន្ត្រីព័ត៌មានរបស់ក្រសួងរៀបចំដែនដី កសិកម្ម និងសហគមន៍ នៃខេត្តម៉ាដេស (Madhesh) ជាប់ប្រទេសឥណ្ឌា បាននិយាយថា ការរឹតបន្តឹងលើការនាំចូលផ្លែស្វាយពីប្រទេសឥណ្ឌា បានជួយលើកទឹកចិត្តដល់កសិករនេប៉ាល់ ដោយសារពួកគេមិនចាំបាច់ប្រកួតប្រជែងជាមួយផ្លែឥណ្ឌា នៅរដូវប្រមូលផលឆ្នាំនេះ។
មន្ត្រីរូបនេះ បានបន្ថែមថា “បម្រាមនេះបានជួយលើកកម្ពស់ផលិតកម្មក្នុងស្រុក ដែលជាការអភិវឌ្ឍបែបវិជ្ជមាន។”
ទោះជាយ៉ាងណាក៏ដោយ លោកបាននិយាយទៀតថា ការផលិតកម្មផ្លែស្វាយក្នុងស្រុក ប្រហែលជាមិនគ្រប់គ្រាន់តាមតម្រូវការផ្លែស្វាយនៅទូទាំងប្រទេសនោះទេ ព្រោះដំណាំស្វាយភាគច្រើនមានដាំតែនៅក្នុងស្រុកបី នៃខេត្តម៉ាដេស ស្ថិតនៅខាងត្បូងទីក្រុងកដ្ឋមណ្ឌូ និងមានព្រំប្រទល់ជាប់ប្រទេសឥណ្ឌា។
នៅក្នុងប្រទេសនេប៉ាល់ ផ្លែស្វាយត្រូវប្រមូលផលរៀងរាល់ឆ្នាំ នៅចន្លោះពាក់កណ្តាលខែឧសភា និងពាក់កណ្តាលខែកក្កដា។ ការដាក់កម្រិតមិនឱ្យនាំចូលនេះ ក៏អាចប៉ះពាល់ដល់ឧស្សាហកម្មកែច្នៃទឹកផ្លែឈើមួយចំនួនផងដែរ ដែលពឹងផ្អែកលើផ្លែស្វាយនាំចូលពីប្រទេស។
យោងតាមឈ្មួញក្នុងប្រទេសនេប៉ាល់ បានឱ្យដឹងថា វាមានសារៈសំខាន់ណាស់ក្នុងការនាំចូលផ្លែស្វាយពីប្រទេសឥណ្ឌា ដើម្បីបំពេញតម្រូវការផ្លែឈើសម្រាប់បម្រើដល់សង្វាក់ផលិតកម្មឱ្យបានពេញមួយឆ្នាំ ស្របពេលផលិតផ្លែស្វាយរបស់ប្រទេសនេប៉ាល់ អាចបំពេញតម្រូងការរបស់រោងចក្រកែច្នៃបានត្រឹមតែពីរខែប៉ុណ្ណោះ។
ចំណែកអគ្គលេខាធិការសមាគមពាណិជ្ជករបន្លែ និងផ្លែឈើ របស់នេប៉ាល់ បាននិយាយថា ការបញ្ឈប់ការនាំចូលផ្លែស្វាយរបស់ឥណ្ឌាអាចនាំឱ្យមានការខ្វះខាតនៅតាមបណ្តាទីផ្សារក្នុងស្រុក។
លោកបានផ្តល់យោបល់ឱ្យរដ្ឋាភិបាលពង្រឹងប្រព័ន្ធចត្តាឡីស័ក និងអនុញ្ញាតឱ្យផ្លែស្វាយឥណ្ឌា អាចនាំចូលទីផ្សារនេប៉ាល់ បន្ទាប់ពីការធ្វើតេស្តពិនិត្យមើលគុណភាពឱ្យបានត្រឹមត្រូវ ប្រសើរជាងការហាមឃាត់មិនឱ្យនាំចូលទាំងស្រុងបែបនេះ។
លោកមានប្រសាសន៍ទៀតថា ទោះបីជាផ្លែស្វាយជាង៥០តោន បានដឹកមកជិតដល់តំបន់ដើម្បីផ្គត់ផ្គង់ទីផ្សារក្នុងទីក្រុងកដ្ឋមណ្ឌូ និងតំបន់ផ្សេងទៀតនៃប្រទេសក៏ដោយ ក៏ផលិតផលផ្លែស្វាយក្នុងស្រុក ប្រហែលជាមិនគ្រប់គ្រាន់ដើម្បីបំពេញតម្រូវការទាំងមូលនោះទេ។
ក្រុមឈ្មួញនាំចូលផ្លែឈើបានព្រមានថា នាពេលបច្ចុប្បន្ននេះ ផ្លែស្វាយអាចលក់នៅតាមផ្សារក្នុងទីក្រុងកដ្ឋមណ្ឌូ ក្នុងតម្លៃប្រហែលពី០,៦៥ដុល្លារ ទៅ០,៩៨ដុល្លារ ក្នុងមួយគីឡូក្រាម ប៉ុន្តែ អាចនឹងឡើងថ្លៃកាន់តែខ្ពស់ក្នុងរយៈពេលប៉ុន្មានថ្ងៃខាងមុខនេះ ប្រសិនបើការដាក់កម្រិតលើការនាំចូលផ្លែស្វាយពីប្រទេសឥណ្ឌា មិនត្រូវបានលុបចោលនោះទេ។
អាជីវករក្នុងស្រុកបានលើកឧទាហរណ៍ជាក់ស្តែងថា កាលពីពេលថ្មីៗកន្លេងមកនេះ ដោយសារតែការបញ្ឈប់ឱ្យនាំចូលផ្លែចេកពីប្រទេសឥណ្ឌា ដែលធ្លាប់មានតម្លៃប្រហែលពី០,៧៩ដុល្លារ ទៅ០,៩៨ដុល្លារ ក្នុងផ្លែចេកមួយឡូដ៍ ឥឡូវនេះបានឡើងថ្លៃរហូតដល់ប្រហែល១,៦៤ដុល្លារ ទៅ១,៩៦ដុល្លារ ក្នុងផ្លែចេកមួយឡូដ៍៕
