កង់បេរ៉ា៖ ឧស្សាហកម្មផ្លែទំពាំងបាយជូរស្រស់របស់ប្រទេសអូស្ត្រាលី បានឱ្យដឹងថា កំណើននាំចេញនៅក្នុងប្រទេសចិនត្រូវបានបង្កើតឡើងដោយផ្អែកលើអនុលោមភាព ការគ្រប់គ្រងគុណភាព និងទំនាក់ទំនងជាមួយអ្នកទិញរយៈពេលវែង ដោយផ្តល់មេរៀនសម្រាប់អ្នកដាំផ្លែប៉ោមស្វែងយល់ពីឱកាសនាំចេញផងដែរ។
យោងតាមសមាគមផ្លែទំពាំងបាយជូរស្រស់អូស្ត្រាលី បានឱ្យដឹងថា បច្ចុប្បន្នឧស្សាហកម្មនេះបាននាំចេញផ្លែទំពាំងបាយជូរស្រស់ ដែលមានតម្លៃជាង៦០០លានដុល្លារ បន្ទាប់ពីបានពង្រីកការនាំចេញទៅកាន់ទីផ្សារអាស៊ី ជាពិសេសប្រទេសចិន។
នាយកប្រតិបត្តិសមាគមផ្លែទំពាំងបាយជូរស្រស់អូស្ត្រាលី បាននិយាយថា ឧស្សាហកម្មនេះបានចាប់ផ្តើមផ្តោតលើការនាំចេញ នៅរង្វង់ឆ្នាំ២០០៥ បន្ទាប់ពីទទួលស្គាល់ពីកម្រិតតម្រូវនៃទីផ្សារក្នុងស្រុក។ ការទទួលបានទីផ្សារទៅកាន់ប្រទេសចិន ត្រូវបានសម្រេចក្នុងឆ្នាំ២០១១ បន្ទាប់ពីការចរចា និងការកសាងទំនាក់ទំនងជាមួយអ្នកទិញអស់រយៈពេលជាច្រើនឆ្នាំ។
ទោះជាយ៉ាងណាក៏ដោយ ការនាំចេញទៅកាន់ប្រទេសចិនត្រូវបានផ្អាក បន្ទាប់ពីមានបញ្ហាក្នុងការត្រួតពិនិត្យរកសារធាតុមិនល្អ ដូចជាមាន សត្វស្រមោច កខ្វក់ និងកម្ទេចកម្ទីស្លឹកទំពាំងបាយជូរ។
លោកនាយកប្រតិបត្តិសមាគម បាននិយាយថា “បន្ទាប់ពីយើងទទួលបានសិទ្ធិនាំចូលទៅកាន់ទីផ្សារចិន ជាទីបំផុត ការដឹកជញ្ជូនជាច្រើនត្រូវបានដកថយដោយអធិការចិន។”
យោងតាមលោកនាយកប្រតិបត្តិសមាគមរូបនេះ បានឱ្យដឹងទៀតថា ឧស្សាហកម្មនេះបានឆ្លើយតបដោយការផ្លាស់ប្តូរនីតិវិធីវេចខ្ចប់ និងការបង្កើនការត្រួតពិនិត្យអនុលោមភាព រួមទាំងការប្រើប្រាស់ឃ្លាំងវេចខ្ចប់ ដែលមានបំពាក់ម៉ាស៊ីនសម្រាប់រក្សាគុណភាពផ្លែឈើនាំចេញ។
លោកបានមានប្រសាសន៍ថា “យើងត្រូវថែទាំងផ្លែទំពាំងបាយជូរសម្រាប់នាំចេញរបស់យើងខុសពីទំពាំងបាយជូរក្នុងស្រុក។”
សមាគមផ្លែទំពាំងបាយជូរស្រស់អូស្ត្រាលី ក៏បានណែនាំកម្មវិធីអប់រំដល់អ្នកដាំដុះ និងបង្កើតកម្មវិធីទូរស័ព្ទ ដែលផ្តល់ព័ត៌មានអំពីកម្រិតកំណត់សំណល់អតិបរមា និងរយៈពេលរងចាំប្រមូលផលក្រោយពីបានបាញ់ថ្នាំសម្រាប់ផ្លែទំពាំងបាយជូរលក់តាមទីផ្សារក្នុងស្រុក និងសម្រាប់នាំចេញ។
លោកបាននិយាយថា “ការងារនេះត្រូវការការខិតខំប្រឹងប្រែង ការយល់ដឹង និងការអប់រំជាច្រើន។”
តម្លៃនាំចេញរបស់ឧស្សាហកម្មផ្លែទំពាំងបាយជូរស្រស់ អូស្ត្រាលី ក្រោយមកបានកើនឡើងពីប្រហែល៣០លានដុល្លារ ដល់៦២៣ លានដុល្លារ។
លោកបានពន្យល់ថា ការរក្សាបាននូវស្តង់ដារគុណភាពនៅតែជាចំណុចចាំបាច់នៃការកំណត់តម្លៃនាំចេញ និងទំនាក់ទំនងជាអ្នកទិញ។
លោកបានមានប្រសាសន៍បន្ថែមថា “ប្រសិនបើអ្នកផ្តល់នូវគុណភាពអន់ អ្នកទិញនឹងធ្វើឱ្យអ្នកពិបាកក្នុងការកំណត់តម្លៃ។ ប្រសិនបើអ្នកសន្យាថា ផ្លែទំពាំងបាយជូរមានគុណភាពលេខ១ ហើយបែរជាផ្តល់ឱ្យអ្នកលក់នូវលេខ២ នោះអ្នកនឹងមានអារម្មណ៍ថា គួរក្តុកក្តួលក្នុងចិត្ត។”
យោងតាមលោកនាយកប្រតិបត្តិដដែលនេះ ការចូលរួមដោយផ្ទាល់ជាមួយអ្នកទិញក្នុងតំបន់អាស៊ី នៅតែមានសារៈសំខាន់សម្រាប់កសាងទំនាក់ទំនងពាណិជ្ជកម្មរយៈពេលវែង។ ឧស្សាហកម្មផ្លែទំពាំងបាយជូរអូស្ត្រាលីតែងតែរៀបចំអញ្ជើញអ្នកទិញនៅក្រៅប្រទេស មកធ្វើទស្សនកិច្ចនៅក្នុងតំបន់ដាំដុះរបស់អូស្ត្រាលី និងធ្វើរបាយការណ៍សង្ខេបអំពីទីផ្សារមុនរដូវប្រមូលចូលមកដល់។
បច្ចុប្បន្ន ការនាំចេញផ្លែទំពាំងបាយជូរស្រស់បានប្រមូលផ្តុំនៅតំបន់អាស៊ី ដោយប្រទេសចិនមានចំនួនប្រហែល៣៥ ទៅ៤០ភាគរយនៃការនាំចេញ បន្ទាប់មកប្រទេសឥណ្ឌូនេស៊ី មានប្រហែល២០ភាគរយ។ ប្រទេសកូរ៉េ ជប៉ុន វៀតណាម និងប្រទេសហ្វីលីពីន មានប្រហែល៦ ទៅ៧ភាគរយ។ ចំណែកប្រទេសប៉េរូ ឈីលី និងប្រទេសអាហ្វ្រិកខាងត្បូង កំពុងប្រកួតប្រជែងកាន់ខ្លាំងនៅក្នុងទីផ្សារនាំចេញផ្លែទំពាំងបាយជូរ។ ដូច្នេះ អ្នកដាំដុះតូចតាចអាចចូលរួមក្នុងការនាំចេញផ្លែទំពាំងបាយជូរស្រស់ ដោយចាប់ដៃគូជាមួយអ្នកនាំចេញ ដើម្បីគ្រប់គ្រងតម្រូវការនាំចេញ និងតម្រូវការនាំចូលទៅកាន់ទីផ្សារអន្តរជាតិ៕ (ផាន់ អាណា)
