តូក្យូ៖ រដ្ឋាភិបាលជប៉ុន កាលចុងខែឧសភា ឆ្នាំ២០២៦ បានទទួលស្គាល់ថា ការវាយតម្លៃខុសចំពោះការផ្គត់ផ្គង់ស្រូវអង្ករ និងការឆ្លើយតបយឺតយ៉ាវក្នុងការគ្រប់គ្រងស្ថានការណ៍ និងការបញ្ចេញស្តុកអង្ករសម្រាប់សង្គ្រោះបន្ទាន់ គឺជាកំហុសត្រូវស្តីបន្ទោសចំពោះវិបត្តិស្រូវអង្ករនាពេលថ្មីៗនេះ។
បើយោងតាមរដ្ឋាភិបាល បានឱ្យដឹងថា កង្វះខាតស្រូវអង្ករនៅក្នុងប្រទេសជប៉ុនបានកើតឡើង នារដូវក្តៅ ឆ្នាំ២០២៤ ដែលបណ្តាលមកពីកត្តាផ្គត់ផ្គង់ និងតម្រូវការខ្ពស់ពេក រួមទាំងការប្រមូលផលមិនទទួលបានទិន្នផលល្អដោយសារតែអាកាសធាតុក្តៅពេក ក៏ដូចជាការកើនឡើងនៃការប្រើប្រាស់អង្ករដោយសារមានភ្ញៀវទេសចរចូលមកច្រើនពេក និងការស្តុកទុកដោយខ្លះ ដើម្បីត្រៀមខ្លួនសម្រាប់ការរញ្ជួយដី។
យោងតាមសៀវភៅស ឬសំណើស្តីពីគោលនយោបាយរបស់រដ្ឋាភិបាលបាននិយាយថា “ផ្អែកលើការសន្មតថា ផលិតកម្មស្រូវអង្ករ គឺគ្រប់គ្រាន់ (រដ្ឋាភិបាល) មិនប្រញាប់ប្រញាល់ក្នុងការប្រមូលព័ត៌មានអំពីស្ថានភាពចែកចាយអង្ករ ដែលជាលទ្ធផលនាំឱ្យមានការឡើងថ្លៃ”។
កង្វះខាតបែបនេះបានបង្ខំឱ្យរដ្ឋាភិបាលជប៉ុនបញ្ចេញអង្ករក្នុងស្តុក ដែលបានបម្រុងទុកសម្រាប់ការប្រើប្រាស់បន្ទាន់ ដើម្បីជួយបន្ធូរបន្ថយការព្រួយបារម្ភរបស់សាធារណជន និងកាត់បន្ថយតម្លៃលក់រាយនៃផលិតផលសំខាន់ៗរបស់ជប៉ុន។
ប៉ុន្តែរដ្ឋាភិបាលជប៉ុនក៏បានទទួលស្គាល់ផងដែរថា ការសម្រេចចិត្តនេះយឺតយ៉ាងបែបនេះ គឺជារឿងបរាជ័យក្នុងការលុបបំបាត់សេចក្តីព្រួយបារម្ភក្នុងចំណោមអ្នកលក់ដុំអង្ករ។
តាមរយៈការនាំចូលអង្ករដោយវិស័យឯកជន ក្នុងឆ្នាំ២០២៥ កើនឡើង៩៥ដង បើធៀបនឹងឆ្នាំ២០២៥ គឺកើនដល់បរិមាណ៩៦ ៨៣៤តោន រដ្ឋាភិបាលជប៉ុនបានព្រមាននៅក្នុងសៀវភៅសប្រចាំឆ្នាំថា ការនាំចូលនេះនឹងបង្កផលប៉ះពាល់ដល់ផលិតកម្មស្រូវក្នុងស្រុក។
ចំណែកក្រសួងកសិកម្ម រុក្ខាប្រមាញ់ និងនេសាទរបស់ជប៉ុនវិញ បែរបានប៉ាន់ប្រមាណថា តម្រូវការអង្ករនៅក្នុងប្រទេសនឹងថយចុះចំពេលចំនួនប្រជាជនជប៉ុនធ្លាក់ចុះ។
ការប៉ាន់ប្រមាណនេះ គឺមិនត្រឹមត្រូវទេ ដោយសារការកើនឡើងនៃភ្ញៀវទេសចរណ៍បរទេស ដូច្នេះមានន័យថា អង្ករកាន់តែច្រើនត្រូវបានប្រើប្រាស់ ស្របពេលការព្រមានបឋមរបស់រដ្ឋាភិបាល នៅក្នុងរដូវក្តៅឆ្នាំ២០២៤ថា នឹងគ្រោះរញ្ជួយដីដ៏ធំមួយនៅតាមបណ្តោយឆ្នេរសមុទ្រប៉ាស៊ីហ្វិក បានជំរុញឱ្យប្រជាជនជប៉ុនរក្សាស្តុកទុកអង្ករផ្ទាល់ខ្លួន។
ប្រទេសជប៉ុនបានឃើញតម្លៃអង្ករឡើងថ្លៃជាបណ្តោះអាសន្នចំនួន៤ ០០០យ៉េន ឬស្មើនឹង២៥ដុល្លារ សម្រាប់កញ្ចប់អង្ករទម្ងន់ប្រាំគីឡូក្រាម ដែលអ្នកលក់ដុំអង្ករបាននិយាយថា ស្ថានភាពបែបនេះបានធ្វើឱ្យគ្រួសារប្រជាជនជប៉ុនងាកទៅបរិភោគគុយទាវ និងនំប៉័ងវិញម្តង។
សៀវភៅស ដែលត្រូវបានអនុម័តដោយគណៈរដ្ឋមន្ត្រីរបស់លោកស្រីនាយករដ្ឋមន្ត្រី សាណាអេ តាកៃជី (Sanae Takaichi) កាលពីថ្ងៃទី២៩ ខែឧសភា គឺជារបាយការណ៍របស់រដ្ឋាភិបាល ស្តីពីបច្ចុប្បន្នភាព និងបញ្ហាប្រឈមរបស់វិស័យកសិកម្មរបស់ប្រទេសជប៉ុន។
ឯកសារនេះក៏បានកត់សម្គាល់ពីការចាប់អារម្មណ៍កាន់តែខ្លាំងនៅក្រៅប្រទេសចំពោះផលិតផលកសិកម្មរបស់ជប៉ុន នៅក្នុងឆ្នាំ២០២៥ រួមមានអង្ករ សាច់គោ និងតែបៃតង ដោយការនាំចេញទំនិញជាម្ហូបអាហារបានកើនឡើង១២,៨ភាគរយ ក្នុងទំហំទឹកប្រាក់ចំនួន១,៧០ទ្រីលានយ៉េន ឬស្មើនឹង១០៦ពាន់លានដុល្លារ៕
