ដោយ នៅ ស៊ីវុត្ថា
ខេត្តប៉ៃលិន ៖ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិនបានណែនាំដល់ម្ចាស់ចម្ការទុរេនទាំងអស់នៅក្នុងខេត្តឱ្យធ្វើការប្រែក្លាយចម្ការទុរេនរបស់ខ្លួន ទៅជាតំបន់កសិទេសចរណ៍ (Agrotourism) ដើម្បីបង្កើនប្រាក់ចំណូលក្រៅពីរដូវប្រមូលផលទុរេន។
លោកជំទាវបណ្ឌិត បាន ស្រីមុំ បានណែនាំបែបនេះ នៅថ្ងៃទី៣១ ខែឧសភា ឆ្នាំ២០២៦ ក្នុងគ្រាដែលអញ្ជើញចុះពិនិត្យមើលស្ថានភាពប្រមូលផលផ្លែទុរេនរបស់កសិករ នៅសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដើម្បីត្រៀមបង្កើតស្លាកសញ្ញាសម្គាល់អត្តសញ្ញាណបញ្ជាក់ប្រភពដើមទំនិគ ជាផលិតផលរបស់ខេត្តប៉ៃលិន ក្នុងការផ្គត់ផ្គង់ទីផ្សារក្នុងស្រុក និងនាំចេញ ខណៈឆ្នាំនេះទីផ្សារផ្លែទុរេនល្អប្រសើជាងឆ្នាំកន្លងទៅ។
លោកជំទាវអភិបាលខេត្ត បានឱ្យដឹងថា បច្ចុប្បន្នរាជរដ្ឋាភិបាលកកម្ពុជាបានជំរុញឱ្យក្រសួងកសិកម្ម រុក្ខាប្រមាញ់ និងនេសាទ បណ្តុះបណ្តាលដល់សហគមន៍ ឬបណ្តុំកសិករដោយផ្តល់អ្នកជំនាញទៅបណ្តុះបណ្តាលដល់មូលដ្ឋានផ្ទាល់ ដើម្បីធ្វើយ៉ាងណាឱ្យការដាំដុះរបស់ប្រជាកសិករទទួលបានទិន្នផលច្រើនចំណាយថ្លៃដើមផលិតតិច និងមានសុវត្ថិភាពដល់អ្នកប្រើប្រាស់ ក៏ដូចជាអ្នកដាំដុះផ្ទាល់ ជាពិសេសផលិតកសិផលទៅតាមតម្រូវការទីផ្សារក្នុងស្រុក និងនាំចេញទៅក្រៅប្រទេស។
ជាមួយគ្នានេះ លោកជំទាវអភិបាលខេត្ត ក៏បានមានប្រសាសន៍ណែនាំដល់ម្ចាស់ចម្ការទុរេន ឱ្យធ្វើការប្រែក្លាយចម្ការទុរេន ទៅជាតំបន់កសិទេសចរណ៍ (Agrotourism) គឺជាជម្រើសដ៏ល្អបំផុតមួយដើម្បីបង្កើនប្រាក់ចំណូលក្រៅពីរដូវប្រមូលផល ពីព្រោះមិនត្រឹមតែលក់ផ្លែឈើនោះទេ ម្ចាស់ចម្ការអាចផ្តល់បទពិសោធន៍ផ្ទាល់ដល់ភ្ញៀវទេសចរ ដូចជាការដើរទស្សនាក្នុងចម្ការ និងភ្ល័ក្សរសជាតិផ្លែទុរេនស្រស់ៗ កន្លែងលេងកម្សាន្តធម្មជាតិ និងការស្នាក់នៅបែបធម្មជាតិផងដែរ។
ទាក់ទិននឹងបញ្ហានេះលោក រឿន រតនា លេខាប្រតិបត្តិសមាគមទុរេនកម្ពុជា បានគាំទ្រនូវគំនិតផ្តួចផ្តើមរបស់ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន ដែលណែនាំដល់ម្ចាស់ចម្ការទុរេនទាំងអស់នៅក្នុងខេត្តឱ្យធ្វើការប្រែក្លាយចម្ការទុរេនរបស់ខ្លួន ទៅជាតំបន់កសិទេសចរណ៍នៅពេលនេះ។
លោក រឿន រតនា បានចាត់ទុកគំនិតផ្តួចផ្តើមនេះ គឺជាគំរូមួយល្អសម្រាប់កសិករផ្សេងទៀត ដែលមានចម្ការទុរេន ។ ទោះជាយ៉ាងណា លោក បានស្នើឱ្យរដ្ឋបាលខេត្តប៉ៃលិនធ្វើកិច្ចសហប្រតិបត្តិការឱ្យបានស៊ីជម្រៅជាមួយក្រសួងកសិកម្ម រុក្ខាប្រមាញ់ និងនេសាទដាក់ QR Code លើផលិតផលផ្លែទុរេននៅក្នុងខេត្តទាំងអស់ ដើម្បីញ្ជាក់ពីភពដើមឱ្យបានច្បាស់លាស់ ចៀសវាង ការលើកឡើងថា “ជាទុរេនកូនកាត់” នាំឱ្យបាត់ទំនុកចិត្តពីសំណាក់អ្នកទិញយកទៅបរិភោគ។
ខេត្តប៉ៃលិនមានដីមានសក្ដានុពលខ្ពស់សម្រាប់ដំណាំទុរេន (ជាពិសេសនៅជើងភ្នំបរយ៉ាខា និងសង្កាត់អូរតាវ៉ៅ)។ ទោះបីជាយ៉ាងណាក្តី ទិន្នន័យផ្ទៃដីដាំដុះសរុបជាផ្លូវការមិនត្រូវបានចងក្រងជារួមដាច់ដោយឡែកនោះទេ ដោយសារកសិករភាគច្រើនបានដាំលាយឡំជាមួយដំណាំហូបផ្លែផ្សេងៗដូចជា មៀនប៉ៃលិនក្នុងទំហំផ្ទៃដីចម្ការខ្នាតតូច និងមធ្យម។
ភាគច្រើនប្រជាពលរដ្ឋដាំនៅលើដីក្រហម និងដីល្បាយខ្សាច់នៅតាមជើងភ្នំ ដែលមិនលិចទឹក ដូចជានៅក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន។ ទុរេនប៉ៃលិនត្រូវបានគេទទួលស្គាល់ថាមានរសជាតិឈ្ងុយឆ្ងាញ់ ដោយសារកសិករនិយមប្រើជីធម្មជាតិ និងការថែទាំយ៉ាងយកចិត្តទុកដាក់។
ដោយមើលឃើញនូវសក្តានុពលដ៏សំខាន់បែបនេះ អាជ្ញាធរខេត្ត ក៏ដូចជាមន្ទីរកសិកម្ម រុក្ខាប្រមាញ់ និងនេសាទខេត្ត បាននិងកំពុងជំរុញលើកទឹកចិត្តឱ្យម្ចាស់ចម្ការរៀបចំចម្ការទុរេនរបស់ខ្លួនឱ្យក្លាយជាតំបន់កសិទេសចរណ៍ (Agrotourism) ដើម្បីបង្កើនប្រាក់ចំណូលបន្ថែមពីការលក់ផ្លែទុរេនស្រស់ៗ និងការទាក់ទាញភ្ញៀវទេសចរ៕
