ដោយ នៅ ស៊ីវុត្ថា
ភ្នំពេញ៖ ប្រទេសអូស្ត្រាលីតាមរយៈស្ថានទូតប្រចាំកម្ពុជាកំពុងជួយកសិករដាំដំណាំម្រេចនៅខេត្តត្បូងឃ្មុំ ឱ្យមានការទទួលស្គាល់នៅលើទីផ្សារអន្តរជាតិ ខណៈម្រេចកម្ពុជាមានកេរ្តិ៍ឈ្មោះល្បីល្បាញ ដោយសារគុណភាពដ៏ល្អឥតខ្ចោះ។
ស្ថានទូតអូស្ត្រាលីប្រចាំកម្ពុជា បានបញ្ជាក់ថា ជាក់ស្តែងម្រេចកំពត គឺជាផលិតផលដំបូងបង្អស់របស់កម្ពុជា ដែលទទួលបានសញ្ញាសម្គាល់ភូមិសាស្ត្រ (Geographic Indication) ហើយការនាំចេញម្រេចបានកើនឡើងជិត១០ដង ក្នុងរយៈពេល១០ឆ្នាំចុងក្រោយនេះ។
ប្រភពដដែលបន្តថា បច្ចុប្បន្ននេះ អូស្ត្រាលីកំពុងសហការជាមួយក្រុមហ៊ុន ធូ ផារ៉ុត អ៊ីនធឹប្រាយ ( Two Parrots Enterprise) ដើម្បីជួយកសិករដាំម្រេចក្នុងខេត្តត្បូងឃ្មុំ។ ភាពជាដៃគូនេះជួយគ្រួសារកសិករឲ្យបំពេញតាមស្តង់ដារ កសិកម្មសកលល្អ (Global Good Agricultural Practice) ដែលជាស្តង់ដារអន្តរជាតិសម្រាប់កសិកម្មប្រកបដោយសុវត្ថិភាព និងនិរន្តរភាព។
បើតាមប្រភពដដែល បានឱ្យដឹងទៀតថា កសិករទទួលបានការបណ្តុះបណ្តាលដើម្បីដាំម្រេចប្រកបដោយសុវត្ថិភាព និងគុណភាពខ្ពស់ អាចចូលទីផ្សារនាំចេញដែលមានតម្លៃខ្ពស់ និងបង្កើនប្រាក់ចំណូលតាមរយៈទិន្នផលខ្ពស់ និងមានស្ថេរភាព។
ស្ថាទូតអូស្រ្តាលសង្កត់ធ្ងន់ទៀតថា អូស្ត្រាលី និងកម្ពុជា កំពុងរួមគ្នាលើកកម្ពស់សុវត្ថិភាពចំណីអាហារ ការរស់នៅប្រសើរឡើង និងការនាំចេញផលិតផលកសិអាហារ ដែលមានស្តង់ដារកម្រិតពិភពលោក។
ទាក់ទិននឹងបញ្ហាខាងលើនេះ កញ្ញា ពេជ្រ ចាន់ធឿន ប្រធានផ្នែកទីផ្សារនៃសហគមន៍កសិកម្មទំនើបម្រេចមេមត់ត្បូងឃ្មុំ ស្ថិតក្នុងឃុំត្រមូង ស្រុកមេមត់ ខេត្តត្បូងឃ្មុំ បានិយាយថា ការជួយកសិករដាំដំណាំម្រេចពីប្រទេសអូស្ត្រាលី ឱ្យមានការទទួលស្គាល់នៅលើទីផ្សារអន្តរជាតិនេះ គឺជារឿងល្អ និងចាំបាច់បំផុត ដើម្បីឱ្យម្រេចរបស់កម្ពុជាកាន់តែមានគុណភាព និងអាចនាំចេញទៅកាន់ទីផ្សារក្រៅប្រទេសបាន។
កញ្ញាប្រាប់ទូរទស្សន៍អនឡាញ ARDBថា «ខ្ញុំគិតថាល្អព្រោះបច្ចុប្បន្នខាងសហគមក៍កំពុងជំរុញការដាំដុះម្រេចអភិវឌ្ឍន៍ទៅជាសរីរាង្គដែរ ដើម្បីបង្កើនគុណភាព សុវត្ថិភាពចំណីអាហារ និងការប្រកួតប្រជែងតម្លៃលើទីផ្សារអន្តរជាតិ»។
ក្នុងពេលអមដំណើរឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដឹកនាំគណៈប្រតិភូសហភាពអ៊ឺរ៉ុបប្រចាំកម្ពុជា ចុះធ្វើទស្សនកិច្ចសិក្សាស្វែងយល់ពីខ្សែសង្វាក់ផលិតកម្មដំណាំម្រេចរបស់ «សហគមន៍កសិកម្មទំនើបម្រេចមេមត់ត្បូងឃ្មុំ»កាលពីថ្ងៃទី២៨ វិច្ឆិកា ឆ្នាំ២០២៤ ឯកឧត្តម ប៉ែន កុសល្យ អភិបាលខេត្តត្បូងឃ្មុំ បានជម្រាបគណៈប្រតិភូថា ខេត្តត្បូងឃ្មុំមានផ្ទៃដីផលិតកម្មដំណាំកសិកម្ម និងកសិឧស្សាហកម្មប្រមាណ២៩០ ៨១៤ហិកតា ។
ឯកឧត្តមបន្តថា ក្នុងនោះដំណាំស្រូវមានប្រមាណ៨៨ ៥៥០ហិកតា ដំណាំកៅស៊ូប្រមាណ៨១ ៩១៤ហិកតា ដំណាំដំឡូងមីមានប្រមាណ៥ ៣៧១០ហិកតា ស្វាយចន្ទីប្រមាណ៣៦ ៤៦០ហិកតា ពោតក្រហមប្រមាណ ១១ ៨៣០ហិកតា និងដំណាំម្រេចប្រមាណ៣ ៣៧០ហិកតា៕
