ដោយ រស្មី
សៀមរាប៖ ស្ថានីយកសិឧតុនិយម បានកំពុងដើរតួនាទីសំខាន់សម្រាប់ បម្រើដល់វិស័យកសិកម្ម ពិសេសប្រជាកសិករតាមទីជនបទអាចពឹងពាក់តាមរយៈបច្ចេកវិទ្យាថ្មី ក្នុងការរាយការណ៍ព័ត៌មានទាក់ទងទៅនឹងរបបទឹកភ្លៀង កម្តៅប្រចាំថ្ងៃ និងព័ត៌មានពីកសិកម្មនានា ដែលអំណោយផលយ៉ាងល្អក្នុងការដាំដុះដំណាំស្របតាមយុគសម័យថ្មី។
គួរបញ្ជាក់ថាការដំឡើងស្ថានីយ កសិឧតុនិយម ស្ថិតនៅក្នុងក្របខណ្ឌគម្រោងគជ់ ដែលមានរយៈពេលប្រាំមួយឆ្នាំ ដែលមកដល់ពេលនេះគម្រោងនេះអនុវត្តជិត៣ឆ្នាំ។ គម្រោងនេះទទួលថវិកាពីមូលនិធិអាកាសធាតុបៃតង និងអនុវត្តដោយក្រសួងកសិកម្ម រុក្ខាប្រមាញ់ និងនេសាទ,ក្រសួងបរិស្ថាន ,ក្រសួងធនធានទឹក និងឧតុនិយម។ តាមរយៈគម្រោងនេះក្រោយពីការដំឡើងស្ថានីយ រួចកសិករទទួលបានព័ត៌មានកាន់តែប្រសើរ តួយ៉ាងព័ត៌មានស្តីពីអាកាសធាតុ ហើយការណ៍នេះនឹងជួយលើកកម្ពស់ចំណេះដឹងរបស់កសិករក្នុងការបង្កបង្កើនផលដំណាំរបស់ពួកគាត់។
ក្នុងពិធីសម្ពោធ ប្រគល់ស្ថានីយកសិឧតុនិយម ដែលធ្វើឡើងនៅភូមិជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាបនាពាក់កណ្តាលខែឧសភា ឆ្នាំ២០២៦នេះ និស្សិតចំនួនបួនរូប ដែលបានទទួលអាហាររូបករណ៍រៀនជំនាញលើវិស័យកសិឧតុនិយម និងជលសាស្ត្រឧតុនិយមនៅប្រទេសចិន បានលើកឡើងថាកម្ពុជា ជាប្រទេសកសិកម្ម ម្ល៉ោះហើយការពង្រឹងលើមុខជំនាញកសិកម្មជារឿងសំខាន់សម្រាប់លើកស្ទួយវិស័យកសិកកម្មនៅកម្ពុជា។ វានឹងជួយឱ្យកសិករមានសមត្ថភាព និងកាន់តែច្បាស់លាស់ក្នុងការប្រកបរបស់កសិកម្ម។
កញ្ញា សុខ សិរិតា និស្សិតអាហាររូបករណ៍ទៅរៀននៅប្រទេសចិន បានបញ្ជាក់ប្រាប់ថា របរកសិកម្មជាបញ្ហាស្នូលរបស់កសិករខ្មែរ ម្ល៉ោះហើយកសិករគ្រប់រូបត្រូវតែស្វែងយល់បន្ថែមក្នុងមុខរបររបស់ខ្លួនដោយធ្វើយ៉ាងណាឱ្យការដាំដំណាំកសិកររីកចម្រើនទៅមុខ និងមិនជួបនូវបញ្ហាបរាជ័យ ហើយជីវភាពរបស់ពួកគាត់ក៏ល្អប្រសើ់រ។
និស្សិតវ័យ២៣ឆ្នាំរូបនេះ បានប្រាប់ទៀតថា ក្រោយបញ្ចប់ការសិក្សា កញ្ញានឹងចូលរួមផ្សព្វផ្សាយ និងបណ្តុះបណ្តាលប្រជាកសិករ ដែលធ្លាប់តែដាំដំណាំបែបប្រពៃណី ឱ្យផ្លាស់ប្តុរមកធ្វើកសិកម្មបែបថ្មី និងទំនើបវិញ។
ចំណែកលោក គង់ សេរីមង្គល ជានិស្សិតអាហាររូបករណ៍នៅប្រទេសចិនមួយរូបទៀត បានឱ្យដឹងថា កសិកម្មពឹងផ្អែកសំខាន់លើទឹក ហេតុនេះការសិក្សាទៅលើវិស័យធនធានទឹកសម្រាប់កសិករមិនអាចខ្វះបានទេ។ ដូច្នេះការផ្សព្វផ្សាយ និងការបណ្តុះបណ្តាលកសិករពីរបបទឹកភ្លៀង គ្រោះរាំងស្ងួត ខ្យល់ព្យុះ និងការតាមដានអាកាសធាតុ ជារឿងសំខាន់។ កសិករត្រូវតែស្វែងយល់ ហើយការពារជាប់ជាប្រចាំ។ ក្រៅពីនេះការជ្រើសរើសពូជដំណាំ ដែលស៊ូនឹងអាកាសធាតុ ការដាំដុះទៅតាមការប្រែប្រួលអាកាសធាតុ ពួកគាត់ក៏ត្រូវយល់ដឹងដូចគ្នា។ ចំណេះដឹងទាំងអស់នេះនឹងជួយឱ្យកសិកម្មមិនប្រឈមក្នុងរបរកសិកម្មរបស់ពួកគាត់បន្តទៀត។
ឯកឧត្តមបណ្ឌិត អឿង ចន្ថា អនុរដ្ឋលេខាក្រសួងធនធានទឹក និងឧតុនិយម បានឱ្យដឹងថា កសិករតាំងតែពីបុរាណមក គឺពួកគាត់បានពឹងផ្អែកលើមេឃសុទ្ធសាធ ប៉ុន្តែពេលបច្ចុប្បន្ន ពួកគាត់នឹងតាមដានព័ត៌មានបែបបច្ចេកវិទ្យា ដែលផ្តល់ភាពងាយស្រួលក្នុងការសម្រេចចិត្តដាំដុះ ដើម្បីអាចទទួលបានលទ្ធផលល្អ។ ក្នុងនេះព័ត៌មានតាមអែបនឹងផ្តល់ឱ្យកសិករបានដឹងថា ពេលណាមានទឹក ឬក៏អត់ទឹកដើម្បីងាយស្រួលជ្រើសរើសក្នុងការដាំដុះរបស់ពួកគាត់។
លោកស្រី រេបេកាស អូលីវៀ បេល (Rebekah Olivia Bell) តំណាងអង្គការស្បៀងអាហារ និងកសិកម្មរបស់អង្គការសហប្រជាជាតិ (Food and Agriculture Organization) ប្រចាំនៅកម្ពុជា បានឱ្យដឹងថា ការផ្តល់អាហារូបករណ៍ដល់និស្សិតកម្ពុជាទាំងបួនរូបទៅសិក្សាផ្នែកកសិឧតុនិយម និងជលសាស្ត្រឧតុនិយម នៅក្រៅប្រទេសអាចលើកស្ទួយ អភិវឌ្ឍន៍វិស័យកសិកម្ម ធនធានទឹកនៅកម្ពុជា។ នៅពេលពួកគេត្រឡប់មកវិញ ពួកគេនឹងជួយដល់ការអភិវឌ្ឍវិស័យធនធានទឹក និងកសិកម្ម ជាពិសេសជួយដល់កសិករក្នុងការបន្សាំខ្លួនទៅនឹងការប្រែប្រែអាកាសធាតុ។
គួរបញ្ជាក់ថា និស្សិតទាំងបួនរូប ដែលបានរៀនជំនាញលើវិស័យកសិឧតុនិយម និងជលសាស្ត្រឧតុនិយមតាមគម្រោង នឹងចេញដំណើរទៅសិក្សានៅប្រទេសសចិន អំឡុងខែកញ្ញា ឆ្នាំ២០២៦នេះ ហើយនឹងបញ្ចប់នៅឆ្នាំ២០២៨។ និស្សិតទាំងបួនរូបមានកញ្ញា សុខ សិរិតា អាយុ២៣ឆ្នាំ, លោក គង់ សេរីមង្គល អាយុ២៦ឆ្នាំ, កញ្ញា រ័ត្ន សុវណ្ណអរិយា អាយុ២២ឆ្នាំ និងកញ្ញា ជា សុធារ័ត្ន អាយុ២៧ឆ្នាំ៕
