ដោយ អៀវ ឈៀងនី
ស្រុកស្អាង៖ ក្នុងចំណោមប្រជាពលរដ្ឋជាងបួនម៉ឺនគ្រួសារ នៅក្នុងស្រុកស្អាង មានពលរដ្ឋជាង៦០ភាគរយ បានប្រកបមុខរបរកសិកម្ម ដែលក្នុងនោះមានដូចជាការដាំដុះដំណាំស្រូវ ពោតក្រហម អំពៅ បន្លែគ្រប់មុខ ស្វាយ ពុទ្រា ឈូក មៀន និងត្របែកជាដើម។
លោក ឃុត ផល្លា អភិបាលរងនៃគណៈអភិបាលស្រុកស្អាង បានបញ្ជាក់ថា ស្រុកស្អាងមានប្រជាពលរដ្ឋប្រកបមុខរបរកសិកម្ម៦០,២ភាគរយ,សេវាកម្ម១៨,៦ភាគរយ, ជាកម្មករ កម្មការនី ១៨,៨ភាគរយ,សិប្បកម្មផ្សេងៗ០,៥ភាគរយ, និងជាមន្ត្រីរាជការ១,៩ភាគរយ។
លោកអភិបាលស្រុកបានបញ្ជាក់បែបនេះនៅក្នុងពិធីជួបសំណេះសំណាលសួរសុខទុក្ខប្រជាកសិករក្នុងស្រុកស្អាង ក្រោមអធិបតីភាពឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនគារអភិវឌ្ឍន៍ធនបទ និងកសិកម្ម និងជាប្រធានសមាគមបណ្តាញកសិករតេជោ កាលពីថ្ងៃទី១៥ ខែឧសភា ឆ្នាំ២០២៦។
លោក ឃុត ផល្លា បានឱ្យដឹងទៀតថា ស្រុកស្អាង ជាស្រុកមួយស្ថិតក្នុងចំណោមក្រុង-ស្រុកទាំង១៣ របស់ខេត្តកណ្តាល មានទន្លេបាសាក់ហូរកាត់ចំកណ្តាល ចែកចេញជា១២ឃុំ មាន១២០ភូមិ មានផ្ទៃដីសរុបចំនួន៤៣៥,៨៩គីឡូម៉ែត្រក្រឡា។
លោកបានបន្តទៀតថា ក្នុងស្រុកស្អាង សរុបផ្ទៃដីគ្រោងដំណាំស្រូវមានចំនួន៨ ២៧០ហិកតា អនុវត្តស្រូវពង្រួស បានចំនួន៨ ២៧០ហិកតា ប្រមូលផលបានចំនួន៨ ២៧០ហិកតា។ ចំណែកដំណាំអនុផល ផ្ទៃដីគ្រោងមាន២ ៧០៥ហិកតា ក្នុងនោះ មានដំណាំដូចជា៖ ពោតក្រហម១៣៥ហិកតា, អំពៅ១៥ហិកតា, បន្លែគ្រប់មុខ២ ៤៩៥ហិកតា និងឈូក២៩ហិកតា។ ដោយឡែក ដំណាំឈើហូបផ្លែ មានស្វាយកែវរមៀតចំនួន៩៥០ហិកតា, ចេក៤៣ហិកតា, ដូង៦ហិកតា, ពុទ្ធោ និងត្របែក២៣ហិកតា, ម្មុត និងមៀន៦ហិកតា។
គួរបញ្ជាក់ថា បើយោងតាមរបាយការណ៍របស់លោកអភិបាលរងស្រុកស្អាង បានបង្ហាញថា ស្រុកស្អាង បានបង្កើតសហគមន៍ចំនួន១០ រួមមានសហគមន៍បន្លែចំនួន៨, សហគមន៍ប្រើប្រាស់ទឹកចំនួន១, និងសហគមន៍ស្រូវចំនួន១។ បន្ថែមពីនេះ បានបង្កើតជាបណ្តុំអាជីវកម្មចំនួន៣៧ក្រុម ក្នុងនោះ ក្រុមដាំបន្លែសុវត្ថិភាពមាន២៤ក្រុម និងក្រុមចិញ្ចឹមមាន់មានចំនួន៨ក្រុម បណ្ដុំកសិករ៣២ក្រុម មានសមាជិកចំនួន៨៤៨នាក់៕
