កូប៉ិនហាក៖ ឧស្សាហកម្មនេសាទនៅទ្វីបអឺរ៉ុប បានអំពាវនាវឱ្យមានការដាក់ទណ្ឌកម្មពាណិជ្ជកម្មប្រឆាំងនឹងប្រទេសមិនមែនជាសមាជិកសហភាពអឺរ៉ុប ទទួលខុសត្រូវក្នុងការនេសាទហួសកម្រិតលើអម្បូរត្រីកាម៉ុង ដែលជាស្តុកត្រីដ៏មានតម្លៃបំផុតមួយរបស់ប្រទេសអៀរឡង់។
អ្នកនាំពាក្យរបស់គណៈកម្មការអឺរ៉ុប បាននិយាយថា ការនេសាទត្រីកាម៉ុង គឺប្រាកដណាស់គួរតែផ្អាកក្នុងរយៈពេលពីរឆ្នាំ ប្រសិនបើកិច្ចព្រមព្រៀងមិនត្រូវបានសម្រេច ក្នុងអំឡុងពេលកិច្ចពិភាក្សាជាបណ្តាប្រទេសស្ថិតនៅតាមឆ្នេរសមុទ្រ នាពេលខាងមុខ។
ការនេសាទត្រីកាម៉ុងហួសកម្រិតត្រូវបានគេប៉ាន់ប្រមាណថា នឹងធ្វើឱ្យវិស័យនេសាទរបស់ប្រទេសអៀរឡង់ បាត់ប្រាក់ចំណួលចន្លោះពី៦៩ ទៅ៨៩លានដុល្លារ។
អ្នកនាំពាក្យរបស់គណៈកម្មការអឺរ៉ុប បាននិយាយថា មានតម្រូវការជាបន្ទាន់ដើម្បីបញ្ឈប់សកម្មភាពនេសាទត្រីកាម៉ុងហួសកម្រិត ដោយងាកមកអនុវត្តតាមកម្រិតនៃការចាប់ត្រី ដែលត្រូវបានណែនាំដោយក្រុមប្រឹក្សាអន្តរជាតិសម្រាប់ការស្រាវជ្រាវតាមសមុទ្រ។
សេចក្តីណែនាំបែបវិទ្យាសាស្ត្រនឹងត្រូវលើកទៅពិភាក្សា នាសប្តាហ៍ក្រោយរបស់ក្រុមប្រទេសស្ថិតនៅតាមឆ្នេរសមុទ្រនៃសហភាពអឺរ៉ុប ចក្រភពអង់គ្លេស ន័រវែស កោះហ្វារ៉ូ កោះអ៊ីស្លង់ និងប្រទេសហ្គ្រីនឡែន ដែលត្រូវជួបប្រជុំគ្នាជារៀងរាល់ឆ្នាំ ក្រោមការឧបត្ថម្ភរបស់គណៈកម្មការជលផលអាត្លង់ទិកខាងជើង។
ការចរចាត្រូវបានគេរំពឹងថា នឹងមានតម្លៃខ្ពស់ និងឯកភាពលើកូតា ដែលអាចជួយការពារស្តុកត្រីក្នុងសមុទ្រ ដើម្បីរក្សាបាននូវលទ្ធភាពសេដ្ឋកិច្ច។
បណ្តាប្រទេសនៅតាមឆ្នេរសមុទ្រមួយចំនួន ដែលមិនមែនជាសមាជិកសហភាពអឺរ៉ុប បានកំណត់កូតាដោយខ្លួនឯង អំពីបរិមាណត្រូវនេសាទត្រីកាម៉ុង ក្នុងរយៈពេលប៉ុន្មានឆ្នាំកន្លងមកនេះ ដែលគេហៅថា ជាកូតាឯកតោភាគី។
ក្រុមប្រឹក្សាអន្តរជាតិសម្រាប់ការស្រាវជ្រាវតាមសមុទ្រ បានផ្តល់ដំបូន្មានថា លទ្ធផលនៃកូតាឯកតោភាគី បណ្តាលឱ្យមានការនេសាទត្រីកាម៉ុង កើនឡើងលើសពីកម្រិតមានចែងក្នុងសេចក្តីណែនាំបែបវិទ្យាសាស្រ្ត រហូតដល់ទៅ៣៩ភាគរយតាំងពីឆ្នាំ២០២០រហូតមក។
អ្នកនាំពាក្យរបស់គណៈកម្មាការដដែលនេះ បាននិយាយទៀតថា ត្រូវចាត់វិធានការជាបន្ទាន់ និងច្បាស់លាស់ ដោយចាប់ផ្តើមពីការរៀបចំចែករំលែកព័ត៌មានឱ្យបានច្បាស់លាស់។
អ្នកនាំពាក្យរូបនេះ បាននិយាយថា គណៈកម្មការមានការព្រួយបារម្ភយ៉ាងខ្លាំងចំពោះការបន្តនេសាទហួសកម្រិត និងការរៀបចំកូតា ដែលបានបំប៉ោងដោយប្រទេសមួយចំនួន។
ពួកគេបាននិយាយថា ប្រសិនបើការរៀបចំចែករំលែកព័ត៌មានច្បាស់លាស់មិនសម្រេចបានក្នុងអំឡុងពេលកិច្ចពិភាក្សាទេនោះ អនុសាសន៍បែបវិទ្យាសាស្រ្តសម្រាប់ស្តុកត្រីកាម៉ុង នៅឆ្នាំ២០២៧ នឹងលែងនេសាទបានត្រីច្រើនទៀតហើយ។
គណៈកម្មាការនេះបានទទួលស្គាល់ថា ចំណាត់ការបែបនេះនឹងមានផលប៉ះពាល់យ៉ាងអាក្រក់ដល់មនុស្ស ដែលរស់នៅពឹងផ្អែកលើការនេសាទត្រីកាម៉ុង។ ពួកគេបានស្នើឱ្យបណ្តាប្រទេសស្ថិតនៅតាមឆ្នេរសមុទ្រទាំងអស់ សូមបន្តធ្វើការជាមួយគ្នាក្នុងប៉ុន្មានថ្ងៃខាងមុខនេះ ដើម្បីស្វែងរកកិច្ចព្រមព្រៀងឱ្យបានច្បាស់លាស់។
ចំណែកនាយកប្រតិបត្តិនៃអង្គការអ្នកនេសាទ បាននិយាយថា សេចក្តីថ្លែងការណ៍របស់គណៈកម្មាការមិនបានធ្វើឱ្យអ្នកនេសាទមានភាពកក់ក្តៅឡើយ។
លោកបាននិយាយថា សេចក្តីថ្លែងការណ៍របស់គណៈកម្មការអឺរ៉ុប គឺគ្រាន់តែបញ្ជាក់ឡើងវិញនូវតម្រូវការសម្រាប់រៀបចំចែករំលែកព័ត៌មានឱ្យបានច្បាស់លាស់ ដោយមិនមានការចង្អុលបង្ហាញថា នឹងមានអ្វីកើតឡើងប្រសិនបើគ្មានកិច្ចព្រមព្រៀងណាមួយទេនោះ។
លោកបាននិយាយថា សេចក្តីថ្លែងការណ៍នេះ គ្រាន់បញ្ជាក់អំពីបញ្ហា និងលទ្ធផលចុងក្រោយ ប៉ុន្តែវាមិនបង្ហាញពីការប្តេជ្ញាចិត្តក្នុងការចាត់វិធានការច្បាស់លាស់ឡើយ។
លោកបាននិយាយថា ប្រសិនបើគ្មានសង្ឃឹមថា បណ្តាប្រទេសផ្សេងទៀតនឹងឯកភាពគ្នាទេ គណៈកម្មការអឺរ៉ុប ចាំបាច់ត្រូវតែចាត់វិធានការដាក់ទណ្ឌកម្មពាណិជ្ជកម្ម និងរហូតដល់ហាមឃាត់កប៉ាល់នេសាទរបស់ប្រទេសមិនមែនជាសមាជិកសហភាពអឺរ៉ុប អាចចូលនេសាទក្នុងដែនជលផលរបស់ប្រទេសផ្សេងទៀតឡើយ។
លោកបានទទូចថា «បើគ្មានទណ្ឌកម្មទេ បណ្តាប្រទេសជាប់មាត់ឆ្នេរសមុទ្រទាំងនេះ នឹងនេសាទត្រីកាម៉ុងរហូតវិនាសហិនហោច … ជាច្រើនឆ្នាំកន្លងមកហើយ ដោយសារការនេសាទហួសកម្រិត គ្មានការត្រួតពិនិត្យពីប្រទេសន័រវេស កោះអ៊ីស្លង់ និងកោះហ្វារ៉ូ ម្លេះសហព័ន្ធរុស្ស៊ីនឹងបំផ្លាញស្តុកត្រីកាម៉ុងទាំងអស់ឱ្យវិនាសសាបសូន្យជាក់ជាមិនខាន»៕ (ផាន់ អាណា)
