ហ្សាការតា៖ រដ្ឋាភិបាលឥណ្ឌូណេស៊ី បានចាប់ផ្តើមសម្អាតសារធាតុវិទ្យុសកម្ម សេស្យូម១៣៧ (Cesium-137) នៅតាមទីតាំងចំនួនពីរ ក្នុងតំបន់ឧស្សាហកម្មមួយកន្លែងស្ថិតនៅក្នុងខេត្តបានតេន ភាគខាងលិចទីក្រុងហ្សាការតា និងបន្តបោសសម្អាតនៅតាមទីតាំងផ្សេងទៀត។
អនុប្រធានផ្នែកគ្រប់គ្រងការបំពុល និងការខូចខាតបរិស្ថាននៃក្រសួងបរិស្ថាន បាននិយាយថា ទីតាំងចំនួន១០ ត្រូវបានគេកំណត់ថា មានជាតិពុលដោយវិទ្យុសកម្ម សេស្យូម១៣៧ ដែលគិតត្រឹមថ្ងៃទី២ ខែតុលា ឆ្នាំ២០២៥ ក្រុមការងាររដ្ឋាភិបាលឥណ្ឌូណេស៊ីទទួលបន្ទុកគ្រោះថ្នាក់វិទ្យុសកម្ម បានដកហូតធុងជ័រចំនួន២០ និងថង់ប្លាស្ទិកចំនួន១៧ថង់ ព្រមទាំងសម្ភារៈសម្រាប់បំពុលមួយចំនួនទៀត។
ការកម្ចាត់មេរោគកំពុងត្រូវបានអនុវត្តក្រោមការត្រួតពិនិត្យរបស់ទីភ្នាក់ងារគ្រប់គ្រងថាមពលនុយក្លេអ៊ែរ ដើម្បីធានាសុវត្ថិភាពកម្មករ និងពារការការប៉ះពាល់នឹងវិទ្យុសកម្មបន្ថែមទៀត។ វត្ថុធាតុកខ្វក់មានផ្ទុកកម្រិតវិទ្យុសកម្មខ្ពស់ ត្រូវបានជីកកកាយដោយប្រើឧបករណ៍ធុនធ្ងន់ ហើយបានផ្លាស់ប្តូរទៅកន្លែងរក្សាទុកជាបណ្តោះអាសន្នរបស់ក្រុមហ៊ុន។
លោកបាននិយាយថា «រដ្ឋាភិបាលបានប្តេជ្ញាអនុវត្តយ៉ាងខ្លាំងក្លានូវកិច្ចខិតខំប្រឹងប្រែងកាត់បន្ថយ និងគ្រប់គ្រងការចម្លងរោគ»។
យោងតាមរដ្ឋបាលចំណីអាហារ និងឱសថសហរដ្ឋអាមេរិក បានឱ្យដឹងថា ដំបូងឡើយបានរកឃើញការចម្លងរោគវិទ្យុសកម្ម សេស្យូម ១៣៧ ត្រូវបានគេរាយការណ៍ថា បានរកឃើញនៅក្នុងផលិតផលបង្គាបង្កក ដែលនាំចេញពីឥណ្ឌូណេស៊ីទៅកាន់ទីផ្សារសហរដ្ឋអាម៉េរិក។ ចំណែកក្រោយមកអាជ្ញាធរឥណ្ឌូណេស៊ីបានបិទទីតាំងក្រុមហ៊ុនកែច្នៃវេចខ្ចប់ ដែលសង្ស័យថា ជាប្រភពនៃការចម្លងរោគវិទ្យុសកម្មនៅក្នុងផលិតផលបង្គា។
កាលពីចុងខែកញ្ញា ឆ្នាំ២០២៥ រដ្ឋមន្ត្រីក្រសួងសម្របសម្រួលសម្រាប់ម្ហូបអាហារ បានបញ្ជាក់ថា ការចម្លងរោគវិទ្យុសកម្ម សេស្យូម ១៣៧ ត្រូវបានរក្សាទុកនៅក្នុងបរិវេណឧស្សាហកម្ម ហើយមិនប៉ះពាល់ដល់ខ្សែសង្វាក់ផ្គត់ផ្គង់ជាតិ ឬការនាំចេញឡើយ។
ក្រសួងសុខាភិបាលឥណ្ឌូណេស៊ី បានពិនិត្យកម្មករចំនួន១ ៥៦២នាក់ នៅក្នុងរង្វង់ផ្ទៃដីទំហំប្រាំគីឡូម៉ែត្រនៃតំបន់ឧស្សាហកម្ម។ អ្នកដែលត្រូវបានកំណត់អត្តសញ្ញាណថា ប្រឈមនឹងគ្រោះថ្នាក់សារធាតុវិទ្យុសកម្មនេះ ត្រូវបានព្យាបាលដោយឱសថឈ្មោះ ព្រូសៀន ប្លូ (Prussian Blue) ដែលជាឱសថសម្រាប់ស្រូបយកសារធាតុវិទ្យុសកម្ម សេស្យូម១៣៧ ចេញពីរាងកាយអ្នកជំងឺ។
ប្រទេសឥណ្ឌូណេស៊ី គឺជាប្រទេសនាំចេញផលិតផលបង្គាធំជាងគេទី៥ របស់ពិភពលោក ដែលមានបរិមាណបង្គាប្រមាណចំនួនប្រាំមួយភាគរយនៃការនាំចេញលើពិភពលោក។ ក្នុងនោះ ប្រហែលពីរភាគបីផលិតផលបង្គាទាំងនេះត្រូវបាននាំចេញទៅកាន់ទីផ្សារសហរដ្ឋអាម៉េរិក។
យោងតាមទិន្នន័យ បានឱ្យដឹងថា ប្រទេសឥណ្ឌូណេស៊ីបាននាំចេញបង្គាប្រហែល២១៥ ០០០តោន ដែលមានតម្លៃប្រហែល១,៧ពាន់លានដុល្លារ។ សហរដ្ឋអាម៉េិក គឺជាទីផ្សារចម្បងសម្រាប់បង្គាឥណ្ឌូណេស៊ីដែលមានចំនួន៦៣,៧ភាគរយនៃការនាំចេញសរុប បន្ទាប់មក គឺប្រទេសជប៉ុន។
លោកបាននិយាយថា ប្រសិនបើរឿងនេះនៅតែបន្តកើតមាន គ្រួសារអ្នកនេសាទឥណ្ឌូណេស៊ីរាប់លាន ដែលពឹងផ្អែកលើឧស្សាហកម្មនេះ នឹងប្រឈមមុខបាត់បង់ការងារធ្វើំ។
ប្រទេសឥណ្ឌូណេស៊ីបានបង្កើតក្រុមការងារមួយ បន្ទាប់ពីរដ្ឋបាលចំណីអាហារ និងឪសថររបស់សហរដ្ឋអាម៉េរិកបានចេញសេចក្តីណែនាំដល់អ្នកប្រើប្រាស់ អ្នកចែកចាយ និងអ្នកលក់ជនជាតិអាម៉េរិក មិនត្រូវបរិភោគ លក់ ឬធ្វើម្ហូបបង្គា បង្កកនាំចូលពីប្រទេសឥណ្ឌូណេស៊ី ដែលផ្ទុកសារធាតុវិទ្យុសកម្ម សេស្យូម ១៣៧ ភាយចេញពីកន្លែងសាកល្បងនុយក្លេអ៊ែរនាំពេលកន្លងមក៕
