កូឡូញ៖ ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា នៅក្នុងកំឡុងពេលបំពេញបេសកកម្មដឹកនាំក្រុមហ៊ុន ដែលជាសមាជិកចូលរួមការតាំងពិព័រណ៍អន្តរជាតិ Anuga International Food Fair 2025 កាលពីថ្ងៃទី៦ ខែតុលា ឆ្នាំ២០២៥នេះ បានអញ្ជើញចូលរួមជាវាគ្មិន នៅក្នុងវេទិកាស្រូវអង្ករលើកទី៧ (7th Eurofins Anuga Rice Conference) នៅទីក្រុងកូឡូញ ប្រទេសអាឡឺម៉ង់ ដែលវេទិកានេះផ្តោតលើប្រធានបទ ស្ថានភាពការប្រឈម និងឱកាសនៃការធ្វើពាណិជ្ជកម្មស្រូវអង្ករអន្តរជាតិនាពេលបច្ចុប្បន្ន-Current Opportunities and Challenges for International Rice Trade។
នៅក្នុងកម្មវិធីនេះដែរក៏មានវាគ្មិនមកពីសហរដ្ឋអាម៉េរិក ប៉ាគីស្ថាន អាឡឺម៉ង់ និងអ្នកជំនាញផ្នែកស្រូវនិរន្តរភាព អ្នកវិទ្យាសាស្ត្រស្រូវអំពី DNA ស្រូវអង្ករ និងការគ្រប់គ្រងថ្នាំពុលកសិកម្ម និងសារធាតុនៅក្នុងគ្រាប់អង្ករផងដែរ។
ឧកញ៉ា ឡាយ ឈុនហួ ក៏បានបង្ហាញដល់អង្គវេទិកានូវសក្តានុពលនៃការដាំដុះ ការកែច្នៃ និងការនាំចេញអង្កររបស់កម្ពុជា ព្រមទាំងផែនការ និងគោលនយោបាយមួយចំនួនរបស់សហព័ន្ធស្រូវអង្ករ ដោយមានការគាំទ្រពីរាជរដ្ឋាភិបាល ក្នុងការជំរុញផលិតកម្ម ដាំដុះ ការកិនកែច្នៃ និងការនាំចេញអង្ករ។
ចំណែកឯកឧត្តម បាន លឹម អគ្គនាយករងនៃធនាគារអភិវឌ្ឍន៍ជនបទ និងកសិកម្ម (ARDB) ក៏បានចូលរួមពិព័រណ៍ពាណិជ្ជកម្មអន្តរជាតិ ANUGA 2025 នៅ ទីក្រុងកូឡូញ ប្រទេសអាល្លឺម៉ង់ ចាប់ពីថ្ងៃទី៣ ដល់ថ្ងៃទី១០ ខែតុលា ឆ្នាំ២០២៥ ដោយមានការចូលរួមពីអ្នកកតាំងពិព័រណ៍ប្រមាណ៨ ០០០នាក់ និងភ្ញៀវប្រមាណ១៧០ ០០០នាក់ មកពីបណ្តាប្រទេសជាង២០០ ក្នុងវិស័យពាណិជ្ជកម្ម, ផលិតកម្ម, សេវាកម្ម, និងបច្ចេកវិទ្យាចំណីអាហារ ដើម្បីពិភាក្សាលើបញ្ហាចម្បង និងបង្ហាញពីនវានុវត្តន៍ក្នុងវិស័យឧស្សាហកម្មចំណីអាហារ និងភេសជ្ជៈ។
ពិព័រណ៍ពាណិជ្ជកម្មអន្តរជាតិ ANUGA 2025នេះ គឺជាវេទិកាអន្តរជាតិដ៏ធំបំផុតសម្រាប់ឧស្សាហកម្មចំណីអាហារ និងភេសជ្ជៈពិភពលោក។ ANUGA 2025 មានពិព័រណ៍ពាណិជ្ជកម្មឯកទេសចំនួន១០ នៅក្រោមវេទិកាតែមួយ ដែលបង្ហាញពីទិដ្ឋភាពទូទៅ, នវានុវត្តន៍, និងនិន្នាការសំខាន់ៗ ក្នុងវិស័យឧស្សាហកម្មចំណីអាហារ និងភេសជ្ជៈ។
ការចូលរួមពិព័រណ៍ពាណិជ្ជកម្មនេះនឹងនាំមកនូវអត្ថប្រយោជន៍ជាច្រើន រួមមានការចូលរួមក្នុងសហគមន៍ឧស្សាហកម្មចំណីអាហារ និងភេសជ្ជៈធំបំផុតនៅលើពិភពលោក, ការផ្លាស់ប្តូរមតិជាមួយអ្នកជំនាញ និងអ្នកស្រាវជ្រាវ, ឱកាសតភ្ជាប់អាជីវកម្មជាមួយវិនិយោគិន និងពាណិជ្ជករ, និងទទួលបាននូវព័ត៌មានសំខាន់ៗ ក្នុងវិស័យឧស្សាហកម្មចំណីអាហារ និងភេសជ្ជៈ៕
