ខេត្តកំពង់ធំ: ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារ (ARDB) និងជាសមាជិកយុវជនគណបក្សថ្នាក់កណ្តាល ព្រមទាំងតំណាងសហគ្រិនវ័យក្មេង នារសៀលថ្ងៃទី១០ ខែកក្កដា ឆ្នាំ២០២៥នេះ បានអញ្ជើញចូលរួមថ្លែងសុន្ទរកថា នៅក្នុងសិក្ខាសាលាស្តីពីកាលានុវត្តភាព និងទិសដៅវិនិយោគសម្រាប់អនាគត ដែលសហការរៀបចំដោយសមាគមសហគ្រិនវ័យក្មេងកម្ពុជា និងយុវជនគណបក្សថ្នាក់កណ្តាល ផ្នែកសហគ្រិនវ័យក្មេង។
កម្មវិធីគាំទ្រដោយធនាគារ ARDB នេះ មានការអញ្ជើញចូលរួមពីឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងជាសមាជិកយុវជនគណបក្សថ្នាក់កណ្តាល, ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងជាសមាជិកគណៈកម្មាធិការកណ្តាលយុវជនគណបក្សថ្នាក់កណ្តាល, ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិសហគ្រិនខ្មែរ និងឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជាផងដែរ។
នៅក្នុងសិក្ខាសិលនោះ ឯកឧត្តមបណ្ឌិត កៅ ថាច បានមានប្រសាសន៍ថា នៅក្នុងសិក្ខាសាលានៅថ្ងៃនេះ ដែលរៀបចំឡើងដោយសមាគមសហគ្រិនវ័យក្មេងកម្ពុជា និងយុវជនគណបក្សថ្នាក់កណ្តាលផ្នែកសហគ្រិន គឺពិតជាមានសារៈសំខាន់ណាស់ ហើយសូមសម្តែងការកោតសរសើរដល់សហគ្រិនវ័យក្មេង ស្របពេលសេដ្ឋកិច្ចពិភពកំពុងតែមានភាពមិនប្រាកដប្រជា និងសេដ្ឋកិច្ចកម្ពុជាដែលក៏កំពុងតែមានការងើបឡើង ដែលបង្ហាញឲ្យឃើញនូវសូចនករមួយនៃការជំរុញសេដ្ឋកិច្ចក្នុងស្រុកផងដែរ។
ឯកឧត្តមបណ្ឌិតប្រតិភូ បានមានប្រសាសន៍ទៀតថា សហគ្រិនមិនត្រឹមតែបង្កើតអាជីវកម្មប៉ុណ្ណោះទេ ប៉ុន្តែក៏ជាការចូលរួមចំណែកនៃការកសាងជាតិរបស់ពួកគាត់ ជាពិសេស ការបង្កើតអាជីវកម្មបៃតង និងសេដ្ឋកិច្ចបៃតងជាដើម។
បន្ទាប់ពីអនុសាសន៍គន្លឹះរបស់ឯកឧត្តមបណ្ឌិត កៅ ថាច ជូនដល់សហគ្រិនវ័យក្មេង ឧកញ៉ា ប៉ិច បូឡែន បានឡើងថ្លែង និងរៀបចំកិច្ចពិភាក្សាយ៉ាងផុសផុល ដែលមានវាគ្មិនល្បីៗ ផ្តល់ឱកាសនៃការវិនិយោគថ្មីៗ សម្រាប់សហគ្រិនវ័យក្មេង ទាំងពេលបច្ចុប្បន្ន និងពេលអនាគត ដើម្បីចូលរួមចំណែកក្នុងការអភិវឌ្ឍន៍សង្គមជាតិ។
សម្រាប់ឯកឧត្តមបណ្ឌិត កៅ ថាច បានមានប្រសាសន៍បញ្ជាក់ថា បើយើងក្រឡែកមើលជាក់ស្តែង តាមពិតទៅវិស័យកសិកម្មកម្ពុជានៅតែបន្តរក្សាបាននូវស្ថិរភាពល្អ ទោះបីស្ថានភាពសេដ្ឋកិច្ចសកលមានភាពមិនច្បាស់លាស់ក៏ដោយ ហើយកំណើនវិស័យកសិកម្មទៀតសោធត្រូវបានគាំទ្រជាមួយអនុវិស័យមួយចំនួនដូចជា ដំណាំស្រូវ ដំណាំស្វាយចន្ទី ដំណាំកៅស៊ូ និងដំណាំដំឡូងមីជាដើម។
ទន្ទឹមនោះឯកឧត្តមបណ្ឌិតបានរំលឹកថា បច្ចុប្បន្ននេះ វិស័យកសិកម្មនេះកំពុងធ្វើធ្វើបដិវត្តន៍កម្មបែបទំនើប ដោយប្រើប្រាស់បច្ចេកវិទ្យាថ្មីៗ ទទួលបានទិន្នផលខ្ពស់ ក្នុងចក្ខុវិស័យឈានទៅរកការធ្វើកសិកម្មប្រកបដោយចីរភាព និងធានាបានបរិយាបន្នសេដ្ឋកិច្ច តាមរយ:ការទទួលបានការគាំទ្រហិរញ្ញពីរាជរដ្ឋាភិបាល។
បន្ទាប់ពីបទអន្តរាគមន៍របស់ឯកឧត្តមបណ្ឌិត កៅ ថាច នៅក្នុងកិច្ចពិភាក្សារួចមក ឯកឧត្តម នុត អ៊ុនវ័ណរ៉ា និងឯកឧត្តមបណ្ឌិត ឈៀង វណ្ណមុនិណ្ឌ ដែលមានការសម្របសម្រួលដោយឧកញ៉ា ប៉ិច បូឡែន បានមានប្រសាសន៍លើកឡើងពី ស្ថានភាពសេដ្ឋកិច្ចកម្ពុជា បញ្ហាប្រឈម និងការចាប់យកឱកាសថ្មីៗ សម្រាប់សហគ្រិនវ័យក្មេងទៅថ្ងៃអនាគតផងដែរ។
ឯកឧត្តមបណ្ឌិត កៅ ថាច ក្នុងនាមធនាគារអភិវឌ្ឍន៏ជនបទ និងកសិកម្ម បានផ្តល់ទស្សនវិស័យមួយចំនួនសម្រាប់កាលានុវត្តភាព និងទិសដៅវិនិយោគសម្រាប់ឱកាសអាជីវកម្មថ្មី និងទៅអនាគតដូចជា គឺទី១ មូលធនមនុស្ស ទី២ នវានុវត្តន៍កសិកម្ម ទី៣ ហេដ្ឋារចនាសម្ព័ន្ធបច្ចេកវិទ្យា ទី៤ ចីរភាពបរិស្ថាន ទី៥ ការកសាងសមត្ថភាពស្ថាប័ន ការត្រៀមខ្លួនសម្រាប់ឱកាសអាជីវកម្មថ្មី ក្នុងការរួមចំណែកអភិវឌ្ឍននៅក្នុងសង្គមជាតិទាំងមូល។
បន្ថែមពីនេះ ឯកឧត្តមបណ្ឌិត បានផ្តល់អនុសាសន៍ថា ការបង្កើតធុរកិច្ចរបស់សហគ្រិននីមួយៗមិនត្រឹមតែសម្រាប់ផលចំណេញទេ ប៉ុន្តែគឺជាការចូលរួមកសាងជាតិយ៉ាងសកម្ម ជាពិសេសការវិនិយោគទៅអនាគត៕
