ភ្នំពេញ៖ ក្រោយពីមានភ្លៀងធ្លាក់ជាបន្តបន្ទាប់នៅដើមខែមិថុនារហូតដល់ពេលសព្វថ្ងៃ។ នៅតំបន់តាមបណ្តាខេត្តមួយចំនួន កសិករ ,វារីវប្បករ បាននិងកំពុងចាប់ផ្តើមចិញ្ចឹមត្រីរបស់ខ្លួនជាបណ្តើរៗហើយនៅក្នុងគ្រាដែលដំបូងៗនេះដែរគេសង្កេតឃើញតម្រូវការកូនត្រីពូជមានសន្ទុះកើនឡើងខ្ពស់ ពិសេសកូនត្រីប្រាពូជ។
អ្នកស្រី ខ្លូត ស្រីនាង ម្ចាស់កសិដ្ឋាន ហង់ ហ៊ាង បង្កាត់ពូជនៅភូមិចក សង្កាត់រកាក្នុង ក្រុងដូនកែវ ខេត្តតាកែវ បានឱ្យដឹងថា ចាប់ពីខែមករារហូតដល់ខែឧសភាកន្លងមកនេះមានកសិករខ្លះបានដាក់កូនត្រីចិញ្ចឹមត្រីរបស់ខ្លួនរួចហើយ តែកសិករមួយចំនួនផ្សេងទៀតទាន់មិនទាន់បានធ្វើការចាប់ផ្តើមនោះទេ ដោយសារមិនមានទឹកគ្រប់គ្រាន់ ។ ដូចនេះការផ្គត់ផ្គង់កូនត្រីពូជដល់កសិករនៅមានចំនួនតិចតួច។ ប៉ុន្តែចូលដល់ខែមិថុនាមកនេះ បន្ទាប់ពីមានទឹកភ្លៀងធ្លាក់ជាបន្តបន្ទាប់ឃើញថាកសិករមានការកំម៉្មង់កូនត្រីពូជមានសន្ទុះកើនឡើងច្រើន ដោយពេលខ្លះការផ្គត់ផ្គង់កូនត្រីពូជស៊ឹងតែមិនទាន់ ព្រោះតម្រូវការមានច្រើនពេក។
អ្នកស្រីបន្តទៀតថា បច្ចុប្បន្នកសិដ្ឋានមានកូនត្រីពូជបានមានច្រើនប្រភេទ ដូចជាកូនត្រីអណ្តែង, កូនត្រីឆ្ពិន, កូនត្រីទីឡាព្យា, កូនត្រីក្រាញ់យក្ស និងកូនត្រីប្រា ហើយនៅក្នុងចំណោមកូនត្រីពូជទាំងនេះ សម្រាប់កូនត្រីប្រាមានតម្រូវការច្រើនជាងគេ។ ជាក់ស្តែងគិតមកទល់ខែមិថុនាឆ្នាំ២០២៥នេះ កសិករមានតម្រូវការកូនត្រីប្រាពូជជាង១លានកូននិងប្រភេទកូនម្សៅឬ កូនត្រីទើបភ្ញាស់បានប្រហាក់ប្រហែល១លានកូនត្រីផងដែរ។
បើតាមអ្នកស្រី ខ្លូត ស្រីនាង តម្លៃកូនត្រីប្រាពូជតម្លៃរបស់វាផ្អែកទៅលើទំហំឬខ្នាតរបស់កូនត្រី។ កូនត្រីប្រាមានទំហំ៧លីថ្លៃ៧០រៀល , ទំហំ៨លីថ្លៃ៨០រៀល និងទំហំ១០លីថ្លៃ ១០០រៀលនៅក្នុងកូនត្រីមួយក្បាល។
អ្នកស្រីលើកឡើងថា “ការចិញ្ចឹមត្រីជាមុខរបរសំខាន់សម្រាប់កសិករ។ ចំពោះខាងកសិដ្ឋានខ្ញុំវិញ ដែលជាអ្នកផលិតក្រៅពីផលិតបានគ្រប់គ្រាន់ឆ្លើយតបទៅនិងទីផ្សារ យើងអាចចូលរួមកាត់បន្ថយការនាំចូលកូនត្រីពូជមកពីខាងក្រៅបានផងដែរ”។
លោក ឡែមផូ វរិទ្ធ ប្រធានគណកម្មការប្រតិបត្តិសមាគមវារីវប្បករកម្ពុជាបានឱ្យដឹងថា តាមការសង្កេតរបស់សមាគមឃើញថា នៅតាមបណ្តាចំនួន១០នៅជុំវិញបឹងទន្លេសាប និងទន្លេមេគង្គ កសិករ វារីវប្បករបាននិងកំពុងត្រៀមទិញកូនត្រីពូជយកមកចិញ្ចឹមនៅពេលមានទឹកភ្លៀងធ្លាក់គ្រប់គ្រាន់ ។ នៅដើមខែមិថុនាឬពាក់កណ្តាលខែមិថុនាកសិករអាចដាក់កូនត្រីចិញ្ចឹមសម្រាប់តំបន់ខ្លះ ហើយសកម្មភាពរបស់ពួកគាត់អាចនឹងផុលផុស ទោះបីជាតម្លៃត្រីមួយចំនួន កន្លងមកមានការធ្លាក់ចុះក្នុងរដូវកាលប្រមូលខ្លះក៏ដោយ។
បើតាមលោក ឡែមផូ វរិទ្ធ, តម្លៃត្រីចាប់ពីខែមករារហូតដល់ខែឧសភាឆ្នាំ២០២៥កន្លងមកនេះនៅរក្សាបានថ្លៃល្អ កសិករនៅរកបានប្រាក់ចំណេញពីការប្រកបមុខរបរចិញ្ចឹមត្រី។ តែដោយឡែកនៅខែ៤និងដើមខែ៥កន្លងទៅនេះតម្លៃត្រីប្រា មានការធ្លាក់ចុះ ពី៥០០០រៀលមកនៅត្រឹមប្រមាណ៤៣០០រៀលក្នុងមួយគីឡូក្រាម ដោយសារកសិករនិងវារីប្បករនៅក្នុងស្រុកប្រមាណ៧៥ភាគរយ ចិញ្ចឹមត្រីប្រាច្រើន ជាហេតុធ្វើការផ្គត់ផ្គង់លើសពីតម្រូវការទីផ្សារ៕
