សិង្ហបុរី៖ ក្នុងគោលបំណងឆ្លើយតបតាមតម្រូវការត្រីនៅតាមទីផ្សារ ប្រទេសសិង្ហបុរី ចាប់ផ្តើមបង្កាត់ពូជត្រីទីឡាព្យាក្រហម ដែលអាចរស់រានមានជីវិតប្រសើរជាងមុន។
យោងតាមទីភ្នាក់ងារចំណីអាហារសិង្ហបុរី បានឱ្យដឹងថា គំនិតផ្តួចផ្តើមទាំងនេះ គឺនៅក្នុងផែនការវារីវប្បកម្មសិង្ហបុរី ដើម្បីបង្កើនប្រសិទ្ធភាពផលិតកម្មចំណីអាហារ។
អ្នកចិញ្ចឹមត្រីទីឡាព្យាពូជថ្មីនេះ ត្រូវចំណាយប្រាក់ប្រហែលកន្លះដុល្លារសិង្ហបុរី ក្នុងមួយក្បាល ដែលតម្លៃស្មើគ្នាកូនត្រីនាំចូលពីប្រទេសម៉ាឡេស៊ី និងឥណ្ឌូនេស៊ី។
សារព័ត៌មានសិង្ហបុរី បានចេញផ្សាយព្រោងព្រាតក្នុងសប្តាហ៍នេះ ដោយកស្រង់សម្តីមន្ត្រីសហព័ន្ធសហគ្រាសកសិកម្មសិង្ហបុរី ដែលបាននិយាយថា សមត្ថភាពផលិត និងចែកចាយកូនត្រីទីឡាព្យាក្រហម ដែលមានគុណភាពល្អ ត្រូវបានគេរំពឹងថា នឹងជួយកសិដ្ឋានក្នុងសិង្ហបុរី អាចបង្កើនបរិមាណផលិតកម្មរបស់ខ្លួន។
មជ្ឍមណ្ឌលបង្កាត់ពូជត្រីត្រីទីឡាព្យាក្រហមនេះ ទទួលបានជំនួយថវិកាពីទីភ្នាក់ងារសន្តិសុខស្បៀងសិង្ហបុរីដើម្បីភ្ញាស់ពូជត្រីថ្មី ដែលងាយស្រួលចិញ្ចឹមជាងប្រភេទត្រីមុនៗ។
នាយកប្រតិបត្តិរបស់ទីភ្នាក់ងារសន្តិសុខស្បៀង បាននិយាយថា កន្លងមក កសិដ្ឋានចិញ្ចឹមត្រីនៅក្នុងប្រទេសសិង្ហបុរី ធ្លាប់ប្រឈមនឹងការលំបាកដោយសារខ្វះពូជត្រីល្អ និងមានគុណភាពខ្ពស់ ដែលនាំចូលពីប្រទេសជិតខាង។
លោកបានបន្តទៀតថា «កសិដ្ឋានតែងតែប្រឹងស្វែងរកកូនត្រី ដែលគួរឲ្យទុកចិត្ត និងអាចផ្គត់ផ្គង់បានទៀតទាត។ កសិដ្ឋានចង់ដឹងថា មេពូជរបស់កូនត្រី ដែលគេទិញមកចិញ្ចឹមជាប្រភេទត្រីល្អ និងឆាប់ធំធាត់។ ដូច្នេះបញ្ហាប្រឈមមានច្រើនណាស់ ប្រសិនបើពួកគេត្រូវនាំចូលកូនត្រី ដោយមិនដឹងថា មេបារបស់វាជាពូជអ្វី និងមានប្រភពមកពីណា”។
លោកនាយកប្រតិបត្តិរបស់ទីភ្នាក់ងារសន្តិសុខស្បៀង បានមានប្រសាសន៍ទៀតថា ស្ថាប័នរបស់លោកក៏កំពុងពិនិត្យមើលពីរបៀបធ្វើឱ្យត្រីឆាប់លូតលាស់ធំធាត់ និងអត្រារស់រានរបស់ត្រីទីឡាព្យាពូជថ្មីនេះ ។
លោកបានបន្ថែមថា ការពង្រឹងគុណភាពត្រីទីឡាព្យា នឹងជួយឱ្យកសិដ្ឋានអាចទទួលបានប្រាក់ចំណេញ ដោយធានាបាននូវការផ្គត់ផ្គង់ត្រីសាច់ទៅកាន់ទីផ្សារឱ្យាបានគ្រប់គ្រាន់ និងបានទាន់ពេលវេលា។
ក្រោមគំនិតផ្តួចផ្តើមខាងលើ ពូជត្រីប្រភេទថ្មីនេះត្រូវចំណាយពេលប្រហែលប្រាំពីរខែ ដើម្បីចិញ្ចឹមឱ្យធំធាត់ល្អ បើប្រៀបធៀបទៅនឹងរយៈពេលសម្រាប់ត្រីធម្មតា គឺចំណាយពេល១០ខែ ទើបអាចប្រមូលផលបាន។
លោកបានមានប្រសាសន៍ថា “ការកាត់បន្ថយរយៈពេលមួយខែសម្រាប់ចិញ្ចឹម គឺអាចរកប្រាក់ចំំណេញបានយ៉ាងហោចណាស់១២ភាគរយដែរ។
ចំណែកលោកនាយករបស់មន្ទីរពិសោធផ្នែកកសិអាហារសិង្ហបុរី បានកត់សម្គាល់ថា ក្រៅពីភាពធន់របស់ត្រី កត្តាផ្សេងទៀត ដូចជាគុណភាពទឹក និងតម្លៃចំណីត្រីក៏អាចជួយដល់និរន្តរភាព និងការរីកចម្រើននៃកសិដ្ឋានចិញ្ចឹមត្រីនៅក្នុងប្រទេសផងដែរ។
លោកបានបន្ថែមថា គុណភាពទឹកត្រូវតែត្រួតពិនិត្យ ដើម្បីធានាថា ត្រីមិនឈឺ ហើយមិនបំពុលទឹកឡើយ។
លោកបានបន្តថា តម្លៃចំណីត្រីក៏មានពី៥០ ទៅ៧០ភាគរយនៃតម្លៃប្រតិបត្តិការរបស់កសិដ្ឋានចិញ្ចឹមត្រីធម្មតាដែរ។
នេះមានន័យថា កិច្ចខិតខំប្រឹងប្រែងណាមួយដើម្បីកែលម្អអត្រារស់រានមានជីវិតរបស់ត្រីទីឡាព្យា គឺជាការវិវឌ្ឍថ្មីមួយ ក្នុងការជំរុញវិស័យកសិកម្មក្នុងស្រុករបស់សិង្ហបុរី ឱ្យកាន់តែរីកចម្រើនថែមទៀត។
លោកបានបន្តទៀតថា ការខិតខំប្រឹងប្រែងរបស់ទីភ្នាក់ងារសន្តិសុខស្បៀងអាហារសិង្ហបុរី នឹងកាន់តែមានលទ្ធភាពអាចផ្គត់ផ្គង់ត្រីដល់ភោជនីយដ្ឋាន សណ្ឋាគារ និងកម្មវិធីជប់លៀងផ្សេង បន្ទាប់ពីត្រីបានធំធាត់មានទម្ងន់រហូតដល់មួយគីឡូក្រាម ក្នុងមួយក្បាល។
លោកបានមានប្រសាសន៍ថា នៅពេលនេះ មានកសិដ្ឋានកចិញ្ចឹមត្រីទីឡាព្យា ចំនួនប្រាំកន្លែងកំពុងតែផលិតកូនត្រីទីឡាព្យាប្រហែល៦០០គីឡូក្រាមក្នុងមួយសប្តាហ៍ ព្រមទាំងបានរៀបចំផែនការពង្រីកការចិញ្ចឹមឱ្យកាន់តែធំជាងមុនប្រាំដង ស្រប់តាមតម្រូវការទីផ្សារត្រីនៅប្រទេស។
នៅតាមបណ្តាភោជនីយដ្ឋានមួយចំនួនក្នុងប្រទេសសិង្ហបុរី អាចភ្លក្សរសជាតិត្រីទីឡាព្យាថ្មីនេះ ដែលត្រីសាច់ពូជបង្កាត់ថ្មីនេះនឹងចាប់ផ្តើមលក់លើទីផ្សារ នៅក្នុងខែមិថុនា ឆ្នាំ២០២៥នេះ៕
