អន្តរជាតិ៖ អាហ្រ្វិកខាងត្បូងកំពុងទន្ទឹងរង់ចាំកំណើនការនាំចេញផ្លែបឺរទៅកាន់ប្រទេសចិន ក្នុងរដូវកាលខាងមុខ។ នេះបានធ្វើឡើងបន្ទាប់ពីទីផ្សារចិនបានបើកការនាំចេញផ្លែបឺររបស់អាហ្វ្រិកខាងត្បូង។ ចាប់តាំងពីពេលនោះមក អាហ្រ្វិកខាងត្បូងបានដឹកជញ្ជូនផ្លែបឺរ ផ្ទុកក្នុងកុងតឺន័រទំហំ៤០ហ្វីតមួយគ្រឿង ដែលមានទម្ងន់សរុប២១តោន ទៅកាន់ប្រទេសចិន ក្នុងឆ្នាំ២០២៤។
ខណៈពេលដែលនេះតំណាងឱ្យត្រឹមតែ០,០៣ភាគរយនៃការនាំចេញផ្លែបឺរសរុបរបស់អាហ្រ្វិកខាងត្បូងចំនួនជាង៨ម៉ឺនតោន លោក ដេរិក ដុនគីន (Derek Donkin) នាយកប្រតិបត្តិនៃសមាគមអ្នកដាំដំណាំត្រូពិចអាហ្វ្រិកខាងត្បូងបានប្រាប់ថា ទីផ្សារចិនបង្ហាញពីឱកាសរីកចម្រើនដ៏ធំសម្រាប់អ្នកនាំចេញ និងកសិករអាហ្វ្រិកខាងត្បូង។
ចំណែកលោក ហាន បូយ៉ុម (Hans Boyum) នាយកពាណិជ្ជកម្មសម្រាប់ទ្វីបអាហ្រ្វិក ប្រចាំក្រុមហ៊ុន Westfalia Fruit ដែលជាក្រុមហ៊ុនដំបូងគេដែលនាំចេញផ្លែបឺរទៅប្រទេសកាន់ចិន បានយល់ស្របជាមួយនឹងការវាយតម្លៃរបស់លោក ដុនគីន ដែលបាននិយាយថា តម្រូវការផ្លែបឺរនៅក្នុងប្រទេសចិនត្រូវបានគេរំពឹងថា នឹងកើនឡើងជាលំដាប់ ជាពិសេសការយល់ដឹងរបស់អ្នកទទួលទានពីអត្ថប្រយោជន៍សុខភាពរបស់ផ្លែបឺរមានការកើនឡើង។
ការនាំចេញផ្លែបឺរដំបូងរបស់ក្រុមហ៊ុន Westfalia Fruit ត្រូវបានប្រើជាឧបករណ៍សម្រាប់វាស់ស្ទង់សមត្ថភាពរបស់ក្រុមហ៊ុនក្នុងការបំពេញតម្រូវការដ៏តឹងរ៉ឹងនៃពិធីការនាំចូលសម្រាប់ប្រទេសចិន ក៏ដូចជាការវាយតម្លៃការទទួលផ្លែបឺរនៅលើទីផ្សារប្រទេសចិន។
លោក បូយ៉ុម បាននិយាយថា៖’ដោយផ្អែកលើភាពជោគជ័យនៃកុងតឺន័រទីមួយ យើងមានទំនុកចិត្តក្នុងការបង្កើនការនាំចេញក្នុងឆ្នាំ២០២៥។ ទីផ្សារប្រទេសចិនកំពុងតែកើនឡើង ដោយសារចំណង់ចំណូលចិត្តអ្នកទទួលទានផ្លែបឺរ”។
ចំពោះបញ្ហាប្រឈមសំខាន់នាពេលបច្ចុប្បន្ន គឺផ្សព្វផ្សាយបង្កើនការយល់ដឹងដល់អ្នកទទួលទានអំពីចំណង់ចំណូលចិត្តចំពោះផ្លែបឺរ ព្រោះផ្លែបឺរនៅតែជាផលិតផលថ្មីនៅក្នុងប្រទេសចិន។ ហើយអ្នកផ្គត់ផ្គង់អាហ្រ្វិកខាងត្បូងក៏ប្រឈមនឹងការប្រកួតប្រជែងពីប្រទេសផ្សេងទៀត ដែលបានផ្គត់ផ្គង់ទីផ្សារអស់រយៈពេលជាច្រើនឆ្នាំកន្លងមកហើយ។
អាហ្រ្វិកខាងត្បូងក៏ទទួលបានទីផ្សារទៅកាន់ប្រទេសឥណ្ឌាសម្រាប់ផ្លែបឺរក្នុងឆ្នាំ២០២៤។ ទីផ្សារនេះក៏មានសក្តានុពលយ៉ាងខ្លាំងសម្រាប់អ្នកទទួលទានផ្លែបឺរដ៏ធំ។ ទោះជាយ៉ាងណាក៏ដោយ ដុនគីន បានទទួលស្គាល់ថា ពន្ធនាំចូលខ្ពស់៣០ភាគរយ ធ្វើឱ្យមានការលំបាកសម្រាប់អាហ្វ្រិកខាងត្បូង ក្នុងការប្រកួតប្រជែងជាមួយប្រទេសតង់ហ្សានី ដែលរីករាយនឹងការចូលទៅកាន់ប្រទេសឥណ្ឌាដោយគ្មានពន្ធ។ ខណៈពន្ធនាំចូលទៅប្រទេសចិនបានធ្លាក់ចុះយ៉ាងខ្លាំងនៅត្រឹម៧ភាគរយ។
លោក ដុនគីន បាននិយាយថា៖’កិច្ចព្រមព្រៀងពាណិជ្ជកម្មរវាងអាហ្វ្រិកខាងត្បូង និងឥណ្ឌាគឺចាំបាច់ណាស់សម្រាប់ឧស្សាហកម្មផ្លែបឺរអាហ្រ្វិកខាងត្បូង ដើម្បីទទួលបានអត្ថប្រយោជន៍ច្រើនបំផុតពីការទទួលបានថ្មីនេះ”។
៩៥ភាគរយនៃការនាំចេញផ្លែបឺររបស់អាហ្រ្វិកខាងត្បូងមានគោលដៅសម្រាប់សហភាពអឺរ៉ប ចក្រភពអង់គ្លេស រុស្ស៊ី និងរដ្ឋបាល់ទិក។ ហើយប្រហែល២,៥ ភាគរយមានទិសដៅសម្រាប់មជ្ឈិមបូព៌ា។
យោងតាមទិន្នន័យរបស់សមាគមអ្នកដាំផ្លែបឺរអាហ្រ្វិកខាងត្បូងឆ្នាំ២០២៣ អាហ្វ្រិកខាងត្បូង មានផ្ទៃដីសម្រាប់ដាំដំណាំបឺរប្រហែល១៩ ៥០០ហិកតា ហើយជារៀងរាល់ឆ្នាំដាំបានប្រមាណ៨០០ហិកតា៕
