សៀមរាប៖ អង្គការផ្លាស់ប្តូរបទពិសោធន៍អនុផលព្រៃឈើកម្ពុជា កាលពីថ្ងៃទី២២ ខែមីនា ឆ្នាំ២០២៥ បានរៀបចំពិព័រណ៍ទីផ្សារសម្រាប់ការកែច្នៃពីផល និងអនុផលព្រៃ ដើម្បីបង្ហាញភ្ញៀវជាតិ និងអន្តរជាតិ បានស្គាល់ពីផលិតផលសម្បូរបែបរបស់កម្ពុជា កែច្នៃពីផល និងអនុផលព្រៃឈើ។
ពិធីតាំងពិព័រណ៍ទីផ្សារ ស្តីពីការកែច្នៃពីផល និងអនុផលព្រៃឈើនេះ មានរយៈពេលពីរថ្ងៃ ចាប់ផ្តើមពីថ្ងៃទី២២ ដល់ថ្ងៃទី២៣ ខែមីនា ដោយមានការអញ្ជើញចូលរួមពីមន្ត្រីជាន់ខ្ពស់មកពីក្រសួងបរិស្ថាន រដ្ឋបាលព្រៃឈើ និងរដ្ឋបាលខេត្តសៀមរាប សមាជិកសហគមន៍ព្រៃឈើកម្ពុជា ព្រមទាំងមានការចូលរួមរបសភ្ញៀវអន្តរជាតិជាដៃគូសហការមកពីប្រទេសឡាវ ហ្វីលីពីន និងប្រទេសវៀតណាមផងដែរ។
អង្គការផ្លាស់ប្តូរបទពិសោធន៍អនុផលព្រៃឈើកម្ពុជា ហៅកាត់ថា NTFP-EP (Non-Timber Forest Products-Exchange Programme ) គឺជាសមាគមដែលមានសមាជិកចំនួន៣០ មកអង្គការមិនមែនរដ្ឋាភិបាល និងអង្គការក្នុងសហគមន៍សរុប១២៥ ដែលធ្វើការជាមួយក្រុមសហគមន៍ព្រៃឈើ ដើម្បីពង្រឹងសមត្ថភាពក្នុងការគ្រប់គ្រងធនធានធម្មជាតិប្រកបដោយនិរន្តរភាពនៅក្នុងប្រទេសកម្ពុជា ឥណ្ឌា ឥណ្ឌូនេស៊ី ម៉ាឡេស៊ី ហ្វីលីពីន និងប្រទេសវៀតណាម។
សម្រាប់គម្រោងនៅក្នុងព្រះរាជាណាចក្រកម្ពុជា អង្គការនេះបានសហការជាមួយរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ដើម្បីគ្រប់គ្រង និងស្តារឡើងវិញនូវវិស័យព្រៃឈើ និងបរិស្ថាន តាមរយៈការរៀបចំសហគមន៍ព្រៃឈើ និងតំបន់ការពារធម្មជាតិ ដើម្បីបង្កើនការរួមចំណែកក្នុងវិស័យព្រៃឈើឥណទានកាបោន។ សព្វថ្ងៃនេះ ក្រុមដៃគូសហការរបស់អង្គការផ្លាស់ប្តូរបទពិសោធន៍អនុផលព្រៃឈើកម្ពុជា មានសហគមន៍ព្រៃឈើចំនួន១០ នៅក្នុងខេត្តកំពង់ឆ្នាំង ពោធិសាត់ កំពង់ធំ សៀមរាប និងខេត្តព្រះវិហារ ដែលជាអ្នកកែច្នៃអនុផលព្រៃឈើ មានដូចជារំពាក់ ផ្អាវ រំចេក ទ្រាំង និងទឹកឃ្មុំព្រៃជាដើម។
លោក ស៊ឹម ប៊ុនធឿន ប្រធានកម្មវិធីប្រចាំប្រទេសកម្ពុជា បានមានប្រសាសន៍ថា ពិព័រណ៍ទីផ្សារ ស្តីពីការកែច្នៃផល និងអនុផលព្រៃឈើនេះ ក៏ជាការពញ្ញាក់ស្មារតីប្រជាជនកម្ពុជា ឱ្យកាត់បន្ថយការប្រើប្រាស់សារធាតុផ្លាស្ទិក ដោយងាកមកប្រើប្រាស់វត្ថុមិនមែនជាផ្លាស្តិកវិញ ដើម្បីចូលរួមចំណែកការពារបរិស្ថានផងដែរ។
លោកជំទាវ ម៉ម ថានី រដ្ឋលេខាធិការក្រសួងបរិស្ថាន បានសម្តែងការស្ងើចសរសើរចំពោះសមិទ្ធផលរបស់អង្គការផ្លាស់ប្តូរបទពិសោធន៍អនុផលព្រៃឈើកម្ពុជា និងសូមគាំទ្រដល់ការរៀបចំពិព័រណ៍ទីផ្សារនេះ ដើម្បីបង្ហាញដល់ភ្ញៀវជាតិ និងអន្តរជាតិ បានដឹងអំពីការកែច្នៃផលអនុផលព្រៃឈើ របស់ប្រទេសកម្ពុជា។
លោកជំទាវ បានមានប្រសាសន៍ថា ក្រោមម្លប់សន្តិភាព រាជរដ្ឋាភិបាលកម្ពុជាបានផ្តល់ឱកាសដល់ប្រជាសហគមន៍អាចចូលរួមយ៉ាងពេញលេញក្នុងការការពារ និងគ្រប់គ្រងធនធានធម្មជាតិ ដែលជាសម្បត្តិដ៏មានតម្លៃរបស់កម្ពុជា និងជាប្រភពចំណូលដល់ប្រជាជនកម្ពុជា។ ព្រមជាមួយគ្នានេះដែរ ដើម្បីឆ្លើយតបចំពោះចក្ខុវិស័យយូរអង្វែងរបស់រាជរដ្ឋាភិបាល ក្រសួងបរិស្ថានបានរៀបចំលិខិតបទដ្ឋានគតិយុត្តិមួយចំនួន រួមទាំងផែនការយុទ្ធសាស្ត្រ ដើម្បីគាំទ្រ និងផ្តល់លទ្ធភាពដល់ប្រជាសហគមន៍ អាចដំណើរការរៀបចំគ្រប់គ្រងធនធានធម្មជាតិប្រកបដោយប្រសិទ្ធភាព។
លោកជំទាវរដ្ឋលេខាធិការ បានបញ្ជាក់ថា រហូតមកដល់ពេលនេះ ក្រសួងបរិស្ថានបានចងក្រងសហគមន៍តំបន់ការពារធម្មជាតិ នៅទូទាំងប្រទេសកម្ពុជា មានចំនួនសរុប១៩៣សហគមន៍ ដោយគ្របដណ្តប់លើផ្ទៃជាងបីសែនហិកតា ដើម្បីចូលរួមគ្រប់គ្រងថែរក្សា និងការពារធនធានធម្មជាតិរបស់កម្ពុជាឲ្យគង់វង្សឋិតឋេរយូរអង្វែង។
តាមរយៈបទពិសោធន៍ជោគជ័យរបស់អង្គការព្រៃឈើនេះ លោកជំទាវ ម៉ម ថានី បានសំណូមពរឲ្យមានការចែករំលែកបទពិសោធន៍ និងចំណេះដឺងបែបនេះដល់ប្រជាសហគមន៍តំបន់ធម្មជាតិ ដើម្បីពង្រឹងសមត្ថភាពកែច្នៃ និងលើកកម្ពស់គុណភាពផលិតផល និងអនុផលព្រៃឈើរបស់កម្ពុជា នៅលើឆាកអន្តរជាតិ៕
