ភ្នំពេញ៖ នារសៀលថ្ងៃទី១០ ខែកក្កដា ឆ្នាំ២០២៥ ធនាគារអភិវឌ្ឍន៍ជនបទ និងកសិកម្ម (ARDB) បានចុះអនុស្សរណៈនៃការយោគយល់គ្នារវាងក្រសួងកសិកម្ម រុក្ខាប្រមាញ់ និងនេសាទ, និងសាជីវកម្មធានាឥណទានកម្ពុជា ដើម្បីផ្តល់ឥណទានគាំទ្រដំណើរការផលិតរបស់សហគមន៍កសិកម្មទំនើបនៅក្នុងព្រះរាជាណាចក្រកម្ពុជា។
ពិធីចុះហត្ថលេខាលើអនុស្សរណៈនៃការយោគយល់គ្នានេះ ត្រូវបានរៀបចំឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទ ក្រោមអធិបតីឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ដែលធនាគារអភិវឌ្ឍន៍បទ និងកសិកម្ម តំណាងដោយឯកឧត្តម ចាន់ សីហា អគ្គនាយករង និងជាតំណាងដ៏ខ្ពង់ខ្ពស់របស់ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក រីឯក្រសួងកសិកម្ម រុក្ខាប្រមាញ់ និងនេសាទ តំណាងដោយឯកឧត្តមអនុរដ្ឋលេខាធិការ ឃឹម ហ្វីណង់។
ថ្លែងក្នុងពិធីចុះហត្ថលេខានេះ ឯកឧត្តមអគ្គនាករង បានមានប្រសាសន៍ជម្រាបជូនគណៈអធិបតី និងដៃគូក្នុងអនុស្សរណៈនៃការយោគយល់គ្នាថា ធនាគារអភិវឌ្ឍន៍ជនបទ និងកសិកម្ម (ARDB) ជាធនាគាររដ្ឋបម្រើគោលនយោបាយរបស់រាជរដ្ឋាភិបាល ដែលត្រូវបានបង្កើតឡើងតាំងពីឆ្នាំ១៩៩៨ រហូតមកទល់បច្ចុប្បន្ននេះមានរយៈពេលជិត២៧ឆ្នាំ ដោយមានបេសកកម្មចម្បងក្នុងការផ្តល់ហិរញ្ញប្បទានគាំទ្រដល់ការអភិវឌ្ឍវិស័យកសិកម្ម និងសេដ្ឋកិច្ចជនបទ។ ធនាគារ ARDB បានពង្រីកទំហំ និងវិសាលភាពប្រតិបត្តិការជាបន្តបន្ទាប់ ស្របតាមផែនទីបង្ហាញផ្លូវរយៈពេល១០ឆ្នាំ និងផែនការយុទ្ធសាស្ត្រអាជីវកម្ម ៣ឆ្នាំរំកិល ហើយបច្ចុប្បន្ននេះ ធនាគារមានសាខាចំនួន២ គឺសាខាខេត្តបាត់ដំបង និងសាខាខណ្ឌដូនពេញ ក្នុងសង្កាត់ចតុមុខ រាជធានីភ្នំពេញ។ ទន្ទឹមនឹងនេះ ធនាគារ ARDB ក៏មានបណ្តាញប្រតិបត្តិការគ្របដណ្ដប់ទូទាំងប្រទេស ដោយមានការិយាល័យចល័តតាមខេត្តសរុបចំនួន១៦ រួមមាន៖ ខេត្តបន្ទាយមានជ័យ, ឧត្តរមានជ័យ, ព្រះវិហារ, សៀមរាប, ស្ទឹងត្រែង រតនគិរី, ក្រចេះ, ត្បូងឃ្មុំ, ព្រៃវែង, តាកែវ, កំពង់ចាម, កំពង់ឆ្នាំង, កំពង់ធំ, ពោធិ៍សាត់, កំពង់ស្ពឺ និងខេត្តស្វាយរៀង។
ឯកឧត្តមអគ្កនាយករង ចាន់ សីហា បានមានប្រសាសន៍បន្ថែមទៀតថា លើសពីនេះ ធនាគារ ARDB បាននិងកំពុងធ្វើការយ៉ាងជិតស្និទ្ធជាមួយក្រសួង-ស្ថាប័នពាក់ព័ន្ធ និងដៃគូអភិវឌ្ឍន៍នានា ក្នុងនោះក្រសួងកសិកម្ម រុក្ខាប្រមាញ់ និងនេសាទ និងសាជីវកម្មធានាឥណទានកម្ពុជា បានដើរតួនាទីយ៉ាងសំខាន់លើការងារផ្តល់ហិរញ្ញប្បទានគំាទ្រដល់ប្រជាកសិករ សហគមន៍កសិកម្ម និងសហគ្រាសធុនតូច និងមធ្យមក្នុងវិស័យកសិកម្ម និងកសិ-ឧស្សាហកម្ម ជាពិសេសតាមរយៈកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) ក្រោមមូលនិធិរបស់អង្គការមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD), គម្រោងពិពិធកម្មកសិកម្មកម្ពុជា (CASDP) ក្រោមមូលនិធិរបស់ធនាគារពិភពលោក (World Bank) និងគម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម (ACSEP) ក្រោមមូលនិធិរបស់ធនាគារអភិវឌ្ឍន៍អាស៊ី (ADB)។ ផ្អែកលើឆន្ទៈ និងទស្សនវិស័យរួមគ្នា, ធនាគារ ARDB, ក្រសួងកសិកម្ម រុក្ខាប្រមាញ់ និងនេសាទ និងសាជីវកម្មធានាឥណទានកម្ពុជា បានឈានដល់ការចុះអនុស្សរណៈយោគយល់គ្នានាថ្ងៃនេះ ក្នុងគោលបំណងលើកកម្ពស់លើការផ្តល់ឥណទានគាំទ្រដល់សហគមន៍កសិកម្មទំនើប សំដៅបង្កើនសមត្ថភាពប្រកួតប្រជែងខ្ពស់ ទាំងលើផ្នែកថ្លៃដើម បរិមាណទិន្នផល និងគុណភាព។
ឯកឧត្តមអគ្គនាយករង បានបង្ហាញសេចក្តីសង្ឃឹមថា អនុស្សរណៈនៃការយោគយល់គ្នានេះនឹងផ្តល់លទ្ធផលជាផ្លែផ្កា និងបង្កើនកិច្ចសហការកាន់តែជិតស្និទ្ធ ក្នុងការលើកកម្ពស់ការផ្តល់ឥណទានដល់សហគមន៍កសិកម្មទំនើប ក៏ដូចជារួមចំណែកក្នុងការអភិវឌ្ឍវិស័យកសិកម្ម និងសេដ្ឋកិច្ចជនបទ ប្រកបដោយចីរភាព ស្របតាមកម្មវិធីគោលនយោបាយបញ្ចកោណរបស់រាជរដ្ឋាភិបាលអាណត្តិទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។
នៅក្នុងពិធីជាមួយគ្នានេះដែរ ក្រោយពេលចុះហត្ថលេខាលើអនុស្សរណៈនៃការយោគយល់គ្នារវាងធនាគារអភិវឌ្ឍន៍ជនបទ និងកសិកម្ម រួចមក ឯកឧត្តម ឃឹម ហ្វីណង់ តំណាងក្រសួងកសិកម្ម រុក្ខាប្រមាញ់ និងនេសាទ ក៏បានបន្តចុះអនុស្សរណៈនៃការយោគយល់គ្នាពីរផ្សេងទៀត រវាងតំណាងធនាគារពាណិជ្ជកម្មក្រៅប្រទេសនៃកម្ពុជា និងរវាងតំណាងសាជីវកម្មធានាឥណទានកម្ពុជា លើកម្មវត្ថុដូចគ្នា គឺផ្តល់ឥណទានគាំទ្រដំណើរការផលិតរបស់សហគមន៍កសិកម្មទំនើប។
ថ្លែងក្នុងពិធីនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាគណៈអធិបតីក្នុងពិធីចុះហត្ថលេខា បានមានប្រសាសន៍ថា ការរួមសហគ្នាផ្តល់ឥណទាន និងធានាឥណទានពីស្ថាប័នហិរញ្ញវត្ថុទាំងបីខាងលើនេះ ពិតជាមានសារៈសំខាន់ខ្លាំងណាស់ ដើម្បីធានាបាននូវនិរន្តរភាពនៃការវិនិយោគលើវិស័យកសិកម្មនៅក្នុងប្រទេសកម្ពុជា ជាពិសេស តាមរយៈការផ្តល់ដើមទុនដល់សហគមន៍កសិកម្មដាំដុះដំណាំ ដែលមានហានិភ័យទាប ហើយអាចស្វែងរកប្រាក់ចំណេញសម្រាប់ទ្រទ្រង់ដំណើរផលិត និងបង្កើនការជឿជាក់ចំពោះខ្សែសង្វាក់ផ្គត់ផ្គង់ផលិតផលនៅលើទីផ្សារ។
ឯកឧត្តមរដ្ឋមន្ត្រី បានបញ្ជាក់ថា នៅក្នុងព្រះរាជាណាចក្រកម្ពុជា មានសហគមន៍កសិកម្មជាច្រើន ប៉ុន្តែសហគមន៍កសិកម្មទំនើបទើបតែបង្កើតបានចំនួន១២សហគមន៍ប៉ុណ្ណោះ ដែលជាសហគមន៍ឈានមុខគេ ក្នុងការអភិវឌ្ឍវិស័យកសិកម្ម ដោយផ្តោតមុនគេលើដំណាំងាយស្រួលរកទីផ្សារ និងតម្លៃមិនសូវប្រែប្រួល ដូចជាដំណាំស្រូវ ស្វាយចន្ទី និងដំណាំបន្លែជាដើម។
ឯកឧត្តម ឌិត ទីណា បានបន្ថែមថា នៅពេលណាសហគមន៍កសិកម្មទំនើបកាន់តែរឹងមាំលើសមត្ថភាពផលិត និងទទួលបានជំនឿចិត្តកាន់តែខ្លាំងនៅលើទីផ្សារ ពេលនោះសហគមន៍អាចពង្រីកខ្លួនឱ្យកាន់តែធំ ឬអាចមានសហគមន៍ដូចគ្នាកើតឡើងជាបន្តបន្ទាប់ច្រើនទៀត ដើម្បីចូលរួមលើកកម្ពស់ខឿនសេដ្ឋកិច្ចសង្គម៕
