ហ្សាការតា៖ ទីភ្នាក់ងារស្បៀងជាតិឥណ្ឌូណេស៊ី បានឱ្យដឹងថា អតិផរណាបានថយចុះក្នុងខែតុលា ឆ្នាំ២០២៦ ដោយសាររដ្ឋាភិបាលបានបង្កើនការអន្តរាគមន៍តាមរយៈកម្មវិធីរក្សាស្ថិរភាពការផ្គត់ផ្គង់ និងតម្លៃស្បៀងអាហារ ចលនាលក់ស្បៀងក្នុងតម្លៃថោក និងការចែកចាយស្បៀងអាហារ ដើម្បីរក្សាស្ថិរភាពតម្លៃអង្ករ។
លោក អាន់ឌី អាំរ៉ាន់ ស៊ូឡៃម៉ាន់ (Andi Amran Sulaiman) ជារដ្ឋមន្ត្រីកសិកម្ម បានមានប្រសាសន៍កាលពីថ្ងៃទី៣ ខែវិច្ឆិកាថា «ការផ្គត់ផ្គង់ស្បៀងអាហាររបស់យើងមានភាពរឹងមាំ។ លើសពីនេះ ស្តុកអង្ករក៏ស្ថិតក្នុងកម្រិតខ្ពស់បំផុតក្នុងប្រវត្តិសាស្ត្រផងដែរ។ តាមការណែនាំរបស់ប្រធានាធិបតី ប្រាបូវ៉ូ យើងត្រូវចែកចាយស្តុកអង្ករទាំងនេះ ដើម្បីបម្រើផលប្រយោជន៍ប្រជាពលរដ្ឋ តាមរយៈកម្មវិធីរក្សាស្ថិរភាពការផ្គត់ផ្គង់ និងតម្លៃស្បៀង ជំនួយស្បៀងអាហារ និងកម្មវិធីផ្សេងៗទៀត»។
យោងតាមទិន្នន័យរបស់ទីភ្នាក់ងារស្ថិតិឥណ្ឌូណេស៊ី បានឱ្យដឹងថា អតិផរណាទាំងប្រចាំឆ្នាំ និងប្រចាំខែបានថយចុះ។ អតិផរណាប្រចាំខែតុលា មានចំនួន០,២២ភាគរយ ធ្លាក់ចុះពី ០,៣៣ភាករយ ក្នុងខែកញ្ញា។
លោករដ្ឋមន្ត្រី បានមានប្រសាសន៍ថា ចំណុចគួរឱ្យកត់សម្គាល់មួយ អង្ករមិនបានរួមចំណែកដល់អតិផរណាក្នុងចំណោមទំនិញម្ហូបអាហារ ដែលមានតម្លៃប្រែប្រួលខ្លាំង ឬអតិផរណាម្ហូបអាហារនោះទេ។
អតិផរណាម្ហូបអាហារប្រចាំខែក៏បានថយចុះមកនៅត្រឹម០,៧៧ភាគរយ ក្នុងខែតុលា បើធៀបនឹង១,៤៦ភាគរយ ក្នុងខែកញ្ញា។ យោងតាមរបាយការណ៍របស់ទីភ្នាក់ងារស្ថិតិឥណ្ឌូណេស៊ី អតិផរណាតម្លៃអង្ករប្រចាំខែមានកម្រិតជិតសូន្យ ដែលជាការធ្លាក់ចុះយ៉ាងខ្លាំងពី០,៨០ភាគរយ ក្នុងខែកញ្ញា ដែលជាអត្រាខ្ពស់បំផុតក្នុងឆ្នាំ២០២៦។
ដើម្បីទប់ស្កាត់ការប្រែប្រួលតម្លៃអង្ករក្នុងខែតុលា ទីភ្នាក់ងារស្បៀងជាតិឥណ្ឌូណេស៊ី បានពង្រឹងកម្មវិធីរក្សាស្ថិរភាពការផ្គត់ផ្គង់ និងតម្លៃអង្ករ។
លោក លោក អាន់ឌី អាំរ៉ាន់ ស៊ូឡៃម៉ាន់ បានមានប្រសាសន៍ថា តម្លៃអង្ករត្រូវតែរក្សាឱ្យមានស្ថិរភាព។ បច្ចុប្បន្ន ស្ថានភាពពិភពលោកកំពុងស្ថិតក្នុងភាពប្រុងប្រយ័ត្នខ្ពស់ ប៉ុន្តែសម្រាប់ប្រទេសឥណ្ឌូណេស៊ី នឹងមានសុវត្ថិភាព»។
ទីភ្នាក់ងារស្បៀងជាតិឥណ្ឌូណេស៊ីបានកត់ត្រាថា ក្នុងខែតុលា រដ្ឋាភិបាលបានចែកចាយអង្ករពីស្តុកបម្រុងជូនប្រជាពលរដ្ឋសរុបប្រមាណ១៦ម៉ឺនតោន។ អង្ករភាគច្រើនត្រូវបានចែកចាយតាមរយៈកម្មវិធីរក្សាស្ថិរភាពការផ្គត់ផ្គង់ និងតម្លៃអង្ករ ដើម្បីធានាឱ្យគ្រួសារមានប្រាក់ចំណូលទាបអាចទទួលបានអង្ករក្នុងតម្លៃសមរម្យ៕ (ផាន់ អាណា)
