ដោយ ឡុង សារេត
ភ្នំពេញ៖ កម្ពុជាបាននាំចេញផ្លែឈើចំនួន២ប្រភេទ មានផ្លែទុរេន និងផ្លែមៀនឆ្លងកាត់ប្រទេសឡាវ ឆ្ពោះទៅទីផ្សារប្រទេសចិនប្រមាណ៧៦៣តោន។នេបើយោងតាមរបាយការណ៍ដែលផ្តល់ដោយក្រសួងពាណិជ្ជកម្ម។
សូមជម្រាបជូនផងដែរថា កាលពីថ្ងៃទី២២ខែមិថុនាឆ្នាំ២០២៦កន្លងមកនេះ កម្ពុជា ឡាវបានរៀបំពិធីសម្ពោធជាផ្លូវការនៃការដឹកជញ្ជូនកសិផលឆ្លងកាត់ (Transit) ពីកម្ពុជា ទៅកាន់ទីផ្សារប្រទេសចិន ដោយឆ្លងកាត់ប្រទេសឡាវ។
បើតាមរបាយការណ៍ ក្នុងបរិមាណផ្លែឈើសរុបជាង៧៦៣តោនក្នុងនោះផ្លែទុរេនមានចំនួន៦៣៦តោន និងផ្លែមៀនមានចំនួន១២៧តោន តាមរយៈក្រុមហ៊ុននាំចេញចំនួន៤ គិតជាទឹកប្រាក់ប្រមាណ២,២លានដុល្លារ។
ទាក់ទងនិងការនាំចេញផ្លែទុរេនទៅទីផ្សារប្រទេសចិននេះដែរ តំណាងសមាគមទុរេនកម្ពុជាមើលឃើថាបរិមាណផ្លែទុរេនដែលបានដឹកជញ្ជូនឆ្លងកាត់ប្រទេសឡាវ ឆ្ពោះទៅទីផ្សារចិននេះជាចំនួនមួយតិចតួចប៉ុណ្ណោះ។ ប៉ុន្តែពេលនៅពេលការនាំចេញកសិផលសក្តានុពលរបស់កម្ពុជានឹងកើនឡើងច្រើនថែមទៀត តាមរយៈការដឹកជញ្ជូនប្រើពេលវេលាខ្លីនិងថ្លៃដឹកជញ្ជូនមានតម្លៃសមរម្យ។
លោក រឿន រតនា លេខាប្រតិបត្តិនៃសមាគមទុរេនកម្ពុជាមានប្រសាសន៍ “តាមទស្សនៈរបស់ខ្ញុំ បរិមាណទុរេននាំចេញបានជាង៦៣៦តោននេះ មិនទាន់គ្រប់និងតម្រូវការរបស់ទីផ្សារប្រទេសចិនទេ។ ព្រោះនៅឆ្នាំនេះគេមានគម្រោងបញ្ជាទិញរហូតដល់១ ០០០ទូកុងតឺន័រ។ ដូចនេះវាមិនទាន់គ្រប់ទៅនិងតម្រូវការរបស់គេនៅឡើយ។ ក្នុងនាមសមាគមទុរេនកម្ពុជា លើកទឹកដល់កសិករត្រូវពង្រឹងនូវគុណភាព រួមនិងបច្ចេកទេសប្រើប្រាស់ថ្នាំ ជីគីមី ដើម្បីកុំឱ្យមានការរឹតបណ្តឹងដូចទៅនិងប្រទេសជិតខាង”។
លោក រឿន រតន បន្តទៀតថានៅពេលខាងមុខការនាំចេញផ្លែទុរេនរួមនិងកសិផលសក្តានុពេលផ្សេងទៀតរបស់កម្ពុជាដឹកជញ្ជូនឆ្លងកាត់ប្រទេសប្រទេសឆ្ពោះទៅទីផ្សារប្រទេសចិននាពេលខាងមុខវានឹងមានការកើនឡើងច្រើនដោយសាររយៈចំម្ងាយនៃការដឹកជញ្ជូនប្រើពេលខ្លី និងចំណាយផ្សេងៗមិនច្រើនដូចនាំចេញតាមវៀតណាម។
ស្រដៀងគ្នានេះដែរ, អ្នកឧកញ៉ាបណ្ឌិត សួរ វីរៈ នាយកប្រតិបត្តិនិងជាប្រធានក្រុមប្រឹក្សាភិបាលនៃក្រុមហ៊ុន វីរៈ ប៊ុនថាំ អេចប្រេសបានឱ្យដឹងថា តាមការសង្កេតជាក់ស្តែងចំពោះការនាំចេញផ្លែទុរេននឹងកើនឡើងខ្ពស់ព្រោះសន្ទុះនៃការគាំទ្រគុណភាពទុរេនខ្មែរនៅលើទីផ្សារប្រទេសចិន។ ផ្លែមៀនប៉ៃលិនក៏មានសញ្ញាល្អផងដែរ ព្រោះការនាំចេញកន្លងទៅធ្វើតាមផ្លូវទឹកឆ្លងកាត់ប្រទេសវៀតណាមត្រូវការចំណាយពេលវេលាពី៦ទៅ១០ថ្ងៃ ជាហេតុធ្វើផ្លែមៀនធ្លាក់ចុះគុណភាព។ ដោយឡែកសម្រាប់ផ្លែស្វាយសង្ឃឹមថានៅឆ្នាំក្រោយនិងអាចនាំចេញទៅប្រទេសចិនបានច្រើន ព្រោះមានអ្នកចាំទទួលទិញមានច្រើនបានចាប់អារម្មណ៍ទិញស្វាយកែវរមៀតកម្ពុជា ហើយមកដល់ពេលនេះក្រុមការងាររបស់ក្រុមហ៊ុន វីរៈប៊ុនថាំបានធ្វើការជាមួយម្ចាស់ចំម្ការផ្សេងៗ ឱ្យកសិករត្រៀមផ្គត់ផ្គង់ស្វាយមានគុណភាពនាំចេញគ្រប់ស្តង់ដាដែលគេត្រូវការ។
បើយោងតាម សមាគមមានផ្ទៃដីដាំទុរេនមានជាង ១,៦ម៉ឺនហិកតា ហើយនៅក្នុងមួយឆ្នាំអាចផលិតទុរេនបានជាង១៣៥ពាន់តោន កាលពីឆ្នាំ២០២៥កន្លងទៅបាននាំចេញផ្លែទុរេនទៅប្រទេសចិបានប្រមាណ១៤៨តោន។
យោងតាមសេចក្តីប្រកាសព័ត៌មានស្តីពី ការចុះកិច្ចព្រមព្រៀងដឹកជញ្ជូនផលិតផលកសិកម្មឆ្លងកាត់សាធារណរដ្ឋប្រជាធិបតេយ្យប្រជាមានិតឡាវ កាលពីថ្ងៃទី២៥ ខែមករា ឆ្នាំ២០២៥បានបង្ហាញថាកិច្ចព្រមព្រៀងដ៏មានសារសំខាន់មួយនេះនឹងបើកច្រកដឹកជញ្ជូនថ្មីមួយទៀតសម្រាប់ការនាំចេញកសិផលកម្ពុជា ជាពិសេសទៅកាន់ទីផ្សារប្រទេសចិន ដែលនឹងចូលរួមចំណែកយ៉ាងសំខាន់ក្នុងការកាត់បន្ថយពេលវេលា និងថ្លៃដើមដឹកជញ្ជូន ព្រមទាំងពង្រីកឱកាសទីផ្សារជូនប្រជាកសិករនិងលើកកម្ពស់សមត្ថភាពប្រកួតប្រជែងនៃវិស័យកសិកម្មកម្ពុជា។
យោងតាមកិច្ចព្រមព្រៀងនេះ វិសាលភាពនៃការដឹកជញ្ជូននឹងគ្របដណ្តប់លើបន្លែ និងដំណាំស្រស់និងស្ងួត មានដូចជាចេក ទុរេន មៀន អង្ករ ស្វាយ ម្សៅដំឡូងមីនិងផលិតផលកសិកម្មសក្តានុពលផ្សេងទៀតដែលភាគីទាំងពីរនឹងឯកភាពគ្នានាពេលអនាគត៕
