ដោយ ហៃ ស៊ីណា
ភ្នំពេញ៖ ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជាបានអំពាវនាវដល់សមាជិករបស់សហ័ន្ធស្រូវអង្ករកម្ពុជាដែលជាម្ចាស់រោងម៉ាស៊ីនកិនស្រូវក្នុងស្រុក ចូលរួមជួយប្រមូលទិញស្រូវពីប្រជាកសិករនៅរដូវច្រូតកាត់នាខែសីហានេះឲ្យអស់លទ្ធភាពនិងមានតម្លៃល្អលើទីផ្សារ ដើម្បីរក្សាស្ថេរភាពថ្លៃ។
ការអំពាវនាវរបស់ប្រធានសហព័ន្ធស្រូវអង្ករកម្ពុជាដូច្នោះ ខណៈពេលនៅចុងខែសីហាឆ្នាំ២០២៦នេះ តម្លៃស្រូវមិនប្រកាន់រដូវមានដូចជាស្រូវសែនក្រអូប ស្រូវស្រងែ និងស្រូវអូអឹម៥៤៥១ (OM 5451) បានធ្លាក់ចុះតម្លៃ គិតត្រឹមថ្ងៃទី២៦ ខែសីហា ឆ្នាំ២០២៦ ប៉ុន្តែមិនធ្លាក់ចុះខ្លាំងនោះដែរ។
ឧកញ៉ា ឡាយ ឈុនហួ បានមានប្រសាសន៍ថា «ក្នុងរយៈពេលមួយសប្តាហ៍នេះ ប្រទេសជិតខាងយើងបានទម្លាក់តម្លៃខ្លាំង ដោយសារតែទីផ្សារអន្តរជាតិមានការថយចុះ ហើយការបញ្ជាទិញមានតិចតួច ដែលពីរសប្តាហ៍មុន តម្លៃស្រូវឡើងខ្ពស់ បើធៀបនិងឆ្នាំមុនៗ ព្រមទាំងថ្លៃដឹកជញ្ជូនខ្ពស់ផងដែរ។ បញ្ហានេះធ្វើឲ្យអ្នកប្រមូលទិញមួយចំនួនត្រូវការទិញ ក៏បានផ្អាកសិន ជាពិសេស ក្នុងរដូវកាលនេះ។ កាលឆ្នាំមុនអង្ករយើងមានតម្លៃថោក រួមមានវៀតណាម ថៃ និងភូមា បណ្តាលមកពីឈ្មួញនាំចូល និងឃ្លាំងធំៗនៅបរទេសទិញចូលច្រើន រហូតដល់នៅសល់ក្នុងស្តុកចាស់។
ប្រធានសហព័ន្ធស្រូវអង្ករកម្ពុជាបានអំពាវនាវដល់គ្រប់រោងម៉ាស៊ីនកិនស្រូវជាសមាជិក និងក្រុមហ៊ុននាំចេញអង្ករធំៗ ជំរុញការលក់អង្ករចេញ នឹងជួយទិញស្រូវរបស់ប្រជាកសិករឲ្យអស់លទ្ធភាព ក្នុងតម្លៃសមរម្យលើទីផ្សារ ឬក៏លើសតម្លៃទីផ្សារបន្តិច ដើម្បីជួយទប់តម្លៃកុំឲ្យធ្លាក់ចុះថែមទៀត។
ឧកញ៉ា ឡាយ ឈុនហាំង នាយកគ្រប់គ្រងទូទៅនៃក្រុមហ៊ុន ស៊ីធី រ៉ាយស៍ (City Rice)និងជាអនុប្រធានសមាគមបណ្តាកសិករតេជោ បានថ្លែងថា ការប្រមូលទិញស្រូវរបស់ក្រុមហ៊ុន កាលពីថ្ងៃទី១៣ ខែសីហា ដល់បច្ចុប្បន្ននេះបានទិញស្រូវសើមដឹកដល់រោងម៉ាស៊ីន ចំនួនបីប្រភេទ គឺទី១ ស្រូវសែនក្រអូនទិញតម្លៃ១០ ០០រៀល ទី២ ស្រូវស្រងែតម្លៃ៩៦០រៀល និងទី៣ ស្រូវអូអឹម តម្លៃ៨៩០រៀល ហើយខាងក្រុមហ៊ុនប្រមូលទិញសរុបជាង២០ ០០០ម៉ឺនតោនហើយ ដោយក្នុងមួយថ្ងៃទិញចូលបរិមាណ២ ០០០តោន។
ឧកញ៉ាបានបញ្ចាក់ថា ការធ្លាក់ចុះតម្លៃស្រូវបន្តិចនៅក្នុងខែសីហានេះ ដោយសារតែការប្រមូលផលស្រូវមានច្រើន ហើយអ្វីសំខាន់ គឺទីផ្សារអង្ករអន្តរជាតិក៏បានធ្លាក់ចុះផងដែរ ប៉ុន្តែតាមផែនការក្រុមហ៊ុន ស៊ីធី រ៉ាយស៍ មានផែនការប្រមូលទិញស្រូវបរិមាណ១០ម៉ឺនតោន សម្រាប់យកមកកិនកែច្នៃនាំចេញ។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ទិន្នផលស្រូវកម្ពុជាបានហក់ឡើងជាបន្តបន្ទាប់ពោលនៅឆ្នាំ២០២៥ និងឆ្នាំ២០២៦ បានកើនឡើងចន្លោះពី១៤ ទៅ ១៥លានតោន ដោយសារការប្រើប្រាស់ពូជស្រាវជ្រាវថ្មី ព្រមទាំងពូជរបស់ជាតិ និងការប្រើប្រាស់បច្ចេកទេសទំនើបផងដែរ។
ពនៅក្នុងឆ្នាំ២០២៥ ប្រទេសកម្ពុជាសម្រេចបានការនាំចេញស្រូវសើមជិត៧លានតោន ទៅកាន់ប្រទេសជិតខាង ភាគច្រើនទៅប្រទេសវៀតណាម ដែលគិតជាទឹកប្រាក់សរុបជិត១,៦លានដុល្លារ៕
