ដោយ ឡុង សារេត
សៀមរាប៖ ស្លឹកឃុនមារ ដែលត្រូវបានសហគមន៍មួយក្នុងខេត្តសៀមរាប យកច្នៃជាស្លឹកកណ្ដប សម្រាប់ប្រក់ដំបូល ហើយសហគមន៍អាចរកចំណូលបានជិត២ម៉ឺនដុល្លារ ក្នុងរយៈពេលត្រឹម ៤ខែ ពីរបរកែច្នៃស្លឹកឃុនមារនេះ។
យុវជន លី សុធុជ អាយុ៣២ឆ្នាំ ជាសមាជិកនៃសហគមន៍ព្រៃឈើចាន់សខាងជើង ជាអ្នកផ្តួចផ្តើមគំនិតឱ្យមានការច្នៃស្លឹកឃុនមារជាស្លឹកកណ្ដប ដែលគាត់អះអាងថា ធុនជាមួយភ្លើងឆាបឆេះ។
យុវជនរូបនេះបានឱ្យដឹងថា សកម្មភាពកែច្នៃស្លឹកឃុនមារជាស្លឹកកណ្តបនេះ ចាប់ផ្តើមក្នុងឆ្នាំ២០២៣ ហើយនៅឆ្នាំ២០២៤ នៅលើទីផ្សារក្នុងតំបន់មានតម្រូវការតិចតួចប៉ុណ្ណោះ។
ប៉ុន្តែបច្ចុប្បន្នតម្រូវការ ស្លឹកកណ្ដបឃុនមារចាប់ផ្តើមមានសន្ទុះកើនឡើង ជាពិសេសនៅក្រុងភ្នំពេញ បន្ទាប់ពីបានផ្សព្វផ្សាយនៅតាមបណ្តាញទំនាក់ទំនងសង្គម។
លោក លី សុធុជ បានគូសបញ្ជាក់ថា “ចូលមកដល់ឆ្នាំ២០២៦នេះ យើងរៀបចំស្លឹកឃុនមារធ្វើជាស្លឹកកណ្តបជារៀងរាល់ថ្ងៃ ដោយសារនៅលើទីផ្សារមានការចាប់អារម្មណ៍ច្រើន ព្រោះតែស្លឹករុក្ខជាតិមួយនេះវាមានអត្ថប្រយោជន៍ច្រើន និងងាយស្រួលក្នុងការរក្សាទុកជាងស្បូវ ស្លឹកត្នោត និងស្លឹករុក្ខជាតិផ្សេងទៀត។ ជាក់ស្តែងគិតត្រឹមរយៈពេល៤ខែ ឆ្នាំ២០២៦កន្លងមកនេះ លក់ស្លឹកឃុនមារបាន៣ ៥០០ម៉ែត្រការ៉េ គិតជាប្រាក់បានចំណូល១៧ ៥០០០ដុល្លារ”។
យុវជនរូបនេះបានឱ្យដឹងទៀថា ស្លឹកឃុនមារមានការពេញនិយមច្រើន។ តួយ៉ាងក្រុងភ្នំពេញមានតម្រូវការច្រើនរហូតដល់ជិត២ ០០០ម៉ែត្រការ៉េ ដោយសារអ្នកនៅទីក្រុងភ្នំពេញអត់ធ្លាប់ស្គាល់ប្រភេទស្លឹកឃុនមារ ហើយមានម្ចាស់ហាងជាច្រើស្រលាញ់ចូលចិត្ត ចង់បានស្លឹកឃុនមារយកទៅតុបតែងទីតាំងរបស់ខ្លួនឱ្យមានភាពទាក់ទាញ។ ម្យ៉ាងទៀតដោយសារស្លឹករុក្ខជាតិនេះធុននឹងការឆាបឆេះ ជាងស្បូវ ស្លឹកត្នោត ឬស្លឹកដូងជាដើម។
លោក លី សុធុជ បានទទួលស្គាល់ថា ស្លឹកឃុនមារសព្វថ្ងៃបាននិងកំពុងជួយលើកស្ទួយជីវភាពរបស់ប្រជាជននៅឃុំចាន់ស រកចំណូលបានមួយផ្នែកទៀតសម្រាប់ផ្គត់ផ្គង់គ្រួសារក្រៅពីរបរស្រែចម្ការ។
នៅក្នុងមួយឆ្នាំ កសិករនៅក្នុងតំបន់អាចប្រមូលផលស្លឹកឃុនមារបានម្តង ប៉ុន្តែ ដោយសារព្រៃធំ ដូច្នេះកសិករអាចប្រមូលផលវិលជុំបាន។
នៅពេលខាងមុខ លោក លី សុធុជ មានគម្រោងដាំដើមឃុនមាបន្ថែមនៅលើផ្ទៃដីពី៥ទៅ១០ហិកតា សម្រាប់ផ្តល់អត្ថប្រយោជន៍ដល់កូនចៅជំនាន់ក្រោយ ប្រសិនមានការយល់ស្របពីខាងសហគមន៍ក៏ដូចជាអាជ្ញាធរពាក់ព័ន្ធ៕
