ម៉ានីល៖ សហរដ្ឋអាម៉េរិកបានផ្តល់ថវិកាសម្រាប់បង្កើតមជ្ឈមណ្ឌលត្រួតពិនិត្យសកម្មភាពនេសាទតាមសមុទ្រ នៅប្រទេសហ្វីលីពីន ដែលនឹងប្រមូលព័ត៌មានទាន់ពេលវេលាពីអ្នកនេសាទហ្វីលីពីន ជុំវិញបទល្មើសនេសាទខុសច្បាប់ និងចលនាគួរឱ្យសង្ស័យរបស់នាវា។ នេះបើយោងតាមការប្រកាសរបស់ស្ថានទូតសហរដ្ឋអាម៉េរិកប្រចាំទីក្រុងម៉ានីល ។
មជ្ឈមណ្ឌលរាយការណ៍បទល្មើសនេសាទខុសច្បាប់នេះ ត្រូវបានបំពាក់ដោយប្រព័ន្ធអ៊ីនធឺណិតពីផ្កាយរណប ស្តារលីង (Starlink) និងកម្មវិធីទិន្នន័យ អឺសរ៉េនជឺ (EarthRanger) ដើម្បីប្រមូលព័ត៌មានទាន់ពេលវេលាពីអ្នកនេសាទក្នុងតំបន់ និងអំពីការសង្ស័យថា មានការនេសាទខុសច្បាប់ សកម្មភាពមិនធម្មតារបស់នាវា និងសកម្មភាពខុសច្បាប់ផ្សេងៗទៀត។
ស្ថានទូតអាម៉េរិក បានប្រកាសថា ព័ត៌មានទាំងនេះនឹងត្រូវបញ្ជូនបន្តទៅកាន់ណការិយាល័យជលផល និងធនធានទឹក (Bureau of Fisheries and Aquatic Resources)នៃមជ្ឈមណ្ឌលជាតិសម្រាប់កិច្ចការសមុទ្រ (National Maritime Center)។
មជ្ឈមណ្ឌលនេះនឹងរាយការណ៍អំពីការនេសាទខុសច្បាប់ ការនេសាទដោយមិនបានរាយការណ៍ និងគ្មានការត្រួតពិនិត្យ ក្រោមកិច្ចសហការរវាងសហរដ្ឋអាម៉េរិក និងក្រុមប្រឹក្សាខេត្តប៉ាឡាវ៉ាន ប្រទេសហ្វីលីពីនសម្រាប់ការអភិវឌ្ឍប្រកបដោយចីរភាព។
ប៉ាឡាវ៉ាន គឺជាខេត្តប្រជុំកោះរបស់ប្រទេសហ្វីលីពីន ដែលល្បីល្បាញទូទាំងពិភពលោក និងត្រូវបានគេចាត់ទុកថា ជាដែនអេកូឡូស៊ីចុងក្រោយរបស់ប្រទេសហ្វីលីពីណ (Last Ecological Frontier)។ ខេត្តនេះរួមមានកោះប៉ាឡាវ៉ាន ដែលជាកោះធំ និងកោះតូចៗប្រមាណ១ ៧៨០កោះ។ តំបន់នេះមានទឹកសមុទ្រពណ៌ខៀវបៃតងថ្លាស្អាត ជួរភ្នំថ្មកំបោរដ៏ខ្ពស់ និងមានព្រៃត្រូពិចដ៏ក្រាស់។
កាលពីខែមិថុនា ឆ្នាំ២០២៦ ក្រសួងការបរទេសអាម៉េរិក បានផ្តល់ថវិកាចំនួន២៤លានដុល្លារ ទៅឱ្យវិទ្យាស្ថានឆ្នេរសមុទ្រនៃសាកលវិទ្យាល័យ រ៉ូដអាយឡិន (University Rhode Island’s Coastal Institute) នៅក្នុងសហរដ្ឋអាម៉េរិក ដើម្បីពង្រីកគម្រោង ហ្វីសរ៉ាយ (Fish Right) នៅប្រទេសហ្វ៊ីលីពីន ដែលផ្តោតសំខាន់លើការស្រាវជ្រាវ ការគ្រប់គ្រងជលផលប្រកបដោយចីរភាព ការប្រឆាំងបទល្មើសនេសាទខុសច្បាប់ និងការប្រមូលទិន្នន័យដែនសមុទ្រ (Maritime Domain Awareness) នៅតាមតំបន់ឆ្នេរភាគខាងលិចប្រទេសហ្វីលីពីន និងសមុទ្រចិនខាងត្បូង។
លោកស្រី ទ្រូសីឡា អេស្ទើ បាយ៉ាតេ (Drusila Esther Bayate) អនុរដ្ឋលេខាធិការទទួលបន្ទុកផ្នែកជលផលហ្វីលីពីន បាននិយាយថា ការផ្តល់មធ្យោបាយប្រកបដោយសុវត្ថិភាព និងងាយស្រួលសម្រាប់អ្នកនេសាទក្នុងការរាយការណ៍អំពីបទល្មើសនេសាទខុសច្បាប់ និងសកម្មភាពខុសច្បាប់ផ្សេងៗតាមសមុទ្រ នឹងជួយឱ្យសហគមន៍តំបន់ឆ្នេរ ក្លាយជាដៃគូក្នុងការការពារធនធានជលផលរបស់ខ្លួន។
ចំណែកមន្ត្រីស្ថានទូតអាម៉េរិកវិញ បាននិយាយថា ការដោះស្រាយបញ្ហាការនេសាទខុសច្បាប់ និងបញ្ហាពាក់ព័ន្ធនឹងសកម្មភាពតាមសមុទ្រ គឺជាផ្នែកមួយនៃកិច្ចហប្រតិបត្តិការរវាងសហរដ្ឋអាម៉េរិក និងហ្វីលីពីន ៕ (ផាន់ អាណា)
