ឡុងដ៍៖ កសិករនៅទូទាំងប្រទេសអង់គ្លេសនឹងទទួលបានជំនួយថ្មីបន្ថែមទៀត ដើម្បីជួយគ្រប់គ្រងផលប៉ះពាល់ពីគ្រោះរាំងស្ងួតអូសបន្លាយពេលយូរ ព្រមទាំងថវិកាចំនួន៦៥លានផោន ឬប្រហែល៨៨លានដុល្លារពីរដ្ឋាភិបាល ដើម្បីឆ្លើយតបចំពោះគ្រោះរាំងស្ងួត។
បច្ចុប្បន្ននេះ ទឹកដីប្រទេសអង់គ្លេសមួយភាគធំ កំពុងស្ថិតក្នុងស្ថានភាពគ្រោះរាំងស្ងួត។ ទោះជាយ៉ាងណា រដ្ឋាភិបាលបាននិយាយថា អាកាសធាតុរាំងស្ងួតនេះនឹងមិនប៉ះពាល់ដល់សន្តិសុខស្បៀងទេ។ ទន្ទឹមនឹងនេះ ការងារកែលម្អហេដ្ឋារចនាសម្ព័ន្ធទឹក ការសាងសង់អាងស្តុកទឹកថ្មីៗ និងការពង្រឹងសមត្ថភាពទប់ទល់នឹងគ្រោះរាំងស្ងួតរយៈពេលវែង។
កញ្ចប់ថវិកាជំនួយពីរដ្ឋាភិបាលនេះ រួមមានបង្កើនភាពបត់បែនក្នុងកម្មវិធីការពារបរិស្ថាន លើកទឹកចិត្តដល់ការធ្វើកសិកម្មប្រកបដោយចីរភាព ដោយជួយសាងសង់អាងស្តុកទឹកនៅក្នុងកសិដ្ឋាន និងធ្វើឱ្យកសិករអាចទទួលបានទឹកប្រើប្រាស់កាន់តែងាយស្រួល នៅពេលជួបគ្រោះរាំងស្ងួត។
រដ្ឋាភិបាលអង់គ្លេស បាននិយាយថា វិធានការទាំងនេះនឹងជួយកសិករអាចការពារដំណាំ និងការពារសត្វចិញ្ចឹម ស្របតាមបរិស្ថាន។
រដ្ឋាភិបាលនឹងផ្តល់ថវិកាបន្ថែមចំនួន ៦៨ លានដុល្លារ សម្រាប់កម្មវិធីលើកទឹកចិត្តកសិកម្មប្រកបដោយចីរភាព ឆ្នាំ២០២៦ ។ ចំណែកថវិកាចំនួន ២០ លានដុល្លារទៀត នឹងត្រូវប្រើសម្រាប់គាំទ្រការសាងសង់អាងស្តុកទឹកនៅក្នុងកសិដ្ឋាន។ កម្មវិធីនេះក៏នឹងមានការកែសម្រួលគោលការណ៍ណែនាំស្តីពីការរៀបចំផែនការ ដើម្បីធ្វើឱ្យការសាងសង់អាងស្តុកទឹកកាន់តែងាយស្រួលផងដែរ។
រដ្ឋាភិបាលក៏នឹងធ្វើឱ្យការរៀបចំទទួលយកទឹកសម្រាប់ប្រើប្រាស់ កាន់តែងាយស្រួលនៅពេលមានគ្រោះរាំងស្ងួត ដោយមានការគាំទ្រពីភ្នាក់ងារបរិស្ថានថែមទៀតផង។ ទោះជាយ៉ាងណា ការបូមទឹកពីប្រភពធម្មជាតិសម្រាប់កសិកម្មត្រូវគោរពតាមអាជ្ញាបណ្ណ និងកម្រិតលំហូរទឹកអប្បបរមា ដែលត្រូវរក្សាទុកក្នុងអាងស្តុកទឹក គឺនៅពេលបរិមាណទឹកធ្លាក់ចុះដល់កម្រិតកំណត់ កសិករមិនអាចបូមទឹកបន្តទៀតឡើយ។
កសិករដែលទទួលប្រាក់តាមរយៈកម្មវិធីលើកទឹកចិត្តកសិកម្មប្រកបដោយចីរភាព និងកិច្ចព្រមព្រៀងគ្រប់គ្រងដី នឹងទទួលបានភាពបត់បែនកាន់តែច្រើន ក្នុងអំឡុងពេលរាំងស្ងួត។ ឧទាហរណ៍ ប្រសិនបើមិនមានស្មៅដុះលូតលាស់កសិករអាចឱ្យសត្វចិញ្ចឹមរបស់ខ្លួនចូលទៅស៊ីស្មៅ ឬកាត់ស្មៅនៅក្នុងតំបន់ដែនជម្រកសត្វព្រៃបាន ប៉ុន្តែមិនត្រូវធ្វើឱ្យខូចគុណភាពដីឡើយ។
រដ្ឋាភិបាលនិយាយថា វិធានការទាំងនេះមានគោលបំណងការពារមិនឱ្យកសិករជ្រើសរើសរវាងការថែរក្សាសុខុមាលភាពសត្វចិញ្ចឹម និងការអនុវត្តតាមលក្ខខណ្ឌការពារបរិស្ថាន។ ភាពបត់បែនស្រដៀងគ្នានេះ ក៏ធ្លាប់ត្រូវបានអនុវត្តក្នុងអំឡុងគ្រោះរាំងស្ងួតឆ្នាំ២០២២ផងដែរ។
នាយករដ្ឋមន្ត្រីអង់គ្លេស លោក អែនឌី ប៊ើនហាំ (Andy Burnham) បាននិយាយថា
«សមត្ថភាពក្នុងការផលិតអាហារដោយខ្លួនឯង គឺជាបញ្ហាសន្តិសុខជាតិ ដូច្នេះ យើងកំពុងចាត់វិធានការឥឡូវនេះ ដោយបន្ថែមកញ្ចប់ថវិកាសម្រាប់ជួយកសិករ ជួយសាងសង់អាងស្តុកទឹក និងធ្វើឱ្យការទទួលបានទឹកកាន់តែងាយស្រួលនៅពេលទឹកខ្វះខាត»។
រដ្ឋមន្ត្រីក្រសួងបរិស្ថានបាននិយាយថា «កសិកររបស់យើងកំពុងប្រឈមនឹងស្ថានភាពលំបាកបំផុត ក្នុងរយៈពេលជាច្រើនទសវត្សរ៍កន្លមកងនេះ។ ដូច្នេះ យើងកំពុងចូលរួមជួយពួកគាត់ តាមរយៈការគាំទ្រ ដើម្បីជួយពួកគាត់ឱ្យឆ្លងផុតស្ថានភាពលំបាកនេះ និងបង្កើនភាពធន់សម្រាប់អនាគត»៕ (ផាន់ អាណា)
