ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), ឯកឧត្តម ចាន់ សីហា អគ្គនាយករងនៃធនាគារ ARDB ព្រមទាំងសហការី នាព្រឹកថ្ងៃទី៣១ ខែកក្កដា ឆ្នាំ២០២៦នេះ បានអញ្ជើញចូលរួមកិច្ចពិភាក្សា ស្តីអំពី “អត្ថប្រយោជន៍ និងឱកាសនៃការទទួលបានការគាំទ្រហិរញ្ញប្បទានសម្រាប់ធុរកិច្ច” នៃវេទិកាថ្នាក់ជាតិស្តីពីហិរញ្ញប្បទានសម្រាប់ធុរកិច្ច ឆ្នាំ២០២៦ ដែលរៀបចំឡើងនៅសណ្ឋាគារ រ៉េស៊ីដង់ សុខាភ្នំពេញ។
កិច្ចពិភាក្សានេះ គឺក្រោមការសម្របសម្រួលដោយលោក រ័ត្ន សោភ័ណ ប្រធានសមាគមធនាគារកម្ពុជា ព្រមទាំងវាគ្មិនកិត្តិយសរួមមានលោក ណូ លីដា អគ្គនាយកសាជីវកម្មធានាឥណទានកម្ពុជា, ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា, លោក ជា សុភ័ក្ត អគ្គនាយកធនាគារសហគ្រឹនធុនតូច និងមធ្យមកម្ពុជា។
នៅក្នុងឱកាសកិច្ចពិភាក្សានេះ ឯកឧត្តម ចាន់ សីហា បានលើកឡើងថា ចំពោះធនាគារ ARDBកន្លងមក គឺយើងមានសកម្មភាពជាច្រើន ដោយផ្តោតលើវិស័យកសិកម្មដូចជាការផ្តល់ឥណទានផ្តល់ដល់គ្រប់តួអង្គ ក្នុងខ្សែច្រវាក់តម្លៃកសិកម្មរួមមាន ដំណាំចន្ទី ពោត និងដំឡូងមី ព្រមទាំងអ្នកផលិត អ្នកកែច្នៃ និងផ្សារភ្ជាប់ទីផ្សារនាំចេញ ហើយកន្លងមកមានបញ្ហាខ្វះទុន គឺយើងប្រើប្រាស់យន្តការ អាចយកផលិតផលចន្ទីក្នុងឃ្លាំង ឬដំឡូងមីស្តុកទុក ដើម្បីធ្វើជាទ្រព្យបញ្ចាំ ដែលអាចស្នើសុំទុនពីធនាគារ ARDB បានសម្រាប់ជាទុនបង្វិលផងដែរ។
ឯកឧត្តមបានបញ្ជាក់ក្នុងកិច្ចពិភាក្សារទៀតថា រយៈពេល១០ឆ្នាំចុងក្រោយនេះធនាគារ ARDB បានបង្កើតផលិតផលថ្មីជាច្រើន មានដូចជាការធ្វើពិពិធកម្មលើផលិតផលផ្សេងៗទៀត ដែលកន្លងមកបងប្អូនយើងអស់ទ្រព្យបញ្ជាំហើយ ប៉ុន្តែចង់បានឥណទានយកទៅប្រើប្រាស់ ឥឡូវយើងមានណោះស្រាយដោយមានកិច្ចសន្យាបីភាគីរួមមាន អ្នកផលិត អ្នកប្រមូលទិញ និងខាងធនាគារ ដែលកិច្ចសន្យានេះផ្តល់លទ្ធភាពឲ្យអ្នកផលិតអាចផលិតបានហើយមានទីផ្សារ និងអាចលក់បានប្រាក់ចំណេញថែមទៀត។
សូមជម្រាបថា វេទិកាថ្នាក់ជាតិស្តីពីហិរញ្ញប្បទានសម្រាប់ធុរកិច្ច ឆ្នាំ២០២៦ រៀបចំឡើងរយៈពេលពីរថ្ងៃ ពីថ្ងៃទី៣០ ដល់ទី៣១ ខែកក្កដា ឆ្នាំ២០២៦ន ដែលមានការសហការរៀបចំដោយក្រសួងសេដ្ឋកិច្ច និងហិរញ្ញវត្ថុ និងស្ថាប័នពាក់ព័ន្ធការគាំទ្រហិញ្ញប្បទាន និងការអភិវឌ្ឍធុរកិច្ចរបស់រាជរដ្ឋាភិបាល រួមមាន៖ ធនាគារអភិវឌ្ឍន៍ជនបទ និងកសិកម្ម, សាជីវកម្មធានាឥណទានកម្ពុជា, គណៈកម្មាធិការសេដ្ឋកិច្ច និងធុរកិច្ចឌីជីថល, មូលនិធិអភិវឌ្ឍន៍សហគ្រិនភាព, សហគ្រិនខ្មែរ , មូលនិធិអភិវឌ្ឍន៍ជំនាញ, ធនាគារសហគ្រាសធុនតូច និងមធ្យមកម្ពុជា និងមជ្ឈមណ្ឌលបណ្តុះធុរកិច្ចថ្មី តេជោ។
វេទិកាថ្នាក់ជាតិនេះ គឺជាការឆ្លុះបញ្ចាំងយ៉ាងច្បាស់ អំពីកិច្ចសហប្រតិបត្តិការស្អិតល្មួតរវាងស្ថាប័នពាក់ព័ន្ធនៃរាជរដ្ឋាភិបាលក្នុងការបង្កើតសហថាមពល និងការបន្ស៊ីគោលនយោបាយអន្តរស្ថាប័ន សំដៅជំរុញការអភិវឌ្ឍវិស័យឯកជន ដែលផ្ដោតលើការលើកកម្ពស់លទ្ធភាពទទួលបានហិរញ្ញប្បទានប្រកបដោយបរិយាបន្ន និងភាពបត់បែន ដើម្បីធានាស្ថិរភាពអាជីវកម្ម និងជំរុញសកម្មភាពសេដ្ឋកិច្ចជាតិឲ្យមានសម្ទុះកាន់តែខ្លាំងក្លាឡើងថែមទៀត៕
