វ៉ាស៊ីនតោន៖ ប្រធានាធិបតីអាម៉េរិក លោក ដូណាល់ ត្រាំ (Donald Trump) បានផ្ញើសំណើទៅកាន់រដ្ឋសភាផ្តល់មូលនិធិបន្ថែម ដើម្បីជួយគាំទ្រផ្នែកកសិកម្ម ក្នុងទឹកប្រាក់ជាង១១ពាន់លានដុល្លារ លើកម្មវិធីកសិកម្ម ដែលផ្តោតសំខាន់លើការធានារ៉ាប់រងដំណាំ និងទឹកប្រាក់១២ពាន់លានដុល្លារផ្សេងទៀត សម្រាប់ផ្តល់ជូនកសិករ តាមរយៈកម្មវិធីជំនួយធ្វើជាស្ពានចម្លងរបស់កសិករ។
សំណើរបស់សេតវិមាន រួមមានជំនួយផ្នែកសេដ្ឋកិច្ចជាបណ្តោះអាសន្នក្នុងទំហំទឹកប្រាក់ចំនួន១០ពាន់លានដុល្លារ សម្រាប់អ្នកផលិតដំណាំជារង និងដំណាំមានសក្តានុពល នៅឆ្នាំ២០២៦ រួមជាមួយនឹងទឹកប្រាក់១,១ពាន់លានដុល្លារ ដែលបានកំណត់គោលដៅលើអ្នកផលិតកសិកម្ម ដែលទទួលរងការខាតបង់ធ្ងន់ធ្ងរពីព្យុះត្រជាក់ក្នុងរដូវរងា និងព្រឹត្តិការណ៍ធ្លាក់ព្រឹលទឹកកកនៅភាគអាគ្នេយ៍នៃសហរដ្ឋអាម៉េរិក។
មន្ត្រីសេតវិមានបាននិយាយថា រដ្ឋាភិបាលអាម៉រិកប៉ាន់ប្រមាណថាកម្រិតមូលនិធិបច្ចុប្បន្នរួមផ្សំជាមួយនឹងសំណើថ្មីនេះ នឹងផ្តល់ឱ្យកសិករនូវជំនួយហិរញ្ញវត្ថុប្រហែល៣០,៥ពាន់លានដុល្លារ ក្នុងអំឡុងឆ្នាំ២០២៦។ មន្ត្រីរូបនេះបានបន្ថែមថា ទឹកប្រាក់១០ពាន់លានដុល្លារ ឬប្រហែល២០ភាគរយនៃប្រាក់ចំណូលសុទ្ធរបស់កសិដ្ឋាន និងជួយដោះស្រាយការខាតបង់ នៅក្នុងផ្នែកខ្លះនៃកសិកម្ម។
រដ្ឋាភិបាលអាម៉េរិកទទួលស្គាល់ថា ការធានារ៉ាប់រងដំណាំ ជំនួយសង្រោះចំពោះគ្រោះមហន្តរាយ និងការទូទាត់មិនគ្របដណ្តប់រាល់ការខាតបង់។ ចំណែកនៅផ្នែកខាងគ្រោះមហន្តរាយ មានទឹកប្រាក់ចំនួន១,១ពាន់លានដុល្លារ សម្រាប់ការខាតបង់ដោយសារការធ្លាក់ព្រឹកទឹកកក ត្រូវបានធ្វើឡើងបន្ទាប់ពីរដ្ឋបាលពិពណ៌នាថា ជាការអនុវត្តថ្មីៗរបស់សភាក្នុងការផ្តល់ជំនួយបន្ថែម នៅពេលកម្មវិធីក្រសួងកសិកម្មសហរដ្ឋអាម៉េរិក ដែលកំពុងដំណើរការ និងការធានារ៉ាប់រងដំណាំ បន្ទាប់ពីហេតុការណ៍បង្កឡើងដោយការប្រែប្រួលអាកាសធាតុធំៗ រួមទាំងខ្យល់ព្យុះ និងធ្លាក់ព្រឹកទឹកកក។
សេតវិមានក៏បានកំណត់សន្តិសុខកសិកម្មជាផ្នែកមួយនៃសន្តិសុខជាតិ ដោយលើកហេតុផលថា អ្នកផលិតត្រូវតែអាចទប់ទល់នឹងការរំខានពីអាកាសធាតុ ការប្រែប្រួលទីផ្សារ និងសម្ពាធខ្សែសង្វាក់ផ្គត់ផ្គង់សកល។
រដ្ឋាភិបាលបានចង្អុលបង្ហាញពីវិធាកករដំឡើងពន្ធ និងជម្លោះពាណិជ្ជកម្ម នាពេលថ្មីៗនេះ ដែលជាផ្នែកមួយនៃវិធីសាស្រ្តអនុវត្តគោលនយោបាយកសិកម្មដ៏ទូលំទូលាយ រួមទាំងការផ្តល់សំណងពេញលេញសម្រាប់គ្រឿងចក្រ ឧបករណ៍ និងរចនាសម្ព័ន្ធកសិកម្ម ការផ្លាស់ប្តូរ ដែលជះឥទ្ធិពលដល់ការលក់ដីស្រែ ការលើកលែងពន្ធលើអចលនទ្រព្យ និងពង្រីកការនាំចេញផលិតផលកសិកម្មរបស់សហរដ្ឋអាម៉េរិក។
សំណើបន្ថែមនេះ បានកើតឡើងនៅពេលក្រុមតំណាងកសិដ្ឋាន និងសមាជិកសភា បន្តពិភាក្សាគ្នាអំពីរចនាសម្ព័ន្ធនៃច្បាប់ស្តីពីកសិដ្ឋានថ្មី ការចំណាយលើធាតុចូលខ្ពស់ ការទទួលបានពាណិជ្ជកម្ម និងកម្មវិធីបណ្តាញសុវត្ថិភាពរយៈពេលវែង។ ការយល់ព្រមពីរដ្ឋសភាគឺជាការចាំបាច់បំផុត មុនពេលផ្តល់មូលនិធិថ្មីណាមួយឱ្យទៅដល់អ្នកផលិតដោយផ្ទាល់។
ប្រសិនបើរដ្ឋសភាអនុម័តលើសំណើនេះ វានឹងបន្ថែមការគាំទ្រពីរដ្ឋាភិបាលសហព័ន្ធមួយកម្រិតទៀត សម្រាប់អ្នកផលិត ដែលប្រឈមនឹងបញ្ហាទទួលបានចំណូល ការខាតបង់ទាក់ទងនឹងអាកាសធាតុ និងលក្ខខណ្ឌទីផ្សារមិនស្មើគ្នា ដែលនឹងចូលមកដល់ឆ្នាំ២០២៦៕ (ផាន់ អាណា)
