ម៉ាស្កាត៖ កសិដ្ឋានមួយកន្លែងនៅប្រទេសអូម៉ង់ បានចាប់ផ្តើមដាំម្នាស់ក្នុងស្រុក បន្ទាប់ពីការស្រាវជ្រាវរយៈពេល១៥ឆ្នាំ ដែលរួមមានការវាយតម្លៃភាពសមស្របនៃលក្ខខណ្ឌដាំដុះក្នុងប្រទេស។
ផលិតកម្មម្នាស់នេះ គឺជាបទពិសោធថ្មីរបស់កសិដ្ឋានមួយ ដែលធ្លាប់សាកល្បងធ្វើកសិកម្មជាទ្រង់ទ្រាយតូចៗដោយដាំនៅក្នុងផើង រហូតដល់ការដាំម្នាស់ក្រោមម្លប់ឈើ និងក្នុងផ្ទះកញ្ចក់។ រយៈពេលដាំដុះម្នាស់នេះ ត្រូវចាប់ពីខែកក្កដា ដល់ខែធ្នូ ជារៀងរាល់ឆ្នាំ នៅពេលសីតុណ្ហភាពត្រជាក់ល្មម និងមានសំណើមខ្ពស់ជាងក្នុងរដូវស្លឹកឈើជ្រុះ។
ការលូតលាស់ម្នាស់ចាប់ផ្តើមប្រហែលប្រាំមួយខែ បន្ទាប់ពីការដាំ ខណៈពេលចេញផ្លែរហូតដល់ពេលប្រមូលផលមានរយៈពេលប្រហែល១២ខែ ពេលផ្នែកខាងក្រោមនៃផ្លែម្នាស់ប្រែទៅជាពណ៌មាសលឿង។
យោងតាមអ្នកឯកទេសកសិកម្មជាន់ខ្ពស់ប្រចាំកសិដ្ឋាន បានឱ្យដឹងថា ពូជម្នាស់ជាច្រើនត្រូវបានសិក្សាវាយតម្លៃអំពីលក្ខខណ្ឌដាំដុះ ដោយក្នុងនេះ រួមមានពូជម្នាស់បីប្រភេទ Queen, Mauritius និង MD-2។
ការដាំដុះដំណាំម្នាស់ នៅក្នុងកសិដ្ឋានខាងលើនេះ គឺជាការពិសោធន៍ជោគជ័យ និងត្រួសត្រាយផ្លូវក្នុងវិស័យកសិកម្ម ដែលមានពូជម្នាស់ជាច្រើនប្រភេទ រួមមានពូជ Queen, ពូជម្នាស់ទឹកឃ្មុំ និងពូជ MD-2 ហើយពូជ MD-2 បច្ចុប្បន្ន គឺជាពូជពេញនិយមខ្លាំងបំផុតមួយនៅទូទាំងពិភពលោក ដោយសារតែទំហំផ្លែធំ មានទម្ងន់ចាប់ពីពីរគីឡូក្រាម រហូតដល់ជាងមួយគីឡូក្រាម ក្នុងមួយផ្លែ ព្រមទាំងមានរសជាតិផ្អែម និងមានតម្លៃល្អលើទីផ្សារខ្ពស់។
លោកបានបន្ថែមថា ម្នាស់មានតម្រូវការទឹកតិច បើប្រៀបធៀបនឹងដំណាំត្រូពិចផ្សេងទៀត ហើយតាមបច្ចេកវិទ្យាបណ្តុះជាលិកា ដែលអាចបង្កើតជាពូជអាចដាំដុះបាន និងគ្មានជំងឺ ដើម្បីគាំទ្រដល់ការពង្រីកតាមតំបន់ដាំដុះនាពេលអនាគត។
ប្រទេសអូម៉ង់បានវិនិយោគលើវិស័យសន្តិសុខស្បៀង ក្នុងតម្លៃទឹកប្រាក់ជាង៩៣,៨លានរីយ៉ាល់អូម៉ង់ ឬស្មើនឹង២៤៣លានដុល្លារ ដោយផ្តោតលើកំណើនក្នុងវិស័យកសិកម្ម នេសាទ និងខ្សែច្រវាក់តម្លៃ។
គម្រោងវិនិយោគនេះកើតឡើងពីគំនិតផ្តួចផ្តើមរវាងក្រសួងពាណិជ្ជកម្ម ឧស្សាហកម្ម និងជំរុញការវិនិយោគ និងក្រសួងកសិកម្ម នេសាទ និងធនធានទឹករបស់ប្រទេសអូម៉ង់ ក្នុងគោលបំណងពង្រឹងភាពជាម្ចាស់ដោយខ្លួនឯង និងជំរុញការអភិវឌ្ឍន៍ខ្សែច្រវាក់ផ្គត់ផ្គង់។
កម្មវិធីវិនិយោគនេះស្របតាមក្របខណ្ឌថ្មី ឆ្នាំ២០២៦-២០៣០ ដែលចុះកិច្ចព្រមព្រៀងជាមួយអង្គការស្បៀងអាហារ និងកសិកម្ម (Food and Agriculture Organization) ដោយផ្តោតលើប្រព័ន្ធស្បៀងអាហារមានភាពធន់ ផលិតកម្មអាកាសធាតុឆ្លាតវៃ និងការគ្រប់គ្រងធនធានឱ្យកាន់តែប្រសើរឡើង ដោយផ្តោតសំខាន់លើការអភិវឌ្ឍជនបទ និងការពង្រឹងសមត្ថភាពស្ថាប័ននៅទូទាំងវិស័យកសិកម្មផងដែរ។
ចំណែកនៅក្នុងផលិតកម្ម គម្រោងជាច្រើនត្រូវបានកំណត់នៅក្នុងតំបន់ធ្វើកសិកម្មរបស់ប្រទេសអូម៉ង់ រួមមានការដាំខ្ទឹមបារាំង ខ្ទឹមស និងឪឡឹក រួមជាមួយនឹងការដាំបន្លែក្នុងផ្ទះកញ្ចក់ និងការកែច្នៃដំឡូង។ ការវិនិយោគទាំងនេះ នឹងជួយពង្រីកទិន្នផលក្នុងស្រុក និងគាំទ្រដល់ដំណាំមានតម្លៃខ្ពស់។ រីឯក្នុងវិស័យវារីវប្បកម្មវិញ ដែលរួមមាន ការដំាសារាយ, ចិញ្ចឹមប៉ៅហឺ និងគម្រោងចិញ្ចឹមបង្គា រួមទាំងការចិញ្ចឹមត្រីធូណា និងការផលិតចំណីត្រី។
តាមរយៈទំហំគម្រោងដ៏ធំនេះ ដែលមានចាប់ពីការវិនិយោគទ្រង់ទ្រាយមធ្យមរហូតដល់ការវិនិយោគជាយុទ្ធសាស្ត្រដ៏ធំនេះ បានបង្ហាញគោលជំហររបស់ប្រទេសអូម៉ង់ ក្នុងនាមជាមជ្ឈមណ្ឌលក្នុងតំបន់សម្រាប់ផលិតកម្មស្បៀងអាហារប្រកបដោយនិរន្តរភាព និងសមាហរណកម្មខ្សែសង្វាក់ផ្គត់ផ្គង់៕ (ផាន់ អាណា)
