ដោយ អៀវ ឈាងនី
បាត់ដំបង៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម ARDB នៅរសៀលថ្ងៃទី១៨ ខែកក្កដា ឆ្នាំ២០២៦ ក្នុងនាមធនាគារគោលនយោបាយរបស់រាជរដ្ឋាភិបាលនឹងបន្តលើកស្ទួយកសិករ អ្នកដាំដុះបន្លែ និងចិញ្ចឹមសត្វក្នុងស្រុក ដើម្បីផ្គត់ផ្គង់តម្រូវការទីផ្សារ និងអ្នកបរិភោគបន្លែប្រចាំថ្ងៃ។
ការលើកឡើងដូច្នេះរបស់ឯកឧត្តមបណ្ឌិត កៅ ថាច ក្នុងឱកាសអញ្ជើញពិនិត្យមើលកសិដ្ឋានបន្លែសុវត្ថិភាព កែ ស៊ីនួន ស្ថិតនៅក្នុងមជ្ឈមណ្ឌលបន្សាប ព្យាបាល និងស្តារនីតិសម្បទាអ្នកញៀនគ្រឿងញៀន នៅភូមិស្តៅ ឃុំស្តៅ ស្រុករតនមណ្ឌល ខេត្តបាត់ដំបង។
អមដំណើរដោយឯកឧត្តម បាន លឹម និងឯកឧត្តម ប៉ិច សានី អគ្គនាយករងធនាគារ ARDB និងសហការីបានអញ្ជើញពិនិត្យមើលដំណើរការដាំដុះបន្លែសុវត្ថិភាព នៅកសិដ្ឋានបន្លែសុវត្ថិភាព កែ ស៊ីនួន ដែលមានទីតាំងស្ថិតនៅក្នុងមជ្ឈមណ្ឌលបន្សាប ព្យាបាល និងស្តារនីតិសម្បទាអ្នកញៀនគ្រឿងញៀន និងកសិដ្ឋានចម្ការកំពង់ល្ពៅ ដែលកសិដ្ឋានទាំងពីរស្ថិតនៅស្រុករតនមណ្ឌល ខេត្តបាត់ដំបង។
ចំពោះកសិដ្ឋានបន្លែសុវត្ថិភាព កែ ស៊ីនួន កំពុងដាំដុះបន្លែក្នុងផ្ទះសំណាញ់ចំនួន៦០ខ្នង ក្នុងទំហំដីប្រមាណជាង ១០ហិកតា ដោយមានគ្រូជំនាញ១២រូប ចាំជួយបណ្តុះបណ្តាលអ្នកញៀនគ្រឿងញៀនឱ្យចេះដាំដុះបន្លែក្នុងផ្ទះសំណាញ់ និងបន្សាបគ្រឿងញៀន។ ក្នុងមួយថ្ងៃបន្លែប្រមាណ១៥០គីឡូក្រាម ត្រូវបានផ្គត់ផ្គង់ដល់មជ្ឈមណ្ឌលបន្សាប ព្យាបាល និងស្តារនីតិសម្បទាអ្នកញៀនគ្រឿងញៀនដែលបច្ចុប្បន្ននេះ មានដាំដុះបន្លែសុវត្ថិភាព មាន ស្ពៃតឿ ស្ពៃក្រញាញ់ ស្ពៃចង្កឹះ ប៉េងប៉ោះឈើរី និងខាត់ណាដើម ដើម្បីផ្គត់ផ្គង់នៅក្នុងមជ្ឈមណ្ឌល និងលើទីផ្សារក្នុងស្រុកមួយចំនួន។
ដោយឡែកកសិដ្ឋានចម្ការកំពង់ល្ពៅ ស្ថិតនៅភូមិរស្មីសង្ហា ឃុំរស្មីសង្ហា ស្រុករតនមណ្ឌល ខេត្តបាត់ដំបង ដែលមានសហគមន៍ដាំបន្លែចម្រុះ និងត្រសក់ផ្អែម ជាមួយផ្ទះសំណាញ់ជាង១០០ខ្នង សម្រាប់ផ្គត់ផ្គង់លើទីផ្សារ។
ឯកឧត្តមបណ្ឌិត កៅ ថាច បាននិងកំពុងតែជំរុញ លើកស្ទួយកសិករអ្នកដាំដុះ ដើម្បីផ្គត់ផ្គង់តម្រូវការអ្នកបរិភោគបន្លែប្រចាំថ្ងៃ ជាពិសេស ការផលិតបន្លែក្នុងស្រុកឲ្យបានច្រើន បង្កើតការងារនៅតាមមូលដ្ឋាន និងលើកកម្ពស់ជីវភាពប្រជាពលរដ្ឋនៅជនបទ។
សម្រាប់ការចិញ្ចឹមសត្វវិញ នារសៀលថ្ងៃសៅរ៍ ទី១៨ ខែកក្កដា ឆ្នាំ២០២៦ ឯកឧត្តមបណ្ឌិត កៅ ថាច និងសហការី ក៏បានអញ្ជើញពិនិត្យដោយផ្ទាល់នៅកសិដ្ឋានចិញ្ចឹមគោយកសាច់ «Farm Right Place Rise upដែលមានទីតាំងនៅភូមិព្រៃផ្តៅ ឃុំតាគ្រាម ស្រុកបាណន់ ខេត្តបាត់ដំបង។
ឯកឧត្តមបណ្ឌិត កៅ ថាច បានកោតសរសើរចំពោះការវិនិយោគ និងការរៀបចំកសិដ្ឋាន Farm Right Place Rise up ដែលបានអនុវត្តតាមបច្ចេកទេសបានយ៉ាងល្អ និងមានការគ្រប់គ្រងអនាម័យខ្ពស់ និងការផ្គត់ផ្គង់ចំណីអាហារប្រកបដោយស្តង់ដារ។
លោក ធឿន បញ្ញា អ្នកគ្រប់គ្រងកសិដ្ឋាន Farm Right Place Rise up ចិញ្ចឹមគោយកសាច់ គឺមិនត្រឹមតែជាកន្លែងផលិតសាច់គោ ប្រកបដោយគុណភាព និងសុវត្ថិភាពសម្រាប់ទីផ្សារក្នុងស្រុកប៉ុណ្ណោះទេ ប៉ុន្តែថែមទាំងដើរតួនាទីយ៉ាងសំខាន់ក្នុងប្រព័ន្ធអេកូឡូស៊ីកសិកម្ម ដោយផ្តល់ឱ្យមានការបង្កើតការងារ ដោយផ្តល់ឱកាសការងារ និងប្រាក់ចំណូលរឹងមាំ ដល់ប្រជាពលរដ្ឋនៅក្នុងសហគមន៍មូលដ្ឋាន។
ចំណែកការប្រើប្រាស់វត្ថុធាតុដើមក្នុងស្រុក គឺការប្រមូលទិញផលិតផលកសិកម្ម ដូចជាចំបើង កាកសំណល់ដំឡូងមី និងពោតពីកសិករជុំវិញតំបន់ដើម្បីធ្វើជាចំណីសត្វ ដែលជួយបង្កើនចំណូលបន្ថែមដល់កសិករដាំដុះ។
កសិដ្ឋានខាងលើមានគោសរុបចំនួនជាង៤ ០០០ក្បាល ដោយប្រមូលទិញពីកសិករ និងឈ្មួញដឹកមកលក់ដល់ទីតាំងផ្ទាល់ ជាមួយផ្ទៃដីកសិដ្ឋានសរុបចំនួន៦០ហិកតា៕
