ព្រុចសែល៖ គណៈកម្មការសហភាពអឺរ៉ុប កាលពីថ្ងៃទី៩ ខែកក្កដា ឆ្នាំ២០២៦នេះ បានបើកការស៊ើបអង្កេត លើការនាំចូលទាប៉េកាំង បន្ទាប់ពីអ្នកចិញ្ចឹមទាជាច្រើនរបស់សហភាពអឺរ៉ុប បានត្អូញត្អែរពីតម្លៃលក់ទារបស់ចិនទាបយ៉ាងអយុត្តិធម៌ ដែលប៉ះពាល់ដល់ឧស្សាហកម្មរបស់ពួកគេ។
ដោយពុំបានបង្ហាញឈ្មោះរបស់ខ្លួន គណៈកម្មការនេះបានឱ្យដឹងថា អ្នកចិញ្ចឹមទាប្រាំរូបរបស់សហភាពអឺរ៉ុប បានត្អូញត្អែរថា រដ្ឋាភិបាលប្រទេសចិនកំពុងផ្តល់ឧបត្ថម្ភធន ដោយមិនស្មើភាពដល់អ្នកចិញ្ចឹមទានៅក្នុងប្រទេសចិន តាមរយៈផែនការរយៈពេលប្រាំឆ្នាំរបស់ខ្លួន សម្រាប់ការធ្វើទំនើបកម្មកសិកម្ម។
ការស៊ើបអង្កេតនេះ ត្រូវធ្វើឡើងនៅពេលមានភាពតានតឹងខ្លាំងរវាងរដ្ឋាភិបាលក្រុងប៉េកាំង និងរដ្ឋាភិបាលក្រុងប្រ៊ុចសែល ខណៈពេលសហភាពអឺរ៉ុប ព្យាយាមការពារទីផ្សាររបស់ខ្លួន ពីការនាំចូលទំនិញថោកៗពីប្រទេសចិន ដែលបានបង្កឱ្យមានការខឹងសម្បាររបស់រដ្ឋាភិបាលក្រុងប៉េកាំង ដោយសារខ្លួនមានគោលបំណងរក្សាលទ្ធភាពចូលទៅកាន់ទីផ្សារអឺរ៉ុបដែលផ្តល់ប្រាក់ចំណេញច្រើន។
បន្ទាប់ពីប្រទេសចិនបានគំរាមសងសឹកម្តងហើយម្តងទៀត ចំពោះសេចក្តីស្នើច្បាប់មួយចំនួនរបស់សហភាពអឺរ៉ុប ដែលមានគោលបំណងដាក់កម្រិតលើលទ្ធភាពទទួលបានលទ្ធកម្មសាធារណៈរបស់សហភាពអឺរ៉ុប និងដាក់លក្ខខណ្ឌតឹងរ៉ឹងលើការវិនិយោគរបស់បរទេស ដោយភាគីទាំងពីរបានចាប់ផ្តើមការចរចាកាលពីសប្តាហ៍មុន ដើម្បីបន្ធូរបន្ថយភាពតានតឹងនេះ។
ទោះជាយ៉ាងនេះក្តី វិធានការចុងក្រោយរបស់សហភាពអឺរ៉ុប ដែលកំណត់ទិសដៅលើការនាំចូលទា អាចនឹងរំខានដល់កិច្ចពិភាក្សានេះ ដោយបាននិយាយវាយប្រហារលើវិស័យកសិកម្មរបស់ប្រទេសចិន។
របាយការណ៍របស់សហភាពអឺរ៉ុប ក៏បានបញ្ជាក់ផងដែរថា បរិមាណនាំចូល និងតម្លៃលក់ទា កំពុងបង្កផលប៉ះពាល់អវិជ្ជមានលើបរិមាណ និងការកម្រិតតម្លៃ និងចំណែកទីផ្សារ ដែលកាន់កាប់ដោយឧស្សាហកម្មសហភាព ហើយនេះបានបណ្តាលឱ្យមានផលប៉ះពាល់យ៉ាងធ្ងន់ធ្ងរដល់ដំណើរការទាំងមូលរបស់វិស័យកសិកម្ម។
ការស៊ើបអង្កេតរបស់គណៈកម្មការនេះ អាចបណ្តាលឱ្យមានពន្ធប្រឆាំងនឹងការលក់បង្ខូចតម្លៃមកលើកសិករចិន ដើម្បីការពារទីផ្សារសហភាពអឺរ៉ុប។
ចំពោះពន្ធប្រឆាំងនឹងការលក់បង្អួចថ្លៃ និងពន្ធប្រឆាំងនឹងការឧបត្ថម្ភធន គឺស្ថិតក្នុងចំណោមឧបករណ៍ការពារពាណិជ្ជកម្មសំខាន់ៗរបស់សហភាពអឺរ៉ុប ដើម្បីប្រឆាំងនឹងការជំរុញដ៏ខ្លាំងក្លារបស់ចិនចូលទៅក្នុងទីផ្សាររបស់ខ្លួន។ ទោះជាយ៉ាងណាក៏ដោយ មេដឹកនាំសហភាពអឺរ៉ុប កាលពីខែមិថុនា ឆ្នាំ២០២៦នេះ បានផ្តល់អាណត្តិដល់គណៈកម្មការនេះ ដើម្បីបង្កើនកិច្ចខិតខំប្រឹងប្រែង សម្រាប់កាត់បន្ថយឱនភាពពាណិជ្ជកម្ម ក្នុងទំហំទឹកប្រាក់ជាង១ ១៤៣លានដុល្លារ របស់សហភាពអឺរ៉ុបជាមួយប្រទេសចិន។
ពួកគេចង់ឱ្យនាយកប្រតិបត្តិសហភាពអឺរ៉ុប ដែលមានសមត្ថភាពលើគោលនយោបាយពាណិជ្ជកម្ម ត្រូវពិនិត្យឡើងវិញនូវឧបករណ៍ការពារពាណិជ្ជកម្មរបស់ខ្លួន ហើយបន្តកិច្ចសន្ទនាជាមួយរដ្ឋាភិបាលទីក្រុងប៉េកាំង តាមលទ្ធផលជាក់ស្តែង។
ស្នងការពាណិជ្ជកម្មសហភាពអឺរ៉ុប លោក ម៉ាកូស សេហ្វកូវិច (Maroš Šefčovič) បានជួបពិភាក្សាជាមួយរដ្ឋមន្ត្រីក្រសួងពាណិជ្ជកម្មចិន លោក វ៉ាង វិនថាវ (Wang Wentao) នៅទីក្រុងព្រុចសែល កាលពីសប្តាហ៍មុន ដើម្បីចាប់ផ្តើមការចរចា ក្នុងគោលបំណងស្តារឡើងវិញនូវការប្រកួតប្រជែងដោយសេរី និងដោះស្រាយអតុល្យភាពពាណិជ្ជកម្ម ដែលទីក្រុងព្រុចសែលបាននិយាយថា លទ្ធផលនៃការចរចាមិនមានចីរភាពយូរអង្វែងឡើយ។
សហភាពអឺរ៉ុប ធ្លាប់បានដាក់ពន្ធរួចហើយលើរថយន្តអគ្គិសនីរបស់ចិនក្នុងឆ្នាំ២០២៤ ដែលជំរុញឱ្យមានការស៊ើបអង្កេត និងការដាក់ទណ្ឌកម្មសងសឹករបស់ចិនលើផលិតផលម៉ាកយីហោល្បីៗ សាច់ជ្រូក និងទឹកដោះគោរបស់សហភាពអឺរ៉ុប។
សហភាពអឺរ៉ុបសង្ឃឹមថា នឹងសម្រេចបាននូវរបកគំហើញមួយនៅក្នុងការចរចាជាមួយរដ្ឋាភិបាលទីក្រុងប៉េកាំង នៅពេលពេល លោក ម៉ាកូស សេហ្វកូវិច ធ្វើដំណើរទៅកាន់ប្រទេសចិន នៅក្នុងខែតុលា ឆ្នាំ២០២៦នេះ៕ (ផាន់ អាណា)
