ដោយ ឡុង សារេត
ខេត្តតាកែវ៖ លោក ហៀក ចំរើន អ្នកចិញ្ចឹមជ្រូកខ្នាតមធ្យមមួយកន្លែង នៅភូមិឫស្សីស្រុក ឃុំញ៉ែងញ៉ង ស្រុកត្រាំកក់ ខេត្តតាកែវ មានការរំពឹងថា តម្លៃជ្រូករស់អាចលក់បានតម្លៃខ្ពស់ចាប់ពីចុងខែមិថុនា រហូតដល់ខែកញ្ញា ឆ្នាំ២០២៦នេះ ស្របពេលគ្រួសាររបស់លោកបាននិងកំពុងចិញ្ចឹមជ្រូកសាច់សរុបប្រមាណ៥០០ក្បាល។
ក្នុងចំណោមជ្រូកសាច់សរុបប្រមាណ៥០០ក្បាល,លោកបានគូសបញ្ជាក់ថា នៅចុងខែមិថុនានេះ លោកត្រៀមលក់ជ្រូកសាច់ចំនួន៣៨ក្បាល, នៅពាក់កណ្តាលខែសីហា មានចំនួន២០០ក្បាល ហើយនៅសល់ប៉ុន្មាននឹងលក់ចេញទាំងអស់នៅនៅខែកញ្ញាខាងមុខ។
បើតាមលោក ហៀក ចំរើន តម្លៃជ្រូករស់នៅលើទីផ្សារក្នុងស្រុកនាពេលបច្ចុប្បន្នអាចលក់បានថ្លៃរង្វង់១០ ០០០រៀលក្នុងមួយគីឡូក្រាម ហើយចាប់ពីចុងខែមិថុនាខាងមុខនេះ លោករំពឹងថា អាចលក់បានថ្លៃចន្លោះពី១១ ៥០០ ទៅ១២ ០០០រៀលក្នុងមួយគីឡូក្រាម ឬតម្លៃខុសគ្នាតិចតួចទៅតាមទីផ្សារជាក់ស្តែង។
លោកអះអាងថា ទោះបីតម្លៃជ្រូករស់នៅពេលខាងមុខមានការប្រែប្រួលថ្លៃតិចតួច មិនដូចទៅតាមការចង់បានរបស់កសិករក៏ដោយ ក្នុងនាមកសិករលោកអាចទទួលយកបាន។
សូមជម្រាបជូនផងដែរថា លោក ហៀក ចំរើន បានចាប់ផ្តើមចិញ្ចឹមជ្រូកជាលក្ខណៈមួយក្បាល ហើយនៅគ្រាបន្ទាប់មកទៀត ការចិញ្ចឹមជ្រូកមេពូជបន្តកើនឡើងជិត១០០ក្បាល។ ប៉ុន្តែសព្វថ្ងៃនេះ ជ្រូកមេពូជនៅសល់ប្រមាណ៣០ក្បាល និងមានជ្រូកសាច់ប្រហែល៥០០ក្បាល ដោយក្នុងមួយក្បាលមានទម្ងន់ចន្លោះពី៦០ ទៅ៧០គីឡូក្រាម។
ពាក់ព័ន្ធនឹងការចិញ្ចឹជ្រូកនេះដែរ ក្នុងរយៈពេលប្រហែលបីទៅបួនឆ្នាំកន្លងមកនេះ បន្ទាប់ពីប្រទេសកម្ពុជាបានបញ្ចប់ការនាំជ្រូករស់មកលក់ក្នុងប្រទេសកម្ពុជាដូចមុនទៀតហើយ។ ដូច្នេះជ្រូកចិញ្ចឹមនៅក្នុងប្រទេសកម្ពុជា ទាំងការចិញ្ចឹមជាលក្ខណៈក្រុមហ៊ុន កសិដ្ឋានតូច-ធំ ការចិញ្ចឹមតាមលក្ខណៈឯកជន និងពិសេសពលរដ្ឋចិញ្ចឹមជាលក្ខណៈក៏មានសន្ទុះផុលផុសជាងមុនផងដែរ។
ការផ្គត់ផ្គង់ជ្រូករស់ ដែលជាផលិតកម្មចិញ្ចឹមជ្រូកនៅកម្ពុជា អាចឆ្លើយតបតាមតម្រូវការទីផ្សារបានគ្រប់គ្រាន់។ ចំណែកគុណភាពក៏ផ្តល់ទំនុកចិត្តដល់អ្នកបរិភោគជាងមុន ខណៈការការនាំចូលជ្រូកពីប្រទេសជិតខាងកាលពីពេលកន្លងមកនេះ អ្នកបរិភោគតែងព្រួយបារម្ភពីបញ្ហាសារជាតិគីមី ឬជំងឺឆ្លងបង្កការប៉ះពាល់ដល់សុខភាពរបស់ពួកគាត់។
លោក ស្រ៊ុន ពៅ ប្រធានសមាគមន៍ អ្នកចិញ្ចឹមសត្វនៅកម្ពុជាបានបញ្ជាក់ប្រាប់ ARDB TV កាលពីពាក់កណ្តាលឆ្នាំ២០២៥ថា ប្រទេសកម្ពុជាបានបញ្ចប់ការនាំសត្វជ្រូករស់ទាំងស្រុងពីប្រទេសជិតខាង។ ដូច្នេះរហូតមកដល់ពេលនេះ ការចិញ្ចឹមក្នុងស្រុកផ្គត់ផ្គង់គ្រប់គ្រាន់ ហើយតម្លៃទៀតសោតសមរម្យ ដែលហេតុនេះ គេមើលឃើញថា ពលរដ្ឋកម្ពុជាចាប់ផ្តើមចិញ្ចឹមជ្រូកកាន់តែច្រើនជាបន្តបន្ទាប់។
ចំពោះតម្លៃជ្រូករស់នៅក្នុងឆ្នាំ២០២៥ អាចទទួលបានក្នុងមួយគីឡូក្រាម១០ ០០០រៀល ទៅ១០ ៥០០រៀល។ ដោយឡែកតម្លៃសាច់ជ្រូកលក់តាមទីផ្សារវិញក្នុងមួយគីឡូក្រាមមានតម្លៃក្រោម២០ ០០០រៀល។
គួរបញ្ជាក់ថា ការចិញ្ចឹមជ្រូកជាមុខរបរមួយសម្រាប់ទ្រទ្រង់ជីវភាពរបស់ប្រជាពលរដ្ឋកម្ពុជានៅតាមបណ្តាខេត្ត ក្រៅអំពីការធ្វើស្រែចម្ការ។ ហើយបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនាកន្លងមកដែរថា ការចិញ្ចឹមជ្រូកនៅទូទាំងប្រទេសកម្ពុជា ស្ថិតនៅក្នុងចន្លោះប្រមាណជិតបីលានក្បាល ទៅជាងបីលានក្បាលក្នុងមួយឆ្នាំៗ ហើយក្នុងចំណោមនេះក្រៅពីបំពេញតម្រូវការសាច់ក្នុងស្រុកហើយ ជ្រូកមួយចំនួនក៏បានបញ្ជូនទៅលក់ក្រៅប្រទេសទៀតផង៕
