តៃប៉ិ៖ កោះតៃវ៉ាន់បាននាំចេញផ្លែឈើស្រស់ជាលើកដំបូងក្នុងទ្រង់ទ្រាយធំទៅកាន់ប្រទេសបារាំង បន្ទាប់ពីបានបំពេញតាមលក្ខខណ្ឌតម្រូវនៃការនាំចូល និងការដាក់ឱ្យនៅដាច់ពីគេរបស់សហភាពអឺរ៉ុប។
ផ្លែឈើត្រូវបាននាំចេញនេះមានបរិមាណសរុបចំនួនប្រាំមួយតោន រួមមានស្វាយ ផ្លែគូលេន និងផ្លែស្រកានាគ ដោយដឹកទៅឱ្យផ្សារលក់ដុំមួយកន្លែង ស្ថិតនៅក្បែរទីក្រុងប៉ារីស ប្រទេសបារាំង។
ថ្លែងក្នុងពិធីជូនដំណើរនាំចេញនេះ រដ្ឋមន្ត្រីក្រសួងកសិកម្ម បានឱ្យដឹងថា ការនាំចេញផ្លែឈើស្រស់របស់កោះតៃវ៉ាន់ទៅកាន់តំបន់អឺរ៉ុបនាពេលកន្លងមក មានបរិមាណតិចតួចនៅឡើយ តែការនាំចេញលើកនេះបង្ហាញពីការចាប់ផ្តើមពង្រីកលទ្ធភាពនាំផ្លែឈើស្រស់ចូលទៅកាន់ទីផ្សារអឺរ៉ុប។
ចំណែកក្រុមហ៊ុននាំចេញ បាននិយាយថា ការដឹកជញ្ជូននេះ ដើម្បីផ្គត់ផ្គង់តាមការបញ្ជាទិញរបស់ផ្សារលក់ដុំផលិតផលស្រស់ៗធំជាងគេរបស់ប្រទេសបារាំង។ ទីផ្សារនេះរួមមានអាជីវកម្ម និងការផ្គត់ផ្គង់ភោជនីយដ្ឋាន សណ្ឋាគារ និងអ្នកលក់រាយជាង១ ២០០កន្លែង។
យោងតាមអ្នកនាំចេញ បានឱ្យដឹងថា ការដឹកជញ្ជូនផ្លែឈើស្រស់ទៅកាន់ប្រទេសបារាំងតម្រូវឱ្យមានកិច្ចសហប្រតិបត្តិការរវាងអ្នកដាំដុះ និងអ្នកប្រមូលទិញ ដើម្បីអនុលោមតាមស្តង់ដារផលិតកម្មរបស់សហភាពអឺរ៉ុប និងការដាក់ឱ្យនៅដាច់ពីគេ ដើម្បីពិនិត្យមើលសត្វល្អិត។ កោះតៃវ៉ាន់ក៏បានបង្កើតមជ្ឈមណ្ឌលភស្តុភារកម្មសម្រាប់ខ្សែសង្វាក់ត្រជាក់អន្តរជាតិ ដើម្បីគាំទ្រដល់ការនាំចេញទៅកាន់ទីផ្សារក្រៅប្រទេស។
ក្រសួងកសិកម្មតៃវ៉ាន់ បាននិយាយថា កាលពីខែមិថុនាឆ្នាំមុន សហភាពអឺរ៉ុបបានឯកភាពចំពោះការនាំចូលផ្លែត្របែក និងផ្លែស្វាយរបស់តៃវ៉ាន់ទៅកាន់រដ្ឋជាសមាជិកសហភាពអឺរ៉ុបទាំងអស់ បន្ទាប់ពីការចរចា និងការរៀបចំបច្ចេកទេស។
ការនាំចូលផ្លែគូលេន និងផ្លែស្រកានាគរបស់តៃវ៉ាន់ ត្រូវបានសហភាពអឺរ៉ុបឯកភាពកាលពីខែកុម្ភៈ ឆ្នាំ២០២៦។
យោងតាមក្រសួងដដែលនេះ បទប្បញ្ញត្តិរបស់សហភាពអឺរ៉ុបរួមមានលក្ខខណ្ឌតម្រូវ ដែលគ្របដណ្ដប់លើការគ្រប់គ្រងចម្ការ ការគ្រប់គ្រងសត្វល្អិត និងការដឹកជញ្ជូនតាមខ្សែចង្វាក់ត្រជាក់បន្ទាប់ប្រមូលផលរួច។
កាលពីដើមឆ្នាំ២០២៦នេះ កោះតៃវ៉ាន់បាននាំចេញផ្លែក្រូចថ្លុង ផ្លែក្រូចឃ្វិច និងផ្លែពុទ្រាស្រស់ ចូលទីផ្សាររបស់ប្រទេសសឹង្ហបុរី តាមរយៈការដឹកចេញតាមកប៉ាល់។
ស្របពេលជាមួយគ្នានេះដែរ ទីភ្នាក់ងារកសិកម្ម និងស្បៀងអាហារតៃវ៉ាន់ បានដាក់ចេញនូវការឧបត្ថម្ភធនលើការនាំចេញ និងកែច្នៃ ផ្លែទៀបបារាំង ស្របពេលការប្រមូលផលផ្លែទៀបបារាំងរបស់កោះតៃវ៉ាន់ ទទួលបានទិន្នផលខ្ពស់បំផុត។ គំនិតផ្តួចផ្តើមនេះ មានគោលបំណងគាំទ្រដល់ការលក់ និងគ្រប់គ្រងការផ្គត់ផ្គង់ផ្លែទៀបបារាំង ពីពាក់កណ្តាលខែកុម្ភៈ ដល់ដើមខែមីនា ដែលជាពេលប្រមូលទិន្នផលធំប្រចាំឆ្នាំ។
យោងតាមទិន្នន័យផ្លូវការ បានឱ្យដឹងថា ផ្ទៃដីផលិតផ្លែទៀបបារាំងសំខាន់ជាងគេរបស់កោះតៃវ៉ាន់មានទំហំប្រមាណ២ ៤៥៤ហិកតា កាលពីឆ្នាំមុន ដែលមានផ្តល់ទិន្នផល១២ ៧៦១តោន។ ចំណែកទំហំនៃការនាំចេញមានបរិមាណប្រហែល៦០ភាគរយនៃទិន្នផលសរុប។
ទីភ្នាក់ងារនេះ កំពុងធ្វើការជាមួយថ្នាលពាណិជ្ជកម្មតាមប្រព័ន្ធអេឡិចត្រូនិក ដើម្បីពង្រីកបណ្តាញលក់ក្នុងស្រុក រួមទាំងរៀបចំជាប្រអប់កាដូសម្រាប់បុណ្យចូលឆ្នាំថ្មី និងការទិញក្នុងបិរមាណច្រើនសម្រាប់ផ្នែកអាជីវកម្ម។ ការឧបត្ថម្ភធន កំពុងត្រូវបានផ្តល់ជូនសម្រាប់ចំណាយលើការវេចខ្ចប់ និងការនាំចេញ ព្រមទាំងលើកទឹកចិត្តដល់ការកែច្នៃ ដើម្បីបង្កើនបន្ថែមតម្លៃ ដើម្បីធ្វើពិពិធកម្មទម្រង់ផលិតផល និងអាចរក្សាភាពស្រស់បានយូរ។
វិធានការនាពេលបច្ចុប្បន្ននេះ ត្រូវបានចាត់ទុកថា ជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់ ដើម្បីរក្សាតុល្យភាពការផ្គត់ផ្គង់ រក្សាបរិមាណនាំចេញ និងគាំទ្រដល់ការប្រើប្រាស់ក្នុងស្រុក ក្នុងអំឡុងពេលប្រមូលផលខ្ពស់បំផុត នៅក្នុងតំបន់ផលិតផ្លែទៀបបារាំងដ៏សំខាន់របស់កោះតៃវ៉ាន់៕ (ផាន់ អាណា)
