តាស្កិន៖ ទីភ្នាក់ងារការពារ និងចត្តាឡីស័ករុក្ខជាតិ បានរាយការណ៍ថា ប្រទេសអ៊ូសបេគីស្ថានទទួលបានការអនុញ្ញាតឱ្យនាំចូលបន្លែស្ងួតចំនួនដប់ប្រភេទទៅកាន់ទីផ្សារប្រទេសចិន។
កិច្ចព្រមព្រៀងឱ្យនាំចូលនេះ ត្រូវបានសម្រេចក្នុងអំឡុងពេលដំណើរទស្សនកិច្ចរបស់តំណាងនៃប្រទេសអ៊ូសបេគីស្ថាន ទៅកាន់ប្រទេសចិន នៅដើមខែឧសភា ឆ្នាំ២០២៦នេះ។
ឥឡូវនេះ ក្រុមហ៊ុននាំចេញរបស់ប្រទេស អ៊ូសបេគីស្ថាន អាចផ្គត់ផ្គង់បន្លែស្ងួត មានដូចជាខ្ទឹមស ខ្ទឹមបារាំង មើមយ៉េន ការ៉ុត ប៉េងប៉ោះ ឆៃថាវ និងបន្លែផ្សេងៗទៀត សម្រាប់នាំចូលទៅកាន់ទីផ្សារប្រទេសចិន។
ដើម្បីនាំចូលផលិតផលកសិកម្មទៅក្នុងប្រទេស ក្រុមហ៊ុនអ៊ូសបេគីស្ថានត្រូវតែចុះបញ្ជីឈ្មោះទំនិញ នៅក្នុងប្រទេសចិន។ លើសពីនេះ ទំនិញត្រូវតែបំពេញតាមលក្ខខណ្ឌចាំបាច់ ស្តីពីសុវត្ថិភាពចំណីអាហារ មានវិញ្ញាបនបត្រភូតគាមអនាម័យ និងមិនមានសត្វល្អិតចង្រៃ។ ក្រុមហ៊ុនអ៊ូសបេគីស្ថានអាចទាក់ទងភ្នាក់ងារ ដើម្បីដាក់បញ្ចូលក្នុងបញ្ជីឈ្មោះនេះ។
យោងតាមគណៈកម្មាធិការស្ថិតិ បានឱ្យដឹងថា ចំណូលពាណិជ្ជកម្មរវាងអ៊ូសបេគីស្ថាន និងចិន បានកើនលើសពី៤,៦ពាន់លានដុល្លារ នៅក្នុងត្រីមាសទីមួយនៃឆ្នាំ២០២៦នេះ។ បើគិតពីក្នុងខែមករា ដល់ខែមីនា ឆ្នាំ២០២៥ តួលេខទឹកប្រាក់នាំចេញនេះមានចំនួនត្រឹមតែ៣ ០០០លានដុល្លារ។
គិតត្រឹមដើមខែមេសា ឆ្នាំ២០២៦ ប្រទេសអ៊ូសបេគីស្ថាន បាននាំចេញផ្លែឈើ និងបន្លែចំនួន៣៤០ ០០០តោន ហើយបើគិតជាទឹកប្រាក់នៃការនាំចេញ មានចំនួនជាង៣១៧លានដុល្លារ។
ការនាំចេញភាគច្រើនមានបន្លែចំនួន១៤៨,២ពាន់តោន ផ្លែឈើមានចំនួន៧៥,២ពាន់តោន និងផលិតផលកសិកម្មប្រភេទផ្សេងទៀត មានចំនួន៨៨ពាន់តោន។
បើយោងតាមរបាយការណ៍របស់គណៈកម្មាធិការស្ថិតិជាតិ អ៊ូសបេគីស្ថាន បានឱ្យដឹងថា ការនាំចេញបន្លែ និងផ្លែឈើ របស់ប្រទេសអ៊ូសបេគីស្ថាន បានកើនដល់បរិមាណ៣៣៩ ៩០០តោន នៅក្នុងត្រីមាសទីមួយ នៃឆ្នាំ២០២៦ គឺកើនឡើង១០ភាគរយ ពីមួយឆ្នាំទៅមួយឆ្នាំ។ បើគិតជាទឹកប្រាក់វិញ កើនឡើង១២,៤ភាគរយ ឬស្មើនឹង៣១៧,៧លានដុល្លារ។
គណៈកម្មាធិការស្ថិតិជាតិដដែលនេះ បានឱ្យដឹងទៀតថា ការនាំចេញផ្លែឈើមានទឹកប្រាក់ចំនួន៩៣លានដុល្លារ ខណៈការនាំចេញបន្លែមានទឹកប្រាក់ចំនួន៥៧,៧លានដុល្លារ។
នៅក្នុងត្រីមាសទីមួយនេះដែរ ប្រទេសអ៊ូសបេគីស្ថានបាននាំចេញទំពាំងបាយជូរស្ងួត ក្នុងតម្លៃ៣៦លានដុល្លារ ស្ពៃក្តោបក្នុងតម្លៃ២៩,១លានដុល្លារ និងការ៉ុតក្នុងតម្លៃ៤,៩លានដុល្លារ។ ផលិតផលកសិកម្មប្រភេទផ្សេងទៀត មានតម្លៃ១៣២,៤លានដុល្លារ។
ប្រទេសអ៊ូសបេគីស្ថាន បាននាំចេញទំនិញមានតម្លៃជាទឹកប្រាក់ចំនួន១៨ពាន់លានដុល្លារ ក្នុងអត្រាកំណើនប្រចាំឆ្នាំ២,៧ភាគរយ។ ការនាំចេញមានទឹកប្រាក់ចំនួន៥,៨ពាន់លានដុល្លារ ខណៈការនាំចូលមានទឹកប្រាក់ចំនួន១២,២ពាន់លានដុល្លារ។ ប្រទេសចិន គឺជាដៃគូពាណិជ្ជកម្មដ៏សំខាន់របស់ប្រទេសអ៊ូសបេគីស្ថាន ដោយមានតម្លៃជាទឹកប្រាក់ចំនួន៤,៦ពាន់លានដុល្លារ បន្ទាប់មក គឺប្រទេសរុស្ស៊ី និងប្រទេសកាហ្សាក់ស្ថាន ដោយមានតម្លៃជាទឹកប្រាក់សរុបចំនួន៤,៥ពាន់លានដុល្លារ។
ប្រទេសអ៊ូសបេគីស្ថាន មានបំណងបង្កើនការនាំចេញផលិតផលកសិកម្ម ឱ្យឡើងដល់ទំហំទឹកប្រាក់ចំនួន៣,៥ពាន់លានដុល្លារ ក្នុងឆ្នាំ២០២៦៕ (ផាន់ អាណា)
