សេអ៊ូល៖ ក្រសួងកសិកម្ម ស្បៀងអាហារ និងកិច្ចការជនបទ កូរ៉េខាងត្បូង បាននិយាយកាលពីថ្ងៃទី៧ ខែឧសភា ឆ្នាំ២០២៦ថា ប្រទេសកូរ៉េខាងត្បូង ប្រមូលពលករចំណាកស្រុកឱ្យបានចំនួន១០៤ ០០០នាក់ ដែលជាកំណត់ត្រាខ្ពស់បំផុត ឱ្យចូលរួមក្នុងវិស័យកសិកម្ម នៅឆមាសទីមួយ នៃឆ្នាំ២០២៦នេះ ដោយគូសបញ្ជាក់ពីការពឹងផ្អែកកាន់តែខ្លាំងឡើងលើកម្លាំងពលកម្មមកពីបរទេស។
ក្នុងនេះ មានពលករចំនួន៩៤ ០០០នាក់ នឹងក្លាយជាអ្នកធ្វើតាមរដូវកាលកាន់ទិដ្ឋាការ E-8 ដែលមានសុពលភាពរហូតដល់ប្រាំបីខែ។ ក្រៅពីនេះ ត្រូវបានបម្រុងទុកសម្រាប់ពលករកាន់ទិដ្ឋាការ E-9 ដែលអាចស្នាក់នៅបានរយៈពេលរហូតបីឆ្នាំ ព្រមទាំងអាចស្វែងរកឱកាសនៅក្នុងវិស័យឧស្សាហកម្មផងដែរ ដូចជាផ្នែកចិញ្ចឹមសត្វជាដើម។
នៅក្នុងឆ្នាំ២០២៦នេះ គ្រាន់តែចំនួនអ្នកធ្វើការតាមរដូវកាលបានកើនឡើង៥៣ភាគរយ ពីចំនួន៦១ ២៤៨នាក់ ក្នុងឆមាសទី១ កាលពីឆ្នាំ២០២៥។
យោងតាមតួលេខរបស់ក្រសួងកសិកម្ម ស្បៀងអាហារ និងកិច្ចការជនបទ កូរ៉េខាងត្បូង បានឱ្យដឹងថា ចំនួនពលករចំណាកស្រុកក្នុងវិស័យកសិកម្មមានចំនួន២០ ៧៣៨នាក់ ក្នុងឆ្នាំ២០២០ ប៉ុន្តែបានកើនឡើងយ៉ាងឆាប់រហ័សដល់៨៥ ២៩២នាក់ ក្នុងឆ្នាំ២០២៤ និងកើនដល់១៣០ ២៥៩នាក់ ក្នុងឆ្នាំ២០២៥ ដែលកើនឡើងជាងប្រាំមួយដង។
តាមរយៈតួលេខសម្រាប់ឆមាសទីមួយនៃឆ្នាំនេះលើសពី១០០ ០០០នាក់ហើយ ចំនួនសរុបប្រចាំឆ្នាំត្រូវបានគេរំពឹងថា នឹងឈានដល់ ១៤០ ០០០នាក់នៅឆ្នាំ២០២៦នេះ ដែលជាកំណត់ត្រាមួយទៀត។
ការកើនឡើងយ៉ាងខ្លាំងនេះ គឺទាក់ទងទៅនឹងកិច្ចខិតខំប្រឹងប្រែងរបស់រដ្ឋាភិបាល ដើម្បីដោះស្រាយបញ្ហាខ្វះកម្លាំងពលកម្មនៅតាមតំបន់ជនបទ។
នៅប្រទេសកូរ៉េ បើគិតពីខែមេសា ដល់ខែមិថុនា និងខែកញ្ញា ដល់ខែតុលា គឺជារដូវដាំដុះច្រើនបំផុត ដែលក្នុងនោះតម្រូវការកម្លាំងពលកម្មកើនឡើងយ៉ាងខ្លាំងសម្រាប់វិស័យកសិកម្ម។ យោងតាមរដ្ឋាភិបាល ក្នុងមួយឆ្នាំៗ កម្លាំងពលកម្ម គឺស្មើប្រហែលនឹង៦២ភាគរយនៃកម្លាំងពលកម្មកសិកម្មទាំងមូលរបស់ប្រទេសកូរ៉េខាងត្បូង។
នៅពេលការផ្គត់ផ្គង់កម្លាំងពលកម្មនៅតាមតំបន់ជនបទកាន់តែតឹងតែង រដ្ឋាភិបាលបានទប់ទល់បញ្ហាខ្វះកម្លាំងពលកម្មតាមរយៈគោលនយោបាយគាំទ្រ។ ចាប់ផ្តើមនៅឆ្នាំ២០២៦នេះ ការងារត្រូវបានអនុវត្តជាផែនការមូលដ្ឋានចម្បង សម្រាប់គាំទ្រការងារផ្នែកកសិកម្ម សម្រាប់ឆ្នាំ២០២៦-៣០ ដើម្បីផ្តល់ការគាំទ្រជាប្រព័ន្ធបន្ថែមទៀត នៅក្នុងតំបន់ ដូចជាការបែងចែក និងការគ្រប់គ្រងពលករចំណាកស្រុក។
រដ្ឋមន្ត្រីក្រសួងកសិកម្ម ស្បៀងអាហារ និងកិច្ចការជនបទ កូរ៉េខាងត្បូង លោកស្រី សុង មួរីយុង (Song Mi-ryung) កាលពីថ្ងៃទី៨ ខែឧសភា ឆ្នាំ២០២៦ បានចុះទៅពិនិត្យមើលទីតាំងកសិកម្មមួយកន្លែង ហើយបានពិនិត្យមើលលក្ខខណ្ឌការងារ និងបរិយាកាសរស់នៅរបស់ពលករចំណាកស្រុក។
លោកស្រីរដ្ឋមន្ត្រី បានមានប្រសាសន៍ថា លោកស្រីនឹងខិតខំពង្រឹងការប្រាស្រ័យទាក់ទងជាមួយកសិដ្ឋានក្នុងស្រុក ដើម្បីការពារការខ្វះខាតកម្លាំងពលកម្មនៅតំបន់ជនបទ ក្នុងរដូវធ្វើកសិកម្មប្រចាំឆ្នាំ និងបង្កើតកិច្ចសហការយ៉ាងជិតស្និទ្ធជាមួយភ្នាក់ងារពាក់ព័ន្ធនានា។
រដ្ឋាភិបាលកូរ៉េខាងត្បូង បានដាក់ចេញនូវសេវាសាធារណៈថ្មីៗ ដើម្បីគាំទ្រដល់ពលករចំណាកស្រុក រាប់ចាប់ពីនីតិវិធីអន្តោប្រវេសន៍ រហូតដល់ជីវភាពប្រចាំថ្ងៃ។ នៅក្នុងឆ្នាំ២០២៦នេះ ក្រសួងកសិកម្ម បានបង្កើតការិយាល័យពលករតាមរដូវកាល នៅការិយាល័យក្នុងតំបន់របស់សេវអន្តោប្រវេសន៍ ដើម្បីជួយសម្រួល និងពន្លឿនផ្នែកសេវាកម្មរដ្ឋបាលសម្រាប់ពលករតាមរដូវកាល។
សម្រាប់អ្នកដែលមិនអាចឆ្លៀតពេលទៅការិយាល័យក្នុងតំបន់ អាជ្ញាធរក៏បានដាក់ឱ្យដំណើរការសេវាកម្មចុះឈ្មោះស្នាមម្រាមដៃចល័ត ដូច្នេះពួកគេអាចចុះឈ្មោះដោយខ្លួនឯងកាន់តែងាយស្រួលទៅក្នុងមូលដ្ឋានទិន្នន័យរបស់រដ្ឋាភិបាល។
នៅឆ្នាំ២០២៦នេះ ការឧបត្ថម្ភធនប្រចាំថ្ងៃសម្រាប់កម្មករ ដែលគ្របដណ្តប់លើការដឹកជញ្ជូនសាធារណៈ និងថ្លៃស្នាក់នៅ បានកើនឡើង១០ ០០០វ៉ុន ឬស្មើនឹង៦,៨១ដុល្លារ។ លើសពីនេះ វេទិកាស្វែងរកការងារតាមអនឡាញ ក៏បានចាប់ផ្តើមដំណើរការដែរ រួមទាំងឱកាសការងារផ្នែកវិស័យកសិកម្ម។
សម្រាប់ទីក្រុង និងស្រុកចំនួន៣៥ ដែលជាតំបន់ផលិតកសិស្បៀងអាហារពេញនិយមបំផុតទាំង១០របស់ប្រទេស កូរ៉េខាងត្បូ រួមមាន ផ្លែប៉ោម ផ្លែប៉ែស ទំពាំងបាយជូរ ផ្លែសារី ខ្ទឹមស ម្ទេស ខ្ទឹមបារាំង សាឡាត់ ឆៃថាវ និងដំឡូងបារាំង ក្រសួងកំពុងដំណើរការក្រុមការងារចម្រុះ ចាប់ពីខែមេសា ដល់ខែមិថុនា ចំណែកក្រសួងយុត្តិធម៌ និងរដ្ឋាភិបាលមូលដ្ឋាន ត្រូវតាមដានការផ្គត់ផ្គង់ និងតម្រូវការកម្លាំងកម្មករតាមរដូវកាលក្នុងពេលវេលាជាក់ស្តែង៕ (ផាន់ អាណា)
