ហាណូយ៖ អាជ្ញាធរវៀតណាម បានបង្ក្រាបបណ្តាញផលិត និងលក់ចែកចាយប្រេងឆាក្លែងក្លាយដ៏ធំមួយ ចំណែកអាជ្ញាធរសុវត្ថិភាពចំណីអាហារវៀតណាម កាលពីថ្ងៃទី១៥ ខែតុលា ឆ្នាំ២០២៥នេះ បានចេញសេចក្តី ព្រមាននៅទូទាំងប្រទេសវៀតណាម ឱ្យប្រុងប្រយ័ត្នដល់សុខភាព។
នគរបាលវៀតណាម នៅក្នុងខេត្ត ហុង យ៉េន (Hung Yen) ស្ថិតនៅភាគខាងត្បូងក្រុងហាណូយ បានបំបែកសំណុំរឿងព្រហ្មទណ្ឌបង្ក្រាបរោងចក្រកែច្នៃម្ហូបអាហាររបស់ជនជាតិវៀតណាមមួយ ឈ្មោះ ជីអេហ្វ វៀតណាម ហ្វូដ (GF Vietnam Food) ដែលបានផលិតប្រេងឆាក្លែងក្លាយ និងលកចែកចាយនៅទូទាំងប្រទេសវៀតណាម។
ក្រុមនគរបាលស៊ើបអង្កេត បាននិយាយថា ប្រេងឆាផលិតដោយរោងចក្រ ជីអេហ្វ វៀតណាម ហ្វូដ ពិតជាមិនបានបំពេញតាមស្តង់ដារសុវត្ថិភាពចំណីអាហារ ហើយបានផលិតចែកចាយផលិតផលចំណីអាហារក្លែងក្លាយ ដែលបង្កគ្រោះថ្នាក់ធ្ងន់ធ្ងរដល់សុខភាពអ្នកបរិភោគ។
ប្រេងឆាក្លែងក្លាយរបស់ក្រុមហ៊ុននេះ ត្រូវបានលក់ចែកចាយជាបណ្តាញទៅដល់បណ្តាខេត្ត និងទីក្រុងនានា នៅទូទាំងប្រទេសវៀតណាម ក្រោមម៉ាកយីហោជាច្រើន រួមមាន ឈីកា តាមីនហ្គោល ហ្គោលម៉ាក តុត និងមេហ្គាហ្វូដ (Chica, Tamin Gold, Goldmax, Tot, Megafood)។
ពេលនេះអាជ្ញាធរវៀតណាម បានអំពាវនាវដល់សាធារណជនកុំទិញ ឬប្រើប្រាស់ផលិតផល ដែលមានម៉ាកយីហោខាងលើនេះ ហើយរាយការណ៍ដល់មន្ត្រីមូលដ្ឋានអំពីទំនិញខុសច្បាប់ទាំងនេះ ព្រមទាំងបញ្ជាឱ្យត្រួតពិនិត្យកាន់តែតឹងរ៉ឹង ដើម្បីតាមដានស្តុកនៅសេសសល់ និងទប់ស្កាត់មិនឱ្យទៅដល់អ្នកប្រើប្រាស់។
ក្នុងរយៈពេលប៉ុន្មានខែថ្មីៗនេះ នគរបាលវៀតណាម បានរកឃើញករណីក្លែងបន្លំផលិតផលចំណីអាហារក្នុងទ្រង់ទ្រាយធំជាច្រើនករណី រួមទាំងការរឹបអូសប្រេងឆាក្លែងក្លាយចំនួន៧១ ០០០លីត្រ និងប៊ីចេងក្លែងក្លាយចំនួន៤០តោន នៅក្នុងខេត្ត ហ្វឺថូ (Phu Tho) ភាគខាងលិចទីក្រុងហាណូយ។
ស្របគ្នានេះដែរ អាជ្ញាធរវៀតណាម បានលាតត្រដាងរឿងអាស្រូវពុករលួយពាក់ពួន្ធនឹងសុវត្ថិភាពចំណីអាហារដ៏ធំមួយ ដែលប្រេងចំណីសត្វរាប់ម៉ឺនតោន ត្រូវបានលក់ដោយសម្ងាត់ជាប្រេងចម្អិនអាហារទៅកាន់ភោជនីយដ្ឋាន រោងចក្រ និងអ្នកផលិតអាហារនៅទូទាំងប្រទេសវៀតណាម។
នាយកដ្ឋានសុវត្ថិភាពចំណីអាហារវៀតណាម បានចេញការព្រមានទូទាំងប្រទេស បានបង្ក្រាបប្រតិបត្តិការប្រេងក្លែងក្លាយដ៏ធំមួយរបស់ក្រុមហ៊ុនផលិត និងនាំចេញផលិតផលចំណីអាហារ មានឈ្មោះ ញ៉ាតមិញ (Nhat Minh) ដែលបាននាំចូលប្រេងថោកៗសម្រាប់ចំណីសត្វ ហើយវេចខ្ចប់វាឡើងវិញ ដាក់ម៉ាកយីហោ អូហ្វូដ (OFOOD) និងលក់ចែកចាយជាប្រេងឆាសម្រាប់មនុស្ស។
មន្ត្រីសុវត្ថិភាពចំណីអាហារវៀតណាម បាននិយាយបញ្ជាក់ថា «ប្រេងឆាក្លែងក្លាយទាំងនេះបង្កគ្រោះថ្នាក់ខ្លាំងណាស់ដល់សុខភាពសាធារណៈ»។
ប្រេងសម្រាប់ផលិតចំណីសត្វភាគច្រើនតែឆៅ មិនទាន់ចម្រាញ់ ហើយអាចមានជាតិពុលខ្ពស់ រួមទាំងសារធាតុមិនស្អាត និងសារធាតុគីមី មិនមានសុវត្ថិភាពសម្រាប់មនុស្ស។ ការប្រើប្រាស់រយៈពេលយូរអាចបណ្តាលឱ្យពុល ខូចសរីរាង្គ បង្កើតជាតិពុល និងបង្កើនហានិភ័យនៃជំងឺរ៉ាំរ៉ៃ។
អាជ្ញាធរវៀតណាមបានជំរុញឱ្យគ្រប់ផ្ទះបាយ ភោជនីយដ្ឋាន អ្នកផ្គត់ផ្គង់ចំណីអាហារ និងរោងចក្រទាំងអស់ ត្រូវផ្ទៀងផ្ទាត់ឯកសារអ្នកផ្គត់ផ្គង់យ៉ាងតឹងរ៉ឹង ដោយបន្ថែមថា ធាតុផ្សំណាមួយ ដែលប្រើខុសក្បួន បើទោះបីជាមានឯកសារត្រឹមត្រូវក៏ដោយ នៅតែខុសច្បាប់ និងមានគ្រោះថ្នាក់ដល់សុខភាព។
កាលពីខែមេសា ឆ្នាំ២០២៥នេះ នគរបាលវៀតណាម បានរឹបអូសបានប្រេងឆាក្លែងក្លាយចំនួន៧១ ០០០លីត្រ ប៊ីចេងចំនួន៤០តោន ម្សៅគ្រឿងទេសក្លែងក្លាយ២២តោន និងអំបិលគ្រឿងទេសក្លែងក្លាយចំនួនប្រាំបួនតោន។ ចំណែកនៅទីក្រុងហាណូយវិញ ក្រុមមន្ត្រីបានរឹបអូសសាច់បង្កក សាច់ក្រក គ្រឿងផ្សំ និងសណ្តែកបណ្តុះ មានផ្ទុកសារធាតុគីមីលើសកម្រិត។
នៅក្នុងខែតុលា ឆ្នាំ២០២៥នេះដែរ នគរបាលវៀតណាម បានរឹបអូសសាច់ក្របី និងសាច់គោក្លែងក្លាយចំនួនជាង៦៥តោន ព្រមទាំងរឹបអូសសម្ភារៈប្រើសម្រាប់ផលិតសាច់គោក្លែងក្លាយ រួមទាំងសារធាតុគីមីចំនួន១៧តោន ដែលគេជឿថា ជាសារធាតុខ្លាញ់សម្រាប់ផលិតសាច់គោជប៉ុនក្លែងក្លាយ។
រហូតមកដល់ពេលនេះ នគរបាលវៀតណាម កំពុងតែរង់ចាំរបាយការណ៍អំពីជាតិពុលរបស់សារធាតុគីមី ដើម្បីកំណត់ថា តើសាច់គោក្លែងក្លាយនេះមានគ្រោះថ្នាក់ដល់សុខភាពមនុស្សកម្រិតណា។
សូមរំឭកថា កាលពីដើមខែឧសភា ឆ្នាំ២០២៥នេះ នគរបាលវៀតណាម បានចាប់ខ្លួនអតីតប្រធានរដ្ឋបាលសុវត្ថិភាពចំណីអាហារវៀតណាម និងមន្ត្រីជំនាញផ្នែកសុវត្ថិភាពចំណីអាហារបួននាក់ផ្សេងទៀត ពីបទស៊ីសំណូក ក្នុងរឿងអាស្រូវផលិតអាហារបំប៉នក្លែងក្លាយដ៏ធំមួយ បន្ទាប់ពីភ្នាក់ងារសម្ងាត់មកពីនាយកដ្ឋានប៉ូលិសប្រឆាំងអំពើពុករលួយ នៃក្រសួងសន្តិសុខសាធារណៈរបស់ប្រទេសវៀតណាម បានឆ្មក់ចូលឆែកឆេបានរកឃើញថ្នាំបំប៉នក្លែងក្លាយចំនួន១០០តោន៕
