ប៉ារីស៖ ផ្សារទំនើបដ៏ល្បីឈ្មោះមួយកន្លែងនៅក្នុងប្រទេសបារាំង បានទទួលរងការផាកពិន័យពីអគ្គនាយកដ្ឋានការពារការប្រកួតប្រជែង កិច្ចការអ្នកប្រើប្រាស់ និងការត្រួតពិនិត្យការក្លែងបន្លំ សម្រាប់ការដាក់តាំងបង្ហាញកសិផលនាំចូលពីក្រៅប្រទេស ដោយកុហក់អ្នកទិញថា ជាកសិផលផលិតក្នុងស្រុកបារាំង។
ការស៊ើបអង្កេត ដែលធ្វើឡើងដោយអង្គភាពត្រួតពិនិត្យការក្លែងបន្លំ បានបង្ហាញថា បន្លែស្រស់ និងផ្សិតស្ងួត ចំនួន១៩មុខ ត្រូវបានបង្ហាញនៅក្នងផ្សារទំនើបរបស់បារាំងឈ្មោះ ការ៉េហ្វួរ (Carrefour) បានសរសេរថា «ផលិតនៅក្នុងប្រទេសបារាំង» ដែលតាមពិតផលិតផលទាំងនោះសុទ្ធតែនាំចូលពីបរទេស។ ការអនុវត្តនេះត្រូវបានពិពណ៌នាថាជា “ការបំភាន់អំពីប្រភពដើម” ហើយត្រូវបានចាត់ទុកថា ជាបទល្មើសធ្វើពាណិជ្ជកម្មដោយបំភាន់ភ្នែក បំពានលើច្បាប់ការពារអ្នកប្រើប្រាស់បារាំង ដែលត្រូវផ្តន្ទាទោសដាក់ពន្ធនាគាររហូតដល់រយៈពេលពីរឆ្នាំ និងពិន័យជាប្រាក់ចំនួន៣០០ ០០០អឺរ៉ូ ឬស្មើនឹង៣៥២ ០៣៥ដុល្លារ។
យោងតាលលទ្ធផលស៊ើបអង្កេត បានបង្ហាញថា ផ្សារទំនើប និងអ្នកគ្រប់គ្រងរបស់ខ្លួន បានបំភាន់ភ្នែកអ្នកប្រើប្រាស់អំពីប្រភពដើមនៃបន្លែ និងផ្លែឈើមួយចំនួន ដោយដាក់តាំងបង្ហាញក្លែងក្លាយថា កសិផលផលិតនៅក្នុងប្រទេសបារាំង។
ការជំនួសប្រភពដើមរបស់បារាំងសម្រាប់បន្លែ និងផ្សិតស្ងួត ដែលនាំចូលទាំង១៩មុខនេះ ដើម្បីបំប៉ោងតម្លៃនៃផលិតផលនៅក្នុងភ្នែកអ្នកប្រើប្រាស់ ដោយធ្វើឱ្យពួកគេយល់ច្រឡំថា ជាប្រភពដើមពិតប្រាកដ ដែលជាលក្ខណៈវិនិច្ឆ័យសំខាន់សម្រាប់ការទិញក្នុងចំណោមអ្នកប្រើប្រាស់នៅក្នុងប្រទេសបារាំង។
រដ្ឋអាជ្ញាសាធារណៈនៃតុលាការយុត្តិធម៌ នៅក្នុងប្រទេសបារាំង បានសុំឱ្យផាកពិន័យផ្សារទំនើបនេះ គិតជាទឹកប្រាក់ចំនួន២១ ០០០អឺរ៉ូ ឬស្មើនឹង២៤ ៦៤២ដុល្លារ។
យោងតាមច្បាប់ការពារអ្នកប្រើប្រាស់របស់បារាំង ក្រៅពីការពិន័យជាអតិបរមា ជនល្មើសអាចប្រឈមមុខការជាប់ពន្ធនាគាររហូតដល់រយៈពេលពីរឆ្នាំ និងពិន័យជាប្រាក់៣០០ ០០០អឺរ៉ូ សម្រាប់បុគ្គលទទួលខុសត្រូវ ឬត្រូវពិន័យរហូតដល់១០ភាគរយនៃប្រាក់ចំណូលរបស់ហាង។
ករណីក្លែងបន្លំប្រភពផលិតផលបែបនេះ មិនមែនទើបតែកើតមានទេនៅក្នុងបារាំង។ កាលពីឆ្នាំ២០២៤ រដ្ឋមន្ត្រីក្រសួងហិរញ្ញវត្ថុបារាំង ធ្លាប់បានសន្យាថា នឹងមានវិធានការត្រួតពិនិត្យ និងគ្រប់គ្រងឱ្យបាន១០ ០០០ដង លើការអនុវត្តច្បាប់នៅតាមបណ្តាផ្សារទំនើប នៅក្នុងប្រទេសបារាំង ដើម្បីរឹតបន្តឹងការអនុវត្តច្បាប់ការពារអ្នកប្រើប្រាស់។
នៅក្នុងចំណោម៣៤ភាគរយបទល្មើសករណីផ្សារទំនើបត្រូវបានតុលាការរកឃើញថា បំពានលើបទប្បញ្ញត្តិនៃច្បាប់ការពារការប្រកួតប្រជែង កិច្ចការអ្នកប្រើប្រាស់ និងការត្រួតពិនិត្យការក្លែងបន្លំ មន្ត្រីអនុវត្តច្បាប់បារាំង បានចេញលិខិតព្រមានជិត២ ០០០លើក និងបានរាយការណ៍ពីផ្សារទំនើបជាង៤០០០ ប្រាប់ទៅតុលាការតុលាការបារាំង។
ករណីក្លែងបន្លំប្រភពទំនិញនាពេលថ្មីៗនេះ ត្រូវបានតុលាការរកឃើញអ្នកផលិតស្រាម្នាក់ ត្រូវជាប់គុកពីបទដាក់ឈ្មោះស្រាអេស្បាញថាជា «ស្រាសំប៉ាញ» ហើយដបមួយចំនួនត្រូវបានលក់នៅក្នុងផ្សារទំនើបធំៗរបស់បារាំង៕
