ដោយ៖ឡុង សារេត
រាជធានីភ្នំពេញ៖ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៦ ខែកញ្ញា ឆ្នាំ២០២៥នេះ បានរៀបចំពិធីប្រគល់សញ្ញាបត្រដល់និស្សិតមកពីសាកលវិទ្យាល័យភូមិន្ទកសិកម្ម, វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម សរុបប្រមាណ១ ៤៨៧នាក់។
តាមរយៈគ្រឹះស្ថានឧត្តមសិក្សាទាំងបីនេះ ក្នុងរយៈពេល៤០ឆ្នាំមកនេះបានបង្កើតនូវធនធានមនុស្សក្នុងវិស័យកសិកម្មជាង៣ម៉ឺននាក់។
ពិធីនេះមានការអញ្ចើញជាអធិបតីភាពដ៏ខ្ពង់ខ្ពស់ ដោយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួង អប់រំ យុវជន និងកីឡា និងជាតំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រយៈពេល៤០ឆ្នាំកន្លងមកនេះ គ្រឹះស្ថានឧត្តមសិក្សាកសិកម្មទាំងបីខាងលើបានរួមចំណែកកសាងធនធានមនុស្សសរុបចំនួ៣១ ៨៤១នាក់ នារីមាន៨ ៤២២ នាក់ ឬស្មើប្រមាណ២៤ភាគរយ ក្នុងនោះមកពីសាកលវិទ្យាល័យភូមិន្ទកសិកម្មចំនួន១៤ ៩៨១នាក់, វិទ្យាស្ថានជាតិកសិកម្មព្រែកលៀបចំនួន១១ ៦៥១នាក់ និង វិទ្យាស្ថានជាតិកសិកម្មកំពង់ចាមចំនួន៥ ២០៩នាក់។
ជាមួយនឹងអត្រានិស្សិតបញ្ចប់ការសិក្សាជាមធ្យមចំនួនប្រមាណ៨០០នាក់ ក្នុងមួយឆ្នាំ ខណៈគ្រឹះស្ថានទាំងបីកំពុងបន្តបណ្តុះបណ្តាលនិស្សិតចំនួន៥ ៨៦២នាក់ ក្នុងឆ្នាំសិក្សា២០២៤- ២០២៥នេះ។
បើតាមឯកឧត្តមរដ្ឋមន្ត្រី, យោងតាមការស្ទង់មតិកន្លងមកបានឱ្យដឹងថា និស្សិតបានបញ្ចប់ការសិក្សាប្រមាណ៩៨,៨ភាគរយទទួលបានការងារធ្វើ ក្នុងនោះភាគច្រើនលើសលប់បម្រើការក្នុងវិស័យឯកជននិង៩៨៣នាក់បានប្រឡងជាប់ជាមន្រ្តីកសិកម្មឃុំ ។
ក្នុងនោះ៧៦៣នាក់ ជាអតីតនិស្សិតសាកលវិទ្យាល័យភូមិន្ទកសិកម្ម, ១៤០នាក់ ជាអតីតនិស្សិត វិទ្យាស្ថានជាតិកសិកម្មព្រែកលៀប និង៨០នាក់ទៀត ជាអតីតនិស្សិតវិទ្យាស្ថានជាតិកសិកម្មកំពង់ចាម ចំណែកមួយចំនួនទៀតបានបង្កើតអាជីវកម្មដោយខ្លួនឯង។
ឯកឧត្តមរដ្ឋមន្ត្រីបានមានប្រសាសន៍ថា សមិទ្ធផលជាច្រើនដែលក្រសួង និងគ្រឹះស្ថានឧត្តមសិក្សាកសិកម្មទាំងបីសម្រេចបាននាពេលកន្លងមក ក្នុងការរួមចំណែកកសាងធនធានមនុស្សក្នុងវិស័យកសិកម្ម ពិតជាមិនអាចកាច់ផ្តាច់ចេញបានពីការយកចិត្តទុកដាក់ និងការជួយឧបត្ថម្ភគាំទ្រយ៉ាងសកម្មរបស់រាជរដ្ឋាភិបាល ទាំងក្នុងអាណត្តិកន្លងទៅ ក្រោមការដឹកនាំរបស់សម្តេចតេជោ ហ៊ុន សែន និងក្នុងអាណត្តិថ្មីនេះ ក្រោមការដឹកនាំរបស់សម្តេចធិបតី ហ៊ុន ម៉ាណែត។
នៅក្នុងឱកាសនេះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា រាជរដ្ឋាភិបាលកម្ពុជាតែងតែចាត់ទុកវិស័យកសិកម្ម ជាតួអង្គសម្រាប់ធានាសន្តិសុខស្បៀង លើកកម្ពស់ជីវភាពប្រជាពលរដ្ឋ និងរួមចំណែកដល់ការលើកស្ទួយ កំណើនសេដ្ឋកិច្ចជាតិ។
សម្តេចតេជោ បានដឹកនាំឱ្យមានកំណែទម្រង់ជាបន្តបន្ទាប់ក្នុងវិស័យកសិកម្ម ដែលជាលទ្ធផលបានប្រែក្លាយប្រទេសកម្ពុជាពីប្រទេសខ្វះស្បៀង និងពឹងផ្អែកលើជំនួយស្បៀងពីបរទេស ទៅជាប្រទេសកសិកម្មរីកចម្រើន មានសន្តិសុខស្បៀងពេញលេញ មានផលិតផលកសិកម្មសម្បូរបែប និងនាំចេញកសិផលរាប់លានតោនទៅកាន់ទីផ្សារបរទេស ដែលមិនត្រឹមតែនាំមកវិញនូវរូបិយបណ្ណបរទេស ដើម្បីជួយទ្រទ្រង់កំណើនសេដ្ឋកិច្ចជាតិប៉ុណ្ណោះទេ ប៉ុន្តែថែមទាំងរួមចំណែកធានាសន្តិស្បៀងក្នុងតំបន់ និងលើពិភពលោក ថែមទៀតផង។
ឯកឧត្តមបណ្ឌិតសភាចារ្យ មានប្រសាសន៍សង្កត់ធ្ងន់ថា ក្នុងនីតិកាលទី៧ នៃរដ្ឋសភានេះ ក្រោមការដឹកនាំដ៏ឈ្លាសវៃ ស្វាហាប់ និងប្រកបដោយចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត រាជរដ្ឋាភិបាលកម្ពុជា នៅតែបន្តផ្តល់អាទិភាពដល់វិស័យកសិកម្ម ជាពិសេសការធានាសន្តិសុខស្បៀងគ្រប់កាលៈទេសៈ។
ទោះបីជា សេដ្ឋកិច្ចកម្ពុជាបានឈានដល់កម្រិត និងដំណាក់កាលថ្មីនៃការអភិវឌ្ឍ តាមរយៈការស្ទុះឡើងក្នុងវិស័យនានា ដូចជាឧស្សាហកម្មវាយនភណ្ឌ ទេសចរណ៍ សេវាកម្ម ហិរញ្ញវត្ថុ សំណង់ក៏ដោយ ក៏រាជរដ្ឋាភិបាលកម្ពុជានៅតែបន្តចាត់ទុកសន្តិសុខស្បៀង គឺជាមូលដ្ឋានដ៏សំខាន់ក្នុងការធានាស្ថិរភាពសេដ្ឋកិច្ច នយោបាយ និងសង្គមផងដែរ។
ក្នុងន័យនេះ រាជរដ្ឋាភិបាលកម្ពុជាបានដាក់ចេញនូវកម្មវិធីគោលនយោបាយអាទិភាពទាំងប្រាំបី ដែលក្នុងនោះ កម្មវិធីទី៥ និងទី៦ ផ្តោតលើការបង្កើនល្បឿននៃការអភិវឌ្ឍវិស័យកសិកម្ម សំដៅបន្តធានា សន្តិសុខស្បៀង លើកកម្ពស់ជីវភាពប្រជាពលរដ្ឋ និងរួមចំណែកទ្រទ្រង់កំណើនសេដ្ឋកិច្ចជាតិ ជាពិសេស ក្នុងបរិបទថ្មីនេះដែលការវិវត្តយ៉ាងឆាប់រហ័សនៃសេដ្ឋកិច្ច ពាណិជ្ជកម្ម និងភូមិសាស្ត្រ នយោបាយក្នុងតំបន់ និងពិភពលោក រួមទាំងសង្គ្រាមផងដែរ បាននិងកំពុងជះឥទ្ធិពលកាន់តែខ្លាំង និងពិបាកវាយតម្លៃជាមុនបានដល់កត្តាទីផ្សារ និងតម្លៃនៃផលិតផល រួមទាំងផលិតផលកសិកម្មកម្ពុជាផងដែរ៕
