ភ្នំពេញ៖ ក្រុមហ៊ុនអេមរុរ៉ាយស៍បានចុះហត្ថលេខាលើផលិតកម្មកសិកម្មតាមកិច្ចសន្យា ស្តីពីការផលិត និងផ្គត់ផ្គង់ស្រូវស្តង់ដារផលិតកម្មស្រូវប្រកបដោយនិរន្តរភាពជាមួយសហភាពសហគមន៍កសិកម្មបាត់ដំបង សហគមន៍កសិកម្មទំនប់ម្កាក់អភិវឌ្ឍន៍ថ្មី និងសហគមន៍កសិកម្មព្រៃនៃក្តីសង្ឃឹម ក្នុងបរិមាណចន្លោះពី១៥,០០០ តោន ទៅ២០,០០០តោន។
ពិធីចុះហត្ថលេខានេះ ត្រូវបានរៀបចំឡើងក្រោមការចូលរួមជាវត្តមានកិត្តិយពីសំណាក់លោកឧកញ៉ា សុង សារ៉ន អគ្គនាយកក្រុមហ៊ុនអេមរុរ៉ាយស៍ តំណាងមន្ទីរពាណិជ្ជកម្មបាត់ដំបង តំណាងក្រសួងធនធានទឹក និងឧតុនិយម តំណាងក្រុមប្រឹក្សាស្រុកសង្កែ ភូមិឃុំ តំណាងគម្រោងដៃគូ ដែលមានដូចជា៖ គម្រោងអេមរុរ៉ាយស៍ គម្រោង Wat4Cam តំណាងសហភាពសហគមន៍កសិកម្មចំនួន១៤ នៃខេត្ដបាត់ដំបង ពោធិសាត់ សៀមរាប និងកំពង់ធំ សរុបប្រមាណ៥៥រូប។
នៅក្នុងឆ្នាំ២០២៥នេះ ក្រុមហ៊ុនអេមរុរ៉ាយស៍ និងសហភាពសហគមន៍កសិកម្មបាត់ដំបង និងសហគមន៍កសិកម្ម នឹងនៅតែបន្ដបេសកម្មគាំទ្រកសិករឱ្យទទួលបានការគាំពារទីផ្សារ និងដាំដុះប្រកបដោយនិរន្ដភាព ដែលមានការទទួលខុសត្រូវដល់សង្គម និងបរិស្ថាន តាមរយៈយន្ដការផលិតកម្មកសិកម្មតាមកិច្ចសន្យា និងការដាំដុះតាមស្ដង់ដារ ផលិតកម្មកសិកម្មតាមកិច្ចសន្យា លើពូជស្រូវសែនក្រអូប ផ្ការំដួល និងស្រង៉ែក្រអូប ជាមួយកសិករសរុបប្រមាណ២៩៤នាក់ ផ្ទៃដីផលិតកម្ម២,០៦៤ ហិកតា និងផលរំពឹងទុក ចន្លោះពី១៥,០០០តោន ទៅ២០,០០០តោន។
គួរបញ្ជាក់ផងដែរថា ក្នុងឆ្នាំ២០២៤ ក្រុមហ៊ុនអេមរុរ៉ាយស៍បានសហការជាមួយសហភាពសហគមន៍កសិកម្មបាត់ដំបង ដែលមានសហគមន៍ចំនួន០៧ ក្នុងនោះ ប្រាំមួយសហគមន៍ស្ថិតនៅខេត្តបាត់ដំបង និងមួយសហគមន៍ស្ថិតនៅខេត្តសៀមរាប បានចុះកិច្ចសន្យា និងផ្គត់ផ្គង់ស្រូវស្តង់ដារស្រូវប្រកបដោយនិរន្តរភាពប្រមាណ ១០,០០០តោន ក្នុងទំហំទឹកប្រាក់ប្រមាណជាងបីលានដុល្លារ ដែលបានបង្កើតតម្លៃបន្ថែមតាមរយៈការផ្ដល់ប្រាក់លើកទឹកចិត្ដពីលើតម្លៃស្រូវនៅក្នុងទីផ្សារប្រមាណជា ១០ម៉ឺនដុល្លារ។
ស្របតាមគោលនយោបាយរបស់រាជរដ្ឋាភិបាល ក្រុមហ៊ុនអេមរុរ៉ាយ៍នឹងនៅតែបន្តសកម្មភាពគាំទ្រដល់កសិករខ្នាតតូចតាមរយៈផលិតកម្មកសិកម្មតាមកិច្ចសន្យា ហើយក្រុមហ៊ុនជឿជាក់ថា សកម្មភាពនេះនឹងបន្តជំរុញឱ្យមានកំណើនសេដ្ឋកិច្ចនៅក្នុងសហគមន៍ ការរក្សាបាននូវការប្រកួតប្រជែង ដែលនឹងជួយរក្សាតម្លៃស្រូវដល់កសិករព្រមទាំងថែរក្សាបាននូវសុខុមាលភាព និងសុវត្ថិភាព ដល់កសិករ គ្រួសារ សហគមន៍ និងបរិស្ថាន។
លើសពីនេះ កុមារ និងស្រ្ដីនៃកសិករក្នុងគម្រោងក៏ទទួលបានការគាំទ្រ លើការជំរុញឱ្យទទួលបានការសិក្សាអប់រំ និងសិទ្ធក្នុងការចូលរួមធ្វើសេចក្ដីសម្រេចចិត្តនានា និងផ្តល់ភាពជាគំរូដ៏ល្អមួយសម្រាប់ប្រជាកសិករផ្សេងទៀតផងដែរ៕ ដោយ ហៃ ស៊ីណា
