តូរ៉ុនតូ៖ យោងតាមស្ថិតិសន្ទស្សន៍តម្លៃអ្នកប្រើប្រាស់របស់ប្រទេសកាណាដា បានឱ្យដឹងថា តម្លៃអាហារ ដែលធ្លាប់តែមានតម្លៃសមរម្យទាបសម្រាប់ប្រជាជនកាណាដា បានឡើងតម្លៃជាបន្តបន្ទាប់រហូតដល់ជិត៥០ភាគរយនៃតម្លៃដើម ខណៈពេលតម្លៃអង្ករសម្រិតមួយកញ្ចប់ទម្ងន់ពីរគីឡូក្រាម បានឡើងថ្លៃពី៦,៤៦ដុល្លារ ក្នុងខែមិថុនា ឆ្នាំ២០២៤ ឥឡូវបានឡើងថ្លៃដល់៩,៦២ដុល្លារ ក្នុងខែមិថុនា ឆ្នាំ២០២៥ ដែលជាតម្លៃខ្ពស់បំផុតក្នុងរយៈពេលតែមួយឆ្នាំប៉ុណ្ណោះ។
សារព័ត៌មាន តូរ៉ុនតូ ស៊ីធីញូវស៍ (Toronto City News) របស់កាណាដា បានផ្សាយថា ពេញមួយឆ្នាំ គិតពីពាក់កណ្តាលឆ្នាំ២០២៤ ដល់ពាក់កណ្តាលឆ្នាំ២០២៥ តម្លៃអង្ករនៅតាមផ្សារមួយចំនួនក្នុងប្រទេសកាណាដា មានការប្រែប្រួលតម្លៃ ដោយផ្សារខ្លះឈានដល់កម្រិតតម្លៃកំពូល គឺ១០,២០ដុល្លារ សម្រាប់កញ្ចប់អង្ករទម្ងន់ពីរគីឡូក្រាម នៅក្នុងខែមីនា ឆ្នាំ២០២៥។
សាស្ត្រាចារ្យផ្នែកសេដ្ឋកិច្ច នៅមហាវិទ្យាល័យ ដាក្លាស (Douglas College) របស់កាណាដា បាននិយាយថា «គេដឹងថា អង្ករត្រូវបានប្រើប្រាស់ដោយប្រជាជន ដែលមានប្រាក់ចំណូលទាប ហើយអង្ករមានសារៈសំខាន់សម្រាប់ជីវិតពួកគេ ។ អង្ករឡើងថ្លៃ គឺជាឧបសគ្គមួយទៀតចំពោះលទ្ធភាពទិញ-លក់អង្ករ នៅក្នុងប្រទេសកាណាដា»។
លោកសាស្ត្រាចារ្យបានពន្យល់ថា ទីផ្សារអង្ករប៉ះពាល់ដល់ជនជាតិកាណាដាជាងពីរលាននាក់ ដែលភាគច្រើនជាជនជាតិចិន ជាជនជាតិដើមកំណើតអាស៊ីអាគ្នេយ៍ និងសហគមន៍ជនជាតិឥណ្ឌា ដែលពួកគេរស់នៅភាគខាងត្បូងប្រទេសកាណាដា មានព្រំប្រទល់ជាប់សហរដ្ឋអាមេរិក។
ប្រជាជនកាណាដា ដើមកំណើតហ្វីលីពីនម្នាក់ បាននិយាយថា «ខ្ញុំស្រឡាញ់អង្ករ ខ្ញុំកើតមកហូបបាយ ហើយខ្ញុំមិនអាចហូបរបស់អ្វីផ្សេងបានទេ។ អាហារចម្បងរបស់ ខ្ញុំគឺបាយ ដូច្នេះនៅពេលអ្នកសួរខ្ញុំថា តើខ្ញុំគិតយ៉ាងណាចំពោះការឡើងថ្លៃអង្ករបែបនេះ។ ខ្ញុំសូមប្រាប់ថា ជាការពិត ខ្ញុំមិនចូលចិត្តបាយពេកទេ ប៉ុន្តែបាយ គឺជាការពិតនៃជីវិតខ្ញុំ»។
សេដ្ឋវិទូម្នាក់បាននិយាយថា ការកើនឡើងនៃតម្រូវការអង្ករសម្រាប់ជនអន្តោប្រវេសន៍កាណាដា គឺជាហេតុផលមួយសម្រាប់ការឡើងតម្លៃអង្ករសម្រិត។
លោកសេដ្ឋវិទូ បាននិយាយថា «យើងដឹងថា ជាយូរណាស់មកហើយជនអន្តោប្រវេសន៍រស់នៅទីនេះ ក្នុងប្រទេសកាណាដា ភាគច្រើនជាអន្តោប្រវេសន៍មកពីទ្វីបអាស៊ី ដែលប្រជាជនភាគច្រើនបរិភោគបាយ។ ដូច្នេះ បាយ គឺជាអាហារដ៏សំខាន់នៅក្នុងពិភពលោក។ មានន័យថា ប្រសិនបើមនុស្សមកពីផ្នែកនៃពិភពលោក បរិភោគបាយ នោះគួរតែបង្កើនតម្រូវការអង្ករនៅក្នុងប្រទេសកាណាដា ឱ្យបានច្រើនជាងមុន»។
ប្រទេសកាណាដាពឹងផ្អែកទាំងស្រុងលើការនាំចូល និងជាទីផ្សារពិភពលោកសម្រាប់ផលិតផលអង្ករជាលក្ខណៈពាណិជ្ជកម្ម។ ប៉ុន្តែនៅពេលភាពជាដៃគូពិភពលោកបន្តផ្លាស់ប្តូរ ដោយសារពន្ធអាម៉េរិកឡើងច្រើនសន្ធឹកសន្ធាប់ពេក សម្ពាធលើតម្លៃអង្ករបានកើនឡើងដោយសារតែការពឹងផ្អែករបស់ប្រទេសកាណាដា លើការនាំចូលពីអាម៉េរិក។
សេដ្ឋវិទូកាណាដា បាននិយាយទៀតថា ទោះបីជាយ៉ាងណាក៏ដោយ ការយកពន្ធខ្ពស់របស់សហរដ្ឋអាម៉េរិកមកលើប្រទេសកាណាដា អាចជាឱកាសល្អមួយដើម្បីធ្វើទំនាក់ទំនងពាណិជ្ជកម្មជាមួយសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដើម្បីនាំចូលអង្ករមកពីបណ្តាប្រទេសទាំងនោះ។
លោកបាននិយាយថា «ការគំរាមកំហែងនៃពន្ធនាំចូលពីសហរដ្ឋអាម៉េរិកពិតជាបានក្លាយមកជាពរជ័យមួយសម្រាប់រកទីផ្សារផ្សេង។ ព្រោះវាបើកឱកាសកាន់តែច្រើននៅក្នុងប្រទេសកាណាដា ដើម្បីងាកទៅរកប្រទេសដទៃទៀត ជាពិសេសប្រទេសមួយក្រុមធំ ហៅកាត់ថា អាស៊ាន ដែលជាប្រទេសផលិតអង្ករដ៏សំខាន់បំផុតនៅក្នុងពិភពលោក»។
ម្ចាស់អាជីវកម្មលក់អង្ករនៅក្នុងប្រទេសកាណាដា ក៏កំពុងមានអារម្មណ៍ថា អង្ករនឹងបន្តឡើងថ្លៃថែមទៀត នាពេលខាងមុខ ព្រោះអង្ករនៅក្នុងប្រទេសកាណាដាភាគច្រើន ត្រូវនាំចូលពីសហរដ្ឋអាម៉េរិក។
ម្ចាស់ហាងលក់អង្ករម្នាក់ មានដើមកំណើតឥណ្ឌា បាននិយាយថា អ្នកផ្គត់ផ្គង់អង្ករត្រូវពឹងផ្អែកទាំងស្រុងលើទីផ្សារអន្តរជាតិ ហើយប្រឈមមុខនឹងបញ្ហាផ្សេងៗ។ ប៉ុន្តែដោយសារអង្ករជាអាហារសំខាន់សម្រាប់សហគមន៍ផ្សេងៗ ដូច្នេះតម្រូវការមិនបានធ្លាក់ចុះទេ។
ចំណែកនៅតាមភោជនីយដ្ឋាន នៅក្នុងប្រទេសកាណាដាវិញ អត្រាពន្ធគយរបស់សហរដ្ឋអាម៉េរិកកំពុងតែឱ្យធ្វើម្ចាស់ហាងពិបាកគិតទុកមុន។
រីឯអ្នកគ្រប់គ្រងភោជនីយដ្ឋានបែបកូរ៉េម្នាក់ នៅក្នុងទីក្រុង តូរ៉ុនតូ បាននិយាយថា មិនត្រឹមតែអង្ករនាំចូលមកពីសហរដ្ឋអាមេរិកប៉ុណ្ណោះទេ ដែលឡើងថ្លៃ សូម្បីតែគ្រឿងទេសជាច្រើនទៀត រួមទាំងសាច់មាន់ក៏ឡើងថ្លៃផងដែរ។
លោកបាននិយាយថា «ដោយសារតែយើងប្រើអង្ករអាម៉េរិកដើម្បីដាំបាយ ដូច្នេះការកើនឡើងតម្លៃអង្ករនាំចូលពីសហរដ្ឋអាម៉េរិក ធ្វើឱ្យអង្ករនៅតាមផ្សារឡើងថ្លៃដែរ»៕
