ហ្សាការតា៖ រដ្ឋាភិបាលនៃប្រទេសឥណ្ឌូណេស៊ី និងប្រទេសជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា អង្គការចៃកា (JICA) បានរៀបចំវគ្គបណ្តុះបណ្តាលមួយ ស្តីពីបច្ចេកទេសការដាំដំណាំបឺរ ដើម្បីចែករំលែកចំណេះដឹងដល់ជនជាតិប៉ាឡេស្ទីន ឱ្យមានសមត្ថភាពក្នុងផលិតកម្មផ្លែប៊ឺរ និងរកទីផ្សារ។
ប្រធានការិយាល័យអន្តរជាតិនៃក្រសួងកសិកម្មឥណ្ឌូណេស៊ី បានមានប្រសាសន៍លើកឡើងនៅក្នុងពិធីសម្ពោធកម្មវិធីបណ្តុះបណ្តាល នៅទីក្រុងម៉ាឡាង ក្នុងកោះជ្វាខាងកើតថា ផ្លែបឺរ គឺជាទំនិញកសិកម្ម ដែលមានតម្លៃខ្ពស់ប្រកបដោយជោគជ័យនៅប៉ាឡេស្ទីន ហើយអាចរួមចំណែកដល់សេដ្ឋកិច្ចប៉ាឡេស្ទីន។
វគ្គបណ្តុះបណ្តាលនេះមានរយៈពេល១៤ថ្ងៃ ដោយចាប់ផ្តើមពីថ្ងៃទី១១ ដល់ថ្ងៃទី២៥ ខែសីហា មានអ្នកចូលរួមចំនួន១៥នាក់ ដែលតំណាងឱ្យរដ្ឋាភិបាលប៉ាឡេស្ទីន បាននិងកំពុងចូលវគ្គសិក្សាអំពីដំណើរការទាំងមូលនៃបច្ចេកទេសដាំដុះ និងជំនាញរកទីផ្សារផ្លែបឺរ។
យោងតាមសេចក្តីថ្លែងការណ៍របស់អង្គការ ចៃកា នៅទីក្រុងហ្សាកាតា បានលើកឡើងថា ប្រទេសឥណ្ឌូណេស៊ីរីករាយក្នុងការចែករំលែកចំណេះដឹងអនុវត្តផ្ទាល់ និងបទពិសោធន៍ដ៏ល្អបំផុត ក្នុងការផលិតផ្លែបឺរ។
ចំណែកឯកអគ្គរដ្ឋទូតប៉ាឡេស្ទីន ប្រចាំប្រទេសឥណ្ឌូណេស៊ី បានសម្តែងការពេញចិត្តចំពោះជំនួយពីរដ្ឋាភិបាលឥណ្ឌូណេស៊ី និងអង្គការ ចៃការ ដល់ប្រជាជនប៉ាឡេស្ទីនសម្រាប់យកទៅពង្រឹងវិស័យកសិកម្មរបស់ខ្លួន។
តំណាងជាន់ខ្ពស់របស់អង្គការ ចៃកា ប្រចាំប្រទេសឥណ្ឌូណេស៊ី បានមានប្រសាសន៍ថា វគ្គបណ្តុះបណ្តាលនេះឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលជប៉ុន និងរដ្ឋាភិបាលឥណ្ឌូណេស៊ី ក្នុងការគាំទ្រដល់ការអភិវឌ្ឍរបស់ប្រទេសប៉ាឡេស្ទីន តាមរយៈគម្រោងកិច្ចសហប្រតិបត្តិការ ដែលមានតាំងពីឆ្នាំ២០០៧។
កម្មវិធីបណ្តុះបណ្តាលនេះ ដែលមានឈ្មោះថា «ការបណ្តុះបណ្តាលកិច្ចសហប្រតិបត្តិការត្រីកោណខាងត្បូង-ខាងត្បូង ស្តីពីការគ្រប់គ្រងការដាំដុះផ្លែឈើតំបន់ត្រូពិច អាវ៉ូកាដូ ដោយរួមបញ្ចូលគ្នាសម្រាប់ប៉ាឡេស្ទីន» រៀបចំឡើងនៅមជ្ឈមណ្ឌលបណ្តុះបណ្តាលកសិកម្ម ក្នុងទីក្រុងម៉ាឡាង ប្រទេសឥណ្ឌូណេស៊ី។ វគ្គបណ្តុះបណ្តាលនេះត្រូវបានបែងចែកទៅជាវគ្គទ្រឹស្តី និងការអនុវត្តជាក់ស្តែង នៅក្នុងទីក្រុងនានារបស់ប្រទេសឥណ្ឌូណេស៊ី ដែលតំបន់ដាំដំណាំប៊ឺរ និងផ្សារលក់ផ្លែប៊ឺរ។
យោងតាមអង្គការ ចៃកា បានឱ្យដឹងថា គំនិតផ្តួចផ្តើមនេះ គឺជាផ្នែកមួយនៃកម្មវិធីកសាងសមត្ថភាពដំណាក់កាលទីពីរ ដែលគាំទ្រដោយសន្និសីទស្តីពីកិច្ចសហប្រតិបត្តិការក្នុងចំណោមប្រទេសអាស៊ីបូព៌ាសម្រាប់ការអភិវឌ្ឍប៉ាឡេស្ទីន ដោយត្រូវបានផ្តួចផ្តើមដោយប្រទេសជប៉ុន កាលពីឆ្នាំ២០១៣។
វគ្គបណ្តុះបណ្តាលនេះធ្វើឡើងដោយសហការជាមួយក្រសួងកសិកម្មឥណ្ឌូណេស៊ី ក្រសួងការបរទេសឥណ្ឌូណេស៊ី អង្គការ ចៃកា របស់ជប៉ុន និងទីភ្នាក់ងារអភិវឌ្ឍន៍អន្តរជាតិរបស់ឥណ្ឌូណេស៊ី ហើយបញ្ជាក់ជាថ្មីនូវការប្តេជ្ញាចិត្តរួមរបស់ប្រទេសឥណ្ឌូណេស៊ី និងប្រទេសជប៉ុនក្នុងការបន្តគាំទ្រដល់ការអភិវឌ្ឍប៉ាឡេស្ទីន៕
