រាជធានីភ្នំពេញ៖ យោងតាមរបាយការណ៍ស្តីពីស្ថានភាពនៃការនាំចេញផលិតផលដំណាំរយៈពេល៧ខែឆ្នាំ២០២៥របស់អគ្គនាយកដ្ឋានកសិកម្មបានបង្ហាញការសន្និដ្ឋានឬធ្វើការប៉ាន់ស្មានរបស់ខ្លួនថា ការប្រមូលផលផ្អែកលើផ្ទៃដីដែលបានដាំដុះរួចក្នុងឆ្នាំ២០២៥ បរិមាណផលដំឡូងមី ដែលគ្រោងនឹងប្រមូលផលក្នុងខេត្តជាប់ព្រំដែនថៃចំនួន៥ ចាប់ពីខែសីហា ដល់ខែធ្នូ មានប្រមាណ១០លានតោន ក្នុងនោះការប្រមូលផលច្រើនជាងគេនៅខែធ្នូអាចមានប្រមាណ៣២,៥០ភាគរយ ហើយការប្រមូលផលដំឡូងមី ពុំមានផលប៉ះពាល់ទេ ដោយសារក្រុមហ៊ុនបានបង្វែរទិសដៅនាំចេញដំឡូងមីក្រៀមទៅកាន់ប្រទេសចិន។ជាក់ស្តែងក្នុង រយៈពេល៧ខែ ឆ្នាំ២០២៥ ការនាំចេញចំណិតដំឡូងមីក្រៀមទៅកាន់ប្រទេសចិនមានចំនួន ៥,៣ម៉ឺនតោន កើនឡើង ៥ម៉ឺនតោន ឬស្មើប្រមាណ១ ៧៥៥ភាគរយ បើធៀបនឹងរយៈពេលដូចគ្នាឆ្នាំ២០២៤មានចំនួន៣ ០៤៤តោន។
របាយការណ៍ដដែលបង្ហាញឱ្យដឹងទៀតថា ចំណែកបរិមាណផលពោតក្រហមដែលគ្រោងនឹងប្រមូលផលក្នុងរយៈពេលដូចគ្នាមានប្រមាណ ៦១ម៉ឺនតោន ក្នុងនោះការប្រមូលផលច្រើនជាងគេក្នុងខែសីហា មានប្រមាណ ៦៦,៤៦% ហើយតាមការប៉ាន់ស្មាន ការប្រមូលផលពោតក្រហមក្នុងខែកក្កដានេះមានប្រមាណ ១៣ម៉ឺនតោន។ ក្នុងករណីមិនអាចនាំចេញពោត ក្រហមទៅកាន់ប្រទេសថៃបាន នឹងទទួលរងផលប៉ះពាល់តិចតួច ប៉ុន្តែបញ្ហានេះ អាចនឹងដោះស្រាយបានប្រសិនបើ អាចពិភាក្សាជាមួយក្រុមហ៊ុននាំចូលពោតក្រហមឱ្យផ្អាកប្រតិបត្តិការនាំចូលរបស់ខ្លួនមួយរយៈពេលខ្លី ដើម្បីឱ្យក្រុមហ៊ុន ផលិតចំណីសត្វក្នុងស្រុកជួយប្រមូលទិញពីកសិករសម្រាប់កែច្នៃជាចំណីសត្វ។
សូមជម្រាបជូនផងដែរ កាលថ្ងៃទី១១ខែសីហាឆ្នាំ២០២២៥, ក្រសួងពាណិជ្ជកម្មបានចុះអនុស្សរណៈយោគយល់គ្នាជាមួយក្រុមហ៊ុនផលិតចំណីសត្វចំនួន៣ ស្តីពីកិច្ចសហប្រតិបត្តិការជំរុញការប្រមូលទិញពោតក្រហម ដំឡូងមី និងវត្ថុធាតុដើមក្នុងស្រុកផ្សេងទៀតសម្រាប់ផលិតចំណីសត្វ ។ ក្រុមហ៊ុនទាំងនោះមានដូចជាក្រុមហ៊ុន ខ្មែរ ហ្វ្រេស មីល ឯ.ក (Khmer Fresh Milk), ក្រុមហ៊ុនផលិតចំណីសត្វ គ្រីនហ្វីត (GREENFEED Cambodia) និងសហគ្រាសផលិតចំណីសត្វដង្ខៅប៉ាង ។
ផ្អែកតាមរយៈអនុស្សារណៈនៃការយោគយល់គ្នានេះ ក្រុមហ៊ុនផលិតចំណីសត្វទាំង៣ ខាងលើនឹងប្រមូលទិញកសិកផលក្នុងស្រុក សម្រាប់ពោតក្រហម ៥៤.០០០តោន(៥ម៉ឺន៤ពាន់តោន) ក្នុងមួយឆ្នាំ, ដំឡូងមី ១៣. ០០០តោន (១ម៉ឺន៣ពាន់តោន)ក្នុងមួយឆ្នាំ, កញ្ជុងអង្ករ ១២.៨០០តោន(១ម៉ឺន២ពាន់៨រយតោន)ក្នុងមួយឆ្នាំ និងកន្ទក់ ៣០.០០០តោន(៣ម៉ឺនតោន) ក្នុងមួយឆ្នាំ។
ពាក់ព័ន្ធបញ្ហាខាងលើនេះ រដ្ឋមន្ត្រីក្រសួងពាណិជ្ជកម្ម បានការណែនាំឱ្យក្រុមការងារក្រសួងពាណិជ្ជកម្មបន្តកិច្ចសហការឱ្យបានជិតស្និទ្ធិជាមួយក្រសួង-ស្ថាប័នពាក់ព័ន្ធ លើការងាររៀបចំផែនការដាំដុះ និងប្រមូលទិញ កសិផលសម្រាប់ផលិតចំណីសត្វ ជាមួយកសិករ តាមរយៈការរៀបចំឱ្យមានការផ្គូរផ្គងរវាងក្រុមហ៊ុនសៃទ្បូ ឬសហគមន៍កសិករ និងក្រុមហ៊ុនផលិតចំណីសត្វ ដោយផ្តោតសំខាន់ផងដែរលើការអនុលោមតាមលក្ខខណ្ឌតម្រូវគុណភាព សំដៅធានាបាននូវស្ថិរភាពការផ្គត់ផ្គង់ និងបញ្ជាទិញ និងសុវត្ថិភាពសម្រាប់អ្នកបរិភោគ៕ ដោយ ឡុង សារេត
