ហៃណាន៖ នាយកផ្នែកលក់ផលិតផលក្រុមហ៊ុនចិន ដែលគ្រប់គ្រងចម្ការទុរេនជាង៨៦៦ហិកតា នៅក្នុងខេត្ត ហៃណាន ប្រទេសចិន បាននិយាយថា ក្រុមហ៊ុននឹងយកចិត្តទុកដាក់លើការផ្សព្វផ្សាយ និងរៀបចំព្រឹត្តិការណ៍ភ្លក្សរស់ជាតិ ផ្លែទុរេនខេត្តហៃណាន ដែលត្រូវចាប់ពីចុងខែមិថុនា ដល់ដើមខែកក្កដា ឆ្នាំ២០២៥នេះ ទោះបីមិនទាន់ចាប់ផ្តើមលក់ជាលក្ខណៈពាណិជ្ជកម្មក៏ដោយ។
លោកបានពន្យល់ថា «ដូចឆ្នាំមុនដែរ យើងបន្តអនុវត្តយុទ្ធសាស្ត្រ លាក់ទុកសារធាតុចិញ្ចឹមផ្លែឈើនៅក្នុងដីក្នុងគោលបំណងកំណត់ទិន្នផលផ្លែ ដើម្បីរក្សាសារធាតុចិញ្ចឹមនៅក្នុងដីឱ្យនៅបានយូរអង្វែងសម្រាប់ដើមទុរេនលូតលាស់ល្អថែមទៀត។ បច្ចុប្បន្ន ដើមទុរេនលើផ្ទៃដីទំហំប្រហែល២៦៦ហិកតាកំពុងចេញផ្លែ ហើយយើងរំពឹងថា នឹងកើនឡើងដល់៤០០ ទៅ៤៦៦ហិកតា នៅឆ្នាំក្រោយ ជាមួយនឹងទិន្នផលប៉ាន់ស្មានពី ៨០ ០០០ដើម ទៅ១០០ ០០០ដើម ដែលអាចឱ្យយើងបង្កើនទិន្នផលយ៉ាងច្រើន»។
លោកបានបញ្ជាក់ថា ក្នុងចំណោមដើមទុរេនទាំងអស់នេះ ពូជបច្ចុប្បន្ននេះ រួមមាន ម៉ាន់ថង មូសាងឃីង កានយ៉ៅ និងពូជប្លែកថន។
លោកបានមានប្រសាសន៍ទៀតថា ក្រុមបានបណ្តុះបណ្តាលក្រុមដាំដុះទុរេននៅក្រៅប្រទេស ហើយបាននាំយកពួកគេមកគ្រប់គ្រងចម្ការរបស់ក្រុមហ៊ុន។ ចម្ការបានអនុវត្តតាមស្តង់ដារគ្រប់គ្រង និងប្រើប្រាស់ជីសរីរាង្គដែលមានអាជ្ញាប័ណ្ណអនុញ្ញាតត្រឹមត្រូវ។ ផ្លែធុរេននឹងមានពណ៌លឿងស្រស់ មានរសជាតិផ្អែមមុត ដែលកម្ររកបានក្នុងចំណោមផ្លែទុរេននាំចូល។
ចំណែកចម្ការវិញបានទទួលវិញ្ញាបនប័ត្រសម្គាល់ការអនុវត្តកសិកម្មល្អ (Good Agricultural Practices) រួចហើយ ព្រមទាំងរំពឹងថា នឹងទទួលបានវិញ្ញាបនប័ត្របញ្ជាក់កសិកម្មសរីរាង្គផងដែរ នៅឆ្នាំ២០២៦។ទាក់ទងនឹងបញ្ហាប្រឈមផ្នែកអាកាសធាតុព្យុះទីហ្វុង ដែលបានវាយប្រហារខេត្តហៃណាន នៅពាក់កណ្តាលខែមិថុនាកន្លងមកនេះ បានជះឥទ្ធិពលយ៉ាងខ្លាំងដល់ដំណាំហូបផ្លែជាច្រើន រួមទាំងទុរេនផងដែរ។
លោកបាននិយាយថា «ព្យុះទីហ្វុងខែមិថុនា គឺកម្រកើតឡើងនៅខេត្តហៃណានណាស់ ដូច្នេះកសិករមានពេលតិចតួចក្នុងការរៀបចំការពារ។ ដំបូងឡើយយើងមានទុរេនជិតទុំពី២០ ០០០ផ្លែ ទៅ៣០ ០០០ផ្លែ ប៉ុន្តែព្យុះនេះបានបំផ្លាញអស់ផ្លែ មកនៅសល់ត្រឹមតែ៨ ០០០ផ្លែ ទៅ១០ ០០០ផ្លែប៉ុណ្ណោះ»។
និយាយអំពីស្ថានភាពបច្ចុប្បន្ន និងបញ្ហាប្រឈមនៃឧស្សាហកម្មធុរេនរបស់ខេត្តហៃណានវិញ លោកបានចង្អុលបង្ហាញថា កាលពីមុន គុណភាពផ្លែទុរេនរបស់ចម្ការនីមួយៗមិនសូវល្អ ច្រើនតែបណ្តាលមកពីការដាំដុះ និងបច្ចេកទេសគ្រប់គ្រងមិនសូវល្អ ដោយសារម្ចាស់ចម្ការមិនមែនជាដៃគូរបស់យើងទេ។ អ្នកចម្ការឯករាជ្យខ្លះហេតុតែចង់បានលុយពេក ទើបប្រញាប់យកផ្លែទុរេនមិនទាន់ទុំល្អទៅលក់នៅទីផ្សារ ទើបនាំឱ្យផ្លែទុរេនមានគុណភាពទាប។
ជាឧទាហរណ៍ ផ្លែទុរេនពូជម៉ាន់ថង គួរតែរៀបចំទុកដាក់តម្រៀបគ្នាយ៉ាងប្រុងប្រយ័ត្ន រួមជាមួយនឹងការលាងទឹកសម្លាប់មេរោគ និងត្រួតពិនិត្យសីតុណ្ហភាព។ ទោះបីជាយ៉ាងណាក៏ដោយ ម្ចាស់ចម្ការខ្លះដឹកផ្លែទុរេនទៅលក់ភ្លាមៗបន្ទាប់ពីបេះពីដើម ដែលបណ្តាលឱ្យមានបញ្ហាដូចជាសាច់មិនទុំ សម្បកមិនបើក និងសាច់មានព៌ណស្លេកជាដើម។ កាលពីឆ្នាំ២០២៤ បញ្ហាគុណភាពបែបនេះបានធ្វើឲ្យប៉ះពាល់ដល់កេរ្តិ៍ឈ្មោះទីផ្សាររបស់ទុរេនខេត្តហៃណាន។ លើសពីនេះ ចម្ការខ្លះប្រើជី និងថ្នាំសម្លាប់សត្វល្អិតច្រើនពេក ហើយមានការគ្រប់គ្រងមិនស៊ីសង្វាក់គ្នា នាំឱ្យផ្លែឈើមានរសជាតិមិនឆ្ងាញ់។
លោកប្រធានផ្នែកលក់ផ្លែទុរេន បានកត់សម្គាល់ថា «ជាការពិតណាស់ មានចម្ការដែលគ្រប់គ្រងបានល្អជាមួយនឹងការអនុវត្តកសិកម្មល្អ ប៉ុន្តែពួកគេនៅតែមានចំនួនតិចដដែល។ មន្ត្រីជំនាញក្នុងតំបន់កំពុងយកចិត្តទុកដាក់លើបញ្ហាទាំងនេះ ហើយសង្ឃឹមថា ក្រុមហ៊ុនអាចជួយលើកកម្ពស់ស្តង់ដាររួមនៃឧស្សាហកម្មនេះ»។
ដោយសង្កត់ធ្ងន់លើគុណសម្បត្តិច្បាស់លាស់មួយចំនួននៃដំណាធុរេន ដែលដាំដុះក្នុងស្រុក លោកបានមានប្រសាសន៍ថា ផ្លែទុរេនហៃណាន អាចប្រមូលផលបាននៅពេលវាដុំលើដើមប្រហែល៩៥ភាគរយ។ ដោយសារផ្លែទុរេនដាំដុះក្នុងស្រុក មិនត្រូវការដឹកជញ្ជូនផ្លូវឆ្ងាយ ឬរក្សាទុកយូរទេ ដូច្នេះធ្វើឱ្យផ្លែទុរេននៅស្រស់ល្អ។
លោកប្រធានផ្នែកលក់ បាននិយាយដូច្នេះថា «យើងកំពុងធ្វើការជាមួយក្រុមហ៊ុនអាកាសចរណ៍ដើម្បីធានាកន្លែងដឹកទំនិញតាមផ្លូវអាកាស និងសាងសង់ឃ្លាំងនៅក្នុងទីក្រុងធំៗ។ គោលដៅរបស់យើងគឺជ្រើសរើសផ្លែទុរេននៅពេលព្រឹក ហើយបញ្ជូនវាទៅឃ្លាំងរបស់អ្នកលក់ក្នុងរយៈពេល២៤ម៉ោង។ នៅខែកក្កដា យើងក៏នឹងបញ្ចប់ការសាងសង់រោងចក្រវេចខ្ចប់ផ្លែធុរេនស្រស់ ដែលបំពាក់សម្ភារេះគ្រប់គ្រាន់ ដែលរួមមានម៉ាស៊ីនពិនិត្យដោយប្រើបញ្ញាសិប្បនិម្មិត។ ប្រព័ន្ធនេះអាចពិនិត្យឃើញសត្វល្អិតបំផ្លាញ ឬពិនិត្យយ៉ាងច្បាស់លាស់អំពីគុណភាពនៅក្នុងសាច់ ដែលធ្វើឱ្យវាក្លាយជាខ្សែសង្វាក់ផលិតកម្មផ្លែទុរេនដំបូងគេរបស់ប្រទេសចិន»៕
